Jesoiya 63
63
Es 63. Gabiddel.
Da Shtrohf Funn Edom Un Di Heida
1Veah is dess es am kumma is funn Edom,
funn Bozra, mitt sei rohdi glaydah?
Veah is dess mitt feini glaydah,
am fassich dredda mitt grohsi graft un gvald?
“Es is mich, sellah es shvetzt in gerechtichkeit,
un es mechtich is fa helfa.”
2Favass sinn dei glaydah roht,
es vi ebbah es am di vei-press dredda is?
3“Ich habb laynich di vei-press gedredda;
nimmand unnich di heida voah bei miah.
Ich habb si fadredda in meim zann,
un si fashtambt veil ich bays voah;
iahra bloot is ivvah mei glaydah kshpritzt,
un hott awl mei glaydah blakkich gmacht.
4Da dawk fa shtrohfa voah in meim hatz,
un's yoah fa frei macha is do.
5Ich habb gegukt, avvah's voah nimmand fa helfa,
ich voah fashtaund es nimmand miah bei-kshtanna hott;
so hott mei ayknah oahm miah ivvah-hand gevva,
mei zann hott miah graft gevva.
6Ich habb di heida fashtambt veil ich bays voah;
in meim zann habb ich si ksoffa gmacht
un habb iahra bloot uf da bodda gleaht.”
Droh Denka Am Hah Sei Bamhatzichkeit
7Ich zayl shvetza veyyich em Hah sei shtandhaftichi-leevi,
veyyich di sacha es eah glohbt sei soll difoah,
un veyyich alles es da Hah gedu hott fa uns—
eah hott feel goodi sacha gedu
fa's haus funn Israel,
veil eah gnawt un bamhatzichkeit katt hott fa si.
8Eah hott ksawt, “Yau, si sinn mei leit,
kinnah es nett falsh sei zayla zu miah.”
Un so is eah iahra Heiland vadda.
9In awl iahra leides, hott eah aw glidda,
un da engel fumm Hah hott si aus di kfoah gnumma.
In sei leevi un bamhatzichkeit hott eah si frei ksetzt;
eah hott si uf kohva un si gedrawwa,
di gans zeit in di alda dawwa.
10Avvah si henn sich kshteibaht
un henn sei Heilichah Geisht bedreebt.
So hott eah sich gedrayt un is iahra feind vadda,
un hott geyyich si kfochta.
11Sei leit henn no an di alda dawwa gedenkt,
di dawwa fumm Mosi un sei leit—
vo is sellah es si deich da say gebrocht hott
mitt em shohf-heedah funn sei drubb?
Vo is sellah es sei Heilichah Geisht
unnich si gedu hott,
12Sellah es sei hallichah oahm mitt graft kshikt hott
fa am Mosi sei rechtsi hand sei,
sellah es di vassahra kshpalda hott fannich eena,
fa sich en ayvichah nohma macha,
13sellah es si deich's deefa kfiaht hott?
Vi en gaul in di vildahnis,
sinn si nett kshtolbaht;
14vi's fee es nunnah in's deich gayt,
hott da Geisht fumm Hah eena roo gevva.
Dess is vi du dei leit kfiaht hosht
so es du diah en hallichah nohma machsht.
En Gebayt Fa Bamhatzichkeit Un Hilf
15Gukk runnah fumm himmel un sayn uns
funn deim heilichah un hallichah voon-blatz.
Vo is dei eahnsht un macht?
Dei vayyich hatz un bamhatzichkeit
vadda zrikk kohva funn uns.
16Avvah du bisht unsah Faddah;
da Abraham vayst nix funn uns,
un da Israel kend uns nett,
doch, du bisht unsah Faddah, oh Hah,
“Unsah Frei-Shtellah” is dei nohma funn lang zrikk.
17Favass, oh Hah, machsht du uns vekk lawfa funn deim vayk,
un machsht unsah hatza hatt
so es miah dich nett firchta?
Kumm zrikk fa's goot funn dei gnechta,
un dei shtamma es dei eahbshaft sinn.
18Dei heilichi leit henn dei tempel gaygend
fa en katzi zeit,
avvah nau henn unsah feinda
dei tempel nunnah kshtambt.
19Miah sinn vadda vi selli es du
nee nett groold hosht,
vi selli es nee nett gnohmd voahra bei deim nohma.
Currently Selected:
Jesoiya 63: pdcB
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
