Romans 7
7
Di Laa no gat no muo powa uova wi now
1Bredrin, Ah nuo seh unu aredy andastan weh Ah gwain taak bout, bikaaz unu nuo weh di Laa seh. Dah chruut, dat Laa gat powa uova wan porsn az lang az dah porsn deh liv. 2Dah laik dis: Di Laa seh wan marid uman hafy liv wid ihn hozban az lang az ihn deh liv, bot if ihn hozban ded, den di uman frii fahn dah Laa. 3So den, if di uman go, go liv wid wan nada man wail ihn hozban stil deh liv, di pipl dem gwain seh dah uman deh liv iina sin, bikaaz ihn brok di Laa. Bot if ihn hozban ded, di uman frii fahn dah Laa, ahn ihn kyan go marid tu wan nada man; ahn if ihn du dat, ihn no deh liv iina sin ataal. 4Ahn dat dah di siem wie wid unu, bredrin, bikaaz unu don ded tu di Laa tu. Ahn dah Laa no gat non powa uova unu no muo wen unu ded wid Christ pahn di kraas. Weh Ah miin dah now unu dah fi Him weh God wehn mek riez'op bak fahn di ded fi liv agen. Ahn dat dah how wi kyan du plenty gud tingz fi sorv di Laad. 5Now, di Laa yuuztu stuor wi op fi du aal kain a bad tingz, weh wi bady wehn kaal fah fi wi du. Ahn demde bad tingz weh put wi pahn wan ruod big nof fi ker wi tu distrokshan! 6Bot now wi frii fahn di Laa, bikaaz wi don ded wid Christ. Ahn di Laa weh yuuztu gat wi tai op laik prizna, now no gat no muo powa uova wii. So, wi no deh sorv God iina di uol wie weh dehn rait dong iina di Laa fi tel wi weh fi du. Wii deh sorv God iina di nyuu wie how di Holy Spirit help wi fi liv!
Di Laa weh Moses gi wi, shuo wi, fi wi sin dem
7Wel den, weh wi fi seh? Di Laa sin? Nuo sah! Di Laa no sin ataal, bikaaz Ah wudn nuo weh dah sin, if di Laa neva shuo mi. Ah wudn nuo seh ih no rait fi waahn somting weh sombady els gat, if di Laa neva seh, “Unu no fi groj notn weh sombady els gat.” 8Bot, wen di Laa seh Ah no fi groj notn weh sombady els gat, sin gat di chaans fi mek Ah waahn demde tingz weh dah no fi mi! So, if non Laa neva deh, den sin neva wehn gwain gat non powa ataal; ih wehn gwain ded!
9Now, Ah yuuztu liv bitout nuo weh di Laa seh. Bot, wen Ah kom fi nuo di Laa, di sin weh deh iina mi jomp op fi liv iina mi, ahn dat mek Ah waahn sin bad, 10ahn Ai ded! Weh a miin fi seh, dah di komaanment weh wehn deh fi gi mi laif, don mek det kom fi mii insted! 11Di Laa mek sin kom ahn get di chaans fi trik mi, ahn dah di Laa weh sin tek fi kil mi.
12So den, bredrin, laik Ah wehn seh: di Laa kom fahn God ahn ih huoly, ih rait, ahn ih gud! 13Bot dat miin seh di Laa weh gud, mek Ah ded, den? Neva! Di Laa neva du dat. Dah sin ihself du dat. Sin tek di Laa weh gud fi kil mi, so dat aala wi pipl gwain nuo jos weh dah sin, bikaaz di Laa seh wi no fi sin. Ahn dat mek sin muo wosa an eva.
Di fait iinsaida wi
14Wi nuo seh di Laa kom fahn God spirit. Di trobl dah no wid di Laa, bot dah wid mii weh dah hyuuman. Ahn mii dah wan porsn weh dah wan sliev tu sin. 15Laik, Ah no andastan demde tingz weh Ah deh du, bikaaz Ah no du weh Ah waahn du. Insida dat, Ah deh du aal di tingz weh Ah hiet fi du! 16Ahn sins Ah du weh Ah no waahn du, mi kanshans shuo mi seh, Ai grii seh di Laa rait! 17So, Ah no du demde bad tingz; dah di sin weh deh iina mi haat, mek Ah du dem! 18Bikaaz Ah gat wan sinful nietyo, Ai aalwiez gwain sin iina mi sinful haat. So den, iivn duo Ah waahn du weh gud, Ah kyaahn du'ih. 19Dis dah weh hapm: Ah no du di gud weh Ah waahn du, ahn di bad weh Ah no waahn du, dah dat Ah du! 20Bot, if Ah du weh Ah no waahn du, dat miin seh dah no mii dah di wan weh du'ih. Dah di sin weh deh iina mi —mi sinful nietyo— weh du'ih!
