Hohches Leet 2
2
Es 2. Gabiddel.
Es Yung Maydel
1Ich binn vi en rose blumm funn Sharon,
vi en lilya-blumm es bleet im deich.
Da Yung Mann
2Mei beleebdi unnich di yunga mayt
is vi en lilya-blumm unnich danna.
Es Yung Maydel
3Mei beleebdah unnich yungi mennah
is vi en abbel-bohm unnich di baym im bush.
Ich gleich in seim shadda hokka
un sei frucht is sees zu miah.
4Eah fiaht mich in's grohs essa-haus,
un sei shadda ivvah mich is leevi.
5Gebb miah grefta mitt reseina-kucha
un frish mich uf mitt ebbel,
fa ich binn matt mitt leevi.
6Sei lingsah oahm is unnich meim kobb,
un sei rechtsah oahm is um mich rumm.
7Diah yungi mayt funn Jerusalem, ich frohk eich
im nohma funn di hash un vildi diahra im feld,
es diah di leevi nett ufvekket un fahinnahret
biss es di leevi kfellich is.
8Do is di shtimm fumm meim beleebda!
Gukk moll, do kumd eah,
am ivvah di berga tshumba,
un ivvah di hivla shpringa.
9Mei beleebdah is vi en hash,
vi en yungah hasha-bokk.
Gukk moll, datt shtayt eah hinnich unsah vand,
eah is am deich's fenshtah rei gukka
deich di lechah fumm lattice.
10Mei beleebdah hott kshvetzt un ksawt zu miah,
“Shtay uf, mei beleebdi,
mei alli-shenshti, un kumm mitt miah.
11Gukk, da vindah is ivvah;
da reyyah hott kshtobt un is faddich.
12Di blumma sinn am aus di eaht kumma;
di zeit fa singa is do;
di daddel-daub iahra shtimm
is keaht im land.
13Da feiya-bohm is am sei frucht bringa,
di vei-shtekk sinn am bleeya un iahra kshmakk ab gay lossa.
Shtay uf, mei beleebdi,
Mei alli-shenshti, un kumm mitt miah.”
Da Yung Mann
14Mei daub datt zvishich di felsa,
datt vo du dich fashtekkelsht am hivvel nohch,
veis miah dei ksicht,
loss mich dei shtimm heahra;
fa dei shtimm is so sees,
un dei ksicht so shay.
15Fang di foxa fa uns,
di glenna foxa
es di vei-goahra fadauva,
unsah vei-goahra es am bleeya sinn.
Es Yung Maydel
16Mei beleebdah is mei un ich binn sei,
eah vayt sei shohf unnich di lilya-blumma.
17Biss es dawk vatt
un di shadda fagayn,
dray dich, mei beleebdah,
un sei vi da hash,
adda da yung hasha-bokk
in di hohcha hivla.
Currently Selected:
Hohches Leet 2: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
