Korent borey bataga 1na 4

Almasihu diyawey

1Takaa woo ra borey mʼir laasaabu sanda Almasihu tamyaŋ nda Irkoy sirrey talfikawyaŋ. 2Hayaa kaŋ i ga wiri talfikaw ga manʼti kala a ma garandi laadirante. 3Agay woo, a ga sawa ay ga, war mʼay ciiti wala adamize mʼay ciiti. Agay, ay sʼay boŋ ciiti, 4zama ay binoo sʼay gurzugay, amma hayaa woo ra, manʼti ya nka tee boro šerrante, boraa kaŋ gʼay ciiti manʼti kala ir Koyoo. 5Woo se war masi baffoo ciiti nda nga waatoo mana too, hala waati kaŋ ir Koyoo kaa kaŋ ga hayey mo kaŋ ga tugu kubaa ra daŋ gaayoo ra, ka borey biney miilewey fatawandi. Waatoo din Irkoy ga boro foo kul saabu nda woo kaŋ nda a ga hima.

6Agʼarmey, šenney wey kaŋ ay nʼi har agay nda Apolos ga, ya nʼi har kala hala war mʼir guna ka tee se. A ga war ganji war ma bisa woo kaŋ hantumandi ga, hala war masi bolsay ka boro foo bisandi affoo. 7Macin no ma ni nda borey jerey fay? Macin bara ma ne kaŋ mana nondi ma ne? Nda a nka nondi ma ne, macin se nʼga bolsay sanda a mana nondi ma ne?

8War kungu ka ben! War duu alman ka ben! War šintin ka laama bila ir! Yala war ma laama nda cimi hala ir mo ma laama war bande! 9Zama ni mma nee kaŋ Irkoy nka doo kokorantey noo ir kaŋ ti diyawey se: ir ga hima nda sanda boroyaŋ kaŋ kayandi i ma buu, zama ir tee gaayahaya aduɲɲa se, maanaa almalaykey nda borey se. 10Ir wey ya, ir tee hollokomyaŋ Almasihu maaganda se, amma war ya, war duu lakkal Almasihu bande, ir sii nda gaabi, amma war goo nda gaabi. War duu beeray, amma ir kayna. 11Hala nongoo kaŋ ra ir goo, ir ga zarabi nda heray nda jaw, ir baɲi, i na kabe kʼir kar, ir sii nda gorodoo foo. 12Ir ga goy nda ir kabey ka fara, i gʼir wow, ir ga gaara, i gʼir gurzugay, ir ga muɲe, 13i gʼir maaɲey futandi, ir ga šenni henna har i se. Hala sohõ ir tee sanda aduɲɲa žiiboo, sanda haya žiibi kaŋ ga warrandi.

14Manʼti ya mma baa ya war haawandi, nga se ay ga hayey wey hantum, amma ya mma baa ya war hoyray sanda ay zankey, ay baakey. 15Ba nda war duu gongukaw zenber woy (10.000) Almasihu ganaroo ra, amma woo kul, war sii nda baaba boobo, zama agay, ay na Alhabar Boryaa ka war daŋ aduɲɲa ra Almasihu Isa albarkaa ra. 16Woo maaganda se ay gʼa ŋaaray war ga, war ma tee ay dendenkey. 17Woo ka kate ya Timote sanba war do kaŋ ti ay izoo kaŋ ay ga hanse ka bagʼa, laadirante no ir Koyoo albarkaa ra. A ga war lakkaley zumandi fondawey kaŋ ra ay dira Almasihu [Isa] albarkaa ra nda takaa kaŋ nda ay gʼi cawandi nongoo kul ra, Egiliz foo kul ra.

18Boroyaŋ war ra too nda hew, i mma tammahã kaŋ ay si kaa war do. 19Amma ne nda kayna ay ga koy war do nda ir Koyoo baa. Nda ay too kate ay si borey kaŋ ga bolsay šenney daŋ assal, hayey kaŋ i ga hin kʼi tee no ma kabu, 20zama Irkoy Laamaa manʼti šenni de, hini no. 21Macin no war ga baa, ya koy war do nda gobu wala ya koy nda baji nda bineyaynay?

Currently Selected:

Korent borey bataga 1na 4: ses

Highlight

Copy

Compare