Jeremia 8
8
Es 8. Gabiddel.
1“An selli zeit,” sawkt da Hah, “zayla di gnocha funn di kaynicha un di evvahshti funn Juda, di gnocha funn di preeshtah un di brofayda un di gnocha funn di leit funn Jerusalem aus iahra grayvah gnumma vadda.
2Si zayla ausnannah kshtroit sei unnich di sunn un da moon un unnich awl di shtanna fumm himmel—dee es si leeb katt henn un gedeend henn, un dee es si nohch gloffa sinn, iahra roht kfrohkt henn un si ohgebayda henn. Si zayla nett zammah gnumma sei un fagrawva vadda, avvah zayla uf em grund leiya vi misht.
3Vo-evvah es ich si anna yawk, zayla awl selli es ivvahrich sinn funn demm evila folk, vinsha si veahra doht, leevah es noch levendich sei,” sawkt da Awlmechtich Hah.
Di Leit Sinn Alsnoch Shteibahrich
4“Sawk zu eena, ‘Dess is vass da Hah sawkt:
Vann ebbah anna fald, dutt eah nett viddah uf shtay?
Vann ebbah letz drayt, dutt eah nett viddah zrikk gay?
5So favass drayya dee leit vekk unni viddah zrikk drayya?
Favass dutt Jerusalem immah vekk drayya?
Si henka oh zu di falshheit,
un doon's nett fa zrikk kumma.
6Ich habb si goot abkeicht,
avvah ich heah si nett sawwa vass recht is.
Nimmand macht sei sach recht fa sei sinda,
un sawkt, “Vass habb ich doch gedu?”
Yaydah funn eena gayt sei ayknah vayk,
vi en greeks-gaul fassich shpringd fa in da greek.
7Da stork in di luft
vayst vann's zeit is fa zrikk gay.
Di daddel-daub, da shvalma un da crane
gayn zrikk un faddi an di recht zeit fumm yoah.
Avvah mei leit doon di gebodda
fumm Hah nett vissa.
8Vi kennet diah sawwa, “Miah henn veisheit,
fa miah henn's ksetz fumm Hah?”
Avvah vass eiyah shrift-geleahrah kshrivva henn
is deicha vekk en leek.
9Eiyah mennah mitt veisheit vadda fashohmd,
si zayla engshtlich sei un kfanga vadda.
Si henn em Hah sei vatt nunnah gedrayt,
so vass fa veisheit henn si nau?
10Fasell gebb ich iahra veivah zu anri mennah,
un iahra feldah zu neiyi ayknah,
veil fumm vennichshta zumm grayshta
sinn si awl greedich fa uneahlich sach;
fumm brofayt zumm preeshtah
sinn si awl uneahlich.
11Si achta mei leit es am vay du sinn,
es vann's ebbes leichtes veah,
si sawwa, “Fridda, fridda,”
un doch hott's kenn fridda.
12Doon si sich shemma bei awl dee sacha du?
Nay, si henn kenn shohm;
iahra ksichtah vadda nett even roht.
Fasell zayla si falla unnich di kfallana;
si vadda nunnah gebrocht vann ich si moll shtrohf,’
so sawkt da Hah.
13‘Ich zayl si vekk nemma,’
sawkt da Hah,
‘es zayla kenn drauva uf di vei-shtekk sei,
un kenn feiya uf di feiya-baym,
iahra bleddah falla ab.
Vass ich eena gevva habb,
vatt vekk gnumma funn eena.’”
14Di leit sawwa, “Favass hokka miah do?
Fasamlet eich!
Vella nei in di eigmavvahda shtett gay
so es miah datt shtauva kenna!
Fa da Hah unsah Gott zayld uns umkumma lossa;
eah hott uns giftich vassah gevva fa drinka,
veil miah ksindicht henn geyyich een.
15Miah henn koft fa fridda,
avvah's is nix goodes kumma.
Miah henn koft fa kayld vadda,
avvah miah sinn yusht fagelshtaht vadda.
16Di feinda iahra geil
heaht ma shnaufa funn Dan.
Iahra hengshta greisha,
un's gans land shiddeld.
Si sinn kumma's land uf fressa,
un alles es drinn is,
di shtatt un awl selli es drinn voona.”
17“Gukket moll,”
sawkt da Hah,
“ich zayl shlanga unnich eich shikka,
giftichi shlanga es nett gezohmd sei kenna,
si zayla eich beisa.”
Da Jeremia Is Bedreebt Fa Sei Leit
18Mei hatz in miah is bedreebt,
un's kann nett kayld sei.
19Heich moll, ich heah mei leit am greisha,
funn en land veit ab.
Is da Hah nett in Zion?
Is iahra kaynich nimmi datt?
Da Hah sawkt, “Favass henn si mich fazand
mitt iahra gleichnisa,
mitt iahra nix-nutzichi, fremdi abgettah?”
20“Di eahn is fabei,” sawwa di leit,
“da summah is ivvah,
un miah henn kenn hilf grikt.”
21Mei hatz is fabrocha,
veil mei leit fabrocha sinn;
ich heil, un mei hatz is engshtlich.
22Hott's nix in Gilead fa salba?
Is kenn doktah datt?
So favass voahra mei leit nett kayld?
Currently Selected:
Jeremia 8: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible