Hosea 4
4
Es 4. Gabiddel.
Gott Pshuldicht Israel
1Heichet zumm Hah sei vatt, diah Kinnah-Israel,
fa da Hah hott en shuld zu bringa
geyyich eich es im land voona:
“Es is kenn shtandhaftichkeit, leevi
adda bekendnis funn Gott im land.
2Avvah fluches, leeyes, maddahrei, shtayles un aybreches
hott ivvah-hand gnumma.
Un bloot-fageeses kumd ayns noch em anra.
3Deich dess dutt's land yammahra,
un's gayt shlecht fa awl selli es drinn voona;
un awl di diahra im feld un di fekkel in di luft,
un di fish im say vadda vekk gnumma.
4Doch loss nimmand en shuld finna,
ay mann soll da annah nett pshuldicha,
fa eiyah leit sinn vi selli
es da preeshtah fashuldicha.
5Fasell shtolbahsht du dawk un nacht,
un di brofayda shtolbahra mitt diah,
un so zayl ich dei maemm umbringa.
6Mei leit gayn unnah veil si nett gland sinn.
Veil du lanning nunnah gedrayt hosht,
dann dray ich dich aw nunnah fa mei preeshtah sei.
Veil du's ksetz funn dei Gott fa'acht hosht
dann fa'acht ich aw dei kinnah.
7Vi may preeshtah es es voahra,
vi may es si ksindicht henn
geyyich mich;
ich mach iahra hallichkeit zu shohm.
8Si feedra sich uf di sind-opfahra funn mei leit,
un gleicha iahra ungettlichkeit.
9Es soll sei mitt di leit vi mitt di preeshtah.
Ich zayl si awl zvay shtrohfa fa iahra vayya,
un si zrikk betzawla fa vass si doon.
10Si zayla essa un nett satt sei,
huahrahrei dreiva un sich nett fameahra,
veil si kshtobt henn da Hah achta.
11Huahrahrei, vei un neiyah vei
hott iahra fashtand vekk gnumma.
12Mei leit frohwa en holsich gleichnis,
un greeya iahra andvat bei en holsichah shtekka.
En geisht funn huahrahrei fafiaht si,
un mitt iahra huahrahrei lawfa si vekk funn iahra Gott.
13Si macha opfahra uf di berga,
un brenna insens uf di hivla,
unnich di aycha, babla un boocha baym,
vo da shadda blesiahlich is.
Fasell zayla eiyah mayt huahrahrei dreiva
un eiyah shviah-dochtahra brecha di ay.
14Ich zayl eiyah mayt nett shtrohfa
vann si huahrahrei dreiva,
un aw nett eiyah shviah-dochtahra
vann si di ay brecha.
Fa di mennah selvaht gayn mitt di huahra,
un opfahra mitt di tempel-huahra—
leit es nett fashtay doon kumma zu nix.
15Even vann du huahrahrei dreibsht, oh Israel,
loss nett Juda aw shuldich vadda.
Gaynd nett noch Gilgal
un gaynd nett nuff an Beth-Aven.
Doond nett shveahra,
‘So shuah es da Hah laybt!’
16Israel is dikk-kebbich,
un shteibahrich vi en rind.
So kann da Hah si nau vayda
vi en lamm in en grohs feld?
17Da Ephraim hott sich zu abgettah gedrayt;
loss een yusht gay!
18Even vann si moll aus drinkes sinn,
dann halda si oh huahrahrei dreiva;
iahra evvahshti henn blesiah in shanda ausdrawwa.
19Da vind vikkeld si uf in sei flikkel,
un iahra opfahra bringa eena shohm.”
Currently Selected:
Hosea 4: pdcB
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved. Pennsylvania Dutch Audio Bible Ⓟ 2022, Jacob Tice.
Learn More About Pennsylvania Dutch Bible
