Glawk-Leedah 4
4
Es 4. Gabiddel.
Di Letshta Dawwa Funn Jerusalem
1Vi hott doch's gold sich fadunkeld,
un's fei gold da shein faloahra!
Di heilicha shtay fumm tempel leiya fashtroit,
am ekk funn alli shtrohs.
2Di keshtlicha kinnah funn Zion,
es als gleicha gacht voahra zu gold,
sinn nau gnumma es vi eahdichi heffa,
gmacht bei em heffa-machah sei hend.
3Even di velf gevva iahra brusht,
so es iahra yungi sukla kenna.
Avvah di dochtah funn mei leit is unbamhatzich vadda,
vi en ostrich zu iahra yungi in di vildahnis.
4Deich dasht dutt em glay kind sei zung
zu di gummah funn sei maul shtekka;
di kinnah frohwa fa broht,
avvah nimmand gebt eena ennichs.
5Selli es als fei ess-sach gessa henn,
sinn nau am fahungahra in di shtrohsa.
Selli es als geglayt voahra in purpel,
leiya nau uf di esh-heifa.
6Di sinda funn di dochtah funn mei leit,
sinn graysah es selli funn Sodom,
selli shtatt es bletzlich nunnah grissa voah,
un nimmand hott sei hand gedrayt fa iahra helfa.
7Unsah evvahshti voahra may rein es da shnay;
si voahra veisah es millich.
Iahra leib voah may rohdlich es vi say-coral,
un si voahra shay vi sapphire-shtay.
8Avvah nau sinn si shvatzah es offa-roos,
si sinn nett gekend in di shtrohsa.
Iahra haut vatt runslich uf iahra gnocha,
see vatt drukka es vi en shtikk hols.
9Selli es doht gmacht voahra mitt em shvatt,
sinn bessah ab es selli es shtauva funn hungah,
selli es yusht shloh am fahungahra sinn,
un kenn ess-sach henn fumm feld.
10Di hend funn bamhatzichi veibsleit henn missa
iahra aykni kinnah kocha;
dess is iahra ess-sach vadda,
vo dess aylend uf di dochtah funn mei leit kumma is.
11Da Hah voah folshtendich bays,
un hott sei gleedichah zann ausgleaht.
Eah hott en feiyah ohkshtekt in Zion,
es see alles nunnah gebrend hott uf da bodda.
12Di kaynicha funn di eaht henn nett geglawbt,
un aw nett di leit funn di veld,
es di heida un feinda selayva,
deich di doahra in Jerusalem nei gay kenda.
13Dess hott blatz gnumma deich di sinda funn iahra brofayda,
un di shulda funn iahra preeshtah;
dee es es bloot funn di gerechta
datt drinn fagossa henn.
14Nau lawfa si rumm deich di shtrohsa,
vi mennah es blind sinn.
Si sinn so unrein gmacht mitt bloot,
es nimmand iahra glaydah ohrayya dauf.
15“Gaynd vekk! Diah sind unrein!” sawwa leit zu eena,
“Vekk, gaynd vekk! Rayyet uns nett oh!”
So sinn si difunn kshprunga un lawfa rumm heah,
un di leit unnich di heida sawwa,
“Si kenna nimmi lengah do bei uns bleiva.”
16Da zann fumm Hah hott si ausnannah kshtroit,
eah bekimmaht sich nimmi veyyich eena.
Di preeshtah henn kenn eah may katt,
un di eldishti kenn bamhatzichkeit.
17Miah henn ohkalda gukka fa hilf,
biss unsah awwa nimmi sayna henn kenna.
Miah henn ohkalda voahra un vatsha
fa en folk es uns nett helfa hott kenna.
18Mennah sinn uns nohch kumma,
so es miah nett in di shtrohsa lawfa henn daufa,
unsah end voah nayksht, unsah dawwa gnambaht,
fa unsah end voah kumma.
19Unsah fafolyah voahra kshvindah
es di awdlah im himmel;
si henn uns ivvah di berga gyawkt,
un henn fashtekkeld gvoaht fa uns in di vildahnis.
20Em Hah sei ksalbdah, deah ohften funn unsah layva,
voah kfanga in iahra falla.
Veyyich eem henn miah als ksawt, “Unnich seim shadda
zayla miah layva mitt di heida um uns rumm.”
21Froi dich un sei fraylich, oh Dochtah funn Edom,
du es im land funn Uz voonsht.
Avvah's kobli kumd aw rumm zu diah;
du vasht ksoffa un zaylsht dich nakkich macha.
22Di shtrohf fa dei sinda zayld enda, oh Dochtah funn Zion,
un du zaylsht nee nimmi vekk kfiaht vadda.
Avvah du Dochtah funn Edom, eah zayld dei sinda shtrohfa,
un dei ungerechtichkeit abdekka.
Currently Selected:
Glawk-Leedah 4: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible