2. Mosi 6

Es 6. Gabiddel.

Da Hah Fashprecht Fa Israel Frei Macha

1No hott da Hah zumm Mosi ksawt, “Nau zaylsht du sayna vass ich du zayl zumm Pharao, fa deich mei shteiki hand muss eah si gay lossa, un deich mei shteiki hand muss eah si aus sei land dreiva.”

2Gott hott noch veidah kshvetzt zumm Mosi un hott ksawt, “Ich binn da Hah.

3Un ich habb mich gvissa zumm Abraham, zumm Isaac un zumm Jakob es da Awlmechtich Gott. Avvah bei meim nohma, ‘Hah,’ havvich mich nett vissa glost zu eena.

4Ich habb aw mei bund gmacht mitt eena fa eena's land Kanaan gevva, datt vo si gvoond henn vi fremdi.

5Ich habb aw's yammahres keaht funn di Kinnah-Israel, dee vo di Egyptah gebunna halda, un ich habb mei bund nett fagessa.

6Fa sell, sawk zu di Kinnah-Israel, ‘Ich binn da Hah, un ich zayl eich unnich em blohk funn di Egyptah raus bringa un zayl eich frei macha so es si nimmi ivvah eich sinn. Ich zayl eich aw frei shtella mitt en auskshtrektah oahm un mitt grohsi richta.

7Ich nemm eich fa mei leit sei, un ich zayl eiyah Gott sei. No sellet diah vissa es ich da Hah eiyah Gott binn es eich unnich em yoch funn di Egyptah raus gebrocht hott.

8Ich zayl eich in's land bringa es ich kshvoahra habb fa gevva zumm Abraham, em Isaac un em Jakob, un ich gebb's zu eich es diah's aykna doond. Ich binn da Hah.’”

9Da Mosi hott so ksawt zu di Kinnah-Israel, avvah si henn een nett abkeicht veil's eena falayt voah veyya iahra haddi eahvet.

10No hott da Hah kshvetzt zumm Mosi un hott ksawt,

11“Gay un sawk em Pharao, da kaynich funn Egypta, es eah soll di Kinnah-Israel aus sei land gay lossa.”

12Avvah da Mosi hott ksawt zumm Hah, “Gukk moll, di Kinnah-Israel henn mich nett abkeicht, vi dann zayld da Pharao mich abheicha, siddah es ich nett goot binn am shvetza?”

13No hott da Hah kshvetzt zumm Mosi un zumm Aaron un hott eena en gebott gevva fa di Kinnah-Israel un fa da Pharao, da kaynich funn Egypta, es si di Kinnah-Israel aus em land funn Egypta bringa sella.

14Dess sinn di evvahshti funn iahra foah-feddah iahra families:

Di kinnah fumm Ruben, da eahsht-geboahra fumm Israel, voahra da Henoch, da Pallu, da Hezron, un da Charmi. Sell sinn di family kshlechtah fumm Ruben.

15Di kinnah fumm Simeon voahra da Jemuel, da Jamin, da Ohad, da Jachin, da Zohar un da Saul, da sohn funn en Kanaaniddishi fraw. Sell sinn di family kshlechtah fumm Simeon.

16Dess sinn di nayma funn di kinnah fumm Levi un iahra nohch-kummashaft: da Gerson, da Kahath un da Merari. Da Levi hott'n hunnaht un drei un sivvatzich yoah glaybt.

17Di kinnah fumm Gerson bei iahra kshlechtah voahra da Libni un da Simei.

18Di kinnah fumm Kahath voahra da Amram, da Izhar, da Hebron un da Usiel. Da Kahath hott'n hunnaht un drei un dreisich yoah glaybt.

19Di kinnah fumm Merari voahra da Maheli un da Musi.

Sell sinn di kshlechtah fumm Levi bei iahra nohch-kummashaft.

20Da Amram hott sei faddah sei shveshtah di Jochebed keiyaht. Da Mosi un da Aaron voahra geboahra funn iahra fa een. Da Amram hott'n hunnaht un sivvana dreisich yoah glaybt.

21Di kinnah fumm Izhar voahra da Korah, da Nepheg un da Sichri.

22Di kinnah fumm Usiel voahra Misael, da Elzaphan un da Sithri.

23Da Aaron hott di Elisheba, di dochtah fumm Amminidab, di shveshtah fumm Naheshon, keiyaht. Eah hott da Nadab, da Abihu, da Eleasar un da Ithamah katt bei iahra.

24Di kinnah fumm Korah voahra da Assir, da Elkana un da Abiasaph. Sell sinn di kshlechtah funn di Korahiddah.

25Em Aaron sei boo da Eleasar hott ayns fumm Putiel sei mayt keiyaht, un eah hott da Pinehas katt bei iahra. Sell sinn di evvahshti funn di Lefiddish families bei iahra kshlechtah.

26Es voah deah gleichlich Mosi un Aaron es da Hah ksawt hott ditzu, “Bringet di Kinnah-Israel aus em land funn Egypta vi si fadayld sinn bei kshlechtah.”

27Si voahra selli es kshvetzt henn zumm Pharao, da kaynich funn Egypta veyyich di Kinnah-Israel aus Egypta bringa. Sell voah deah gleichlich Mosi un da Aaron.

28Nau uf em dawk es da Hah kshvetzt hott zumm Mosi im land Egypta,

29hott eah ksawt zu eem, “Ich binn da Hah. Sawk em Pharao, da kaynich funn Egypta, alles es ich diah sawk.”

30Avvah da Mosi hott ksawt fannich em Hah, “Gukk moll, ich binn nett goot am shvetza, vi soll da Pharao mich abheicha?”

Currently Selected:

2. Mosi 6: pdcB

Highlight

Copy