Hohches Leet 8
8
Es 8. Gabiddel.
1Oh, vann du yusht veahsht vi en broodah,
es an mei maemm iahra brisht ksukkeld hott!
No vann ich dich draus ohdreffa dayt,
kend ich dich kissa,
un nimmand dayt ebbes denka difunn.
2Ich dayt dich no fiahra,
un dayt dich zu mei maemm iahra haus bringa—
selli es mich gland hott.
Ich dayt diah kshpeisdah vei gevva zu drinka,
da seidah funn mei grannat-ebbel.
3Sei lingsah oahm is unnich meim kobb,
un sei rechtsah oahm is um mich rumm.
4Diah yungi mayt funn Jerusalem, ich frohk eich
es diah di leevi nett ufvekket un fahinnahret,
biss es di leevi kfellich is.
Di Yunga Mayt
5Veah is dess am ruff kumma funn di vildahnis,
un lost sich uf da oahm funn iahra beleebdah?
Es Yung Maydel
Unnich em abbel-bohm habb ich dich uf gvekt,
datt voahsht du ohkfanga in dei maemm,
datt in shmatza hott see dich geboahra.
6Du mich uf dei hatz vi en seal,
vi en seal uf dei oahm.
Fa di leevi is so shteik es da doht,
un is jealous un shtreng so vi's grawb.
Es brend vi en hays feiyah,
un vi en mechtich flamm.
7Feel vassah kann di leevi nett ausmacha,
revvahra kenna di leevi nett vekk vesha.
Vann ebbah awl's keshtlich sach in seim haus
gevva vett fa leevi,
dann veah's alles gans nunnah gedrayt.
Di Yunga Mayt
8Miah henn en yungi shveshtah;
iahra brisht sinn noch nett gvaxa.
Vass sella miah du fa unsah shveshtah,
vann ebbah frohkt fa see heiyahra?
9Vann see en vand is,
dann bauwa miah en silvah tavvah uf see.
Vann see en doah is,
dann macha miah see zu mitt cedar blanka.
Es Yung Maydel
10Ich binn en vand,
un mei brisht sinn vi rundi tavvahs.
So binn ich vadda zu eem
vi ebbah es eem fridda gebt.
11Da Solomon hott en vei-goahra katt an Baal-Hamon;
eah hott sei vei-goahra naus glaynd.
Yaydah ebbah hott en dausend shtikkah silvah gebrocht
fa's frucht.
12Mei ayknah vei-goahra heaht zu miah;
ich gebb en dausend shtikkah silvah zu diah, Solomon,
un zvay hunnaht zu selli es acht gevva uf's frucht.
Da Yung Mann
13Du es in di goahra hoksht,
mei freind sinn am voahra fa dei shtimm,
loss mich dei shtimm aw heahra.
Es Yung Maydel
14Kumm kshvind, mei beleebdah,
sei vi da hash
adda vi en yungah hasha-bokk
es drovva in di berga is vo shpeis vaxa.
Currently Selected:
Hohches Leet 8: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