21So den, dis dah weh Ai fain iina mi laif: Wen Ah waahn du rait, Ah end'op deh du bad. 22Bot iina mi haat Ai hapy wid di Laa weh kom fahn God. 23Bot Ah si seh mi bady deh fala wan difrent laa; ih deh fait gens di Laa iina mi main. Dat mek Ah bii laik wan prizna tu di laa weh mi bady deh fala, weh deh mek Ah sin. 24Puor mii! Ah so mizarabl! Dah huu gwain frii mi fahn weh dis bady waahn Ah du —dis bady weh det deh kanchruol? 25Tank God! Di ansa dah Jesus Christ, wi Laad, weh gwain frii mi!
So den, dis dah how Ah stan now: iina mi main, Ah gwain sorv God ahn fala ihn Laa, wail mi hyuuman nietyo mek Ah bii wan sliev tu sin.
Currently Selected:
Romans 7: NTIC
Highlight
Copy
Compare
Share
Want to have your highlights saved across all your devices? Sign up or sign in
The New Testament in Islander Creole © Sociedad Bíblica Colombiana and © Wycliffe Bible Translators, Inc., 2015.
Romans 7
7
Di Laa no gat no muo powa uova wi now
1Bredrin, Ah nuo seh unu aredy andastan weh Ah gwain taak bout, bikaaz unu nuo weh di Laa seh. Dah chruut, dat Laa gat powa uova wan porsn az lang az dah porsn deh liv. 2Dah laik dis: Di Laa seh wan marid uman hafy liv wid ihn hozban az lang az ihn deh liv, bot if ihn hozban ded, den di uman frii fahn dah Laa. 3So den, if di uman go, go liv wid wan nada man wail ihn hozban stil deh liv, di pipl dem gwain seh dah uman deh liv iina sin, bikaaz ihn brok di Laa. Bot if ihn hozban ded, di uman frii fahn dah Laa, ahn ihn kyan go marid tu wan nada man; ahn if ihn du dat, ihn no deh liv iina sin ataal. 4Ahn dat dah di siem wie wid unu, bredrin, bikaaz unu don ded tu di Laa tu. Ahn dah Laa no gat non powa uova unu no muo wen unu ded wid Christ pahn di kraas. Weh Ah miin dah now unu dah fi Him weh God wehn mek riez'op bak fahn di ded fi liv agen. Ahn dat dah how wi kyan du plenty gud tingz fi sorv di Laad. 5Now, di Laa yuuztu stuor wi op fi du aal kain a bad tingz, weh wi bady wehn kaal fah fi wi du. Ahn demde bad tingz weh put wi pahn wan ruod big nof fi ker wi tu distrokshan! 6Bot now wi frii fahn di Laa, bikaaz wi don ded wid Christ. Ahn di Laa weh yuuztu gat wi tai op laik prizna, now no gat no muo powa uova wii. So, wi no deh sorv God iina di uol wie weh dehn rait dong iina di Laa fi tel wi weh fi du. Wii deh sorv God iina di nyuu wie how di Holy Spirit help wi fi liv!
Di Laa weh Moses gi wi, shuo wi, fi wi sin dem
7Wel den, weh wi fi seh? Di Laa sin? Nuo sah! Di Laa no sin ataal, bikaaz Ah wudn nuo weh dah sin, if di Laa neva shuo mi. Ah wudn nuo seh ih no rait fi waahn somting weh sombady els gat, if di Laa neva seh, “Unu no fi groj notn weh sombady els gat.” 8Bot, wen di Laa seh Ah no fi groj notn weh sombady els gat, sin gat di chaans fi mek Ah waahn demde tingz weh dah no fi mi! So, if non Laa neva deh, den sin neva wehn gwain gat non powa ataal; ih wehn gwain ded!
9Now, Ah yuuztu liv bitout nuo weh di Laa seh. Bot, wen Ah kom fi nuo di Laa, di sin weh deh iina mi jomp op fi liv iina mi, ahn dat mek Ah waahn sin bad, 10ahn Ai ded! Weh a miin fi seh, dah di komaanment weh wehn deh fi gi mi laif, don mek det kom fi mii insted! 11Di Laa mek sin kom ahn get di chaans fi trik mi, ahn dah di Laa weh sin tek fi kil mi.
12So den, bredrin, laik Ah wehn seh: di Laa kom fahn God ahn ih huoly, ih rait, ahn ih gud! 13Bot dat miin seh di Laa weh gud, mek Ah ded, den? Neva! Di Laa neva du dat. Dah sin ihself du dat. Sin tek di Laa weh gud fi kil mi, so dat aala wi pipl gwain nuo jos weh dah sin, bikaaz di Laa seh wi no fi sin. Ahn dat mek sin muo wosa an eva.
Di fait iinsaida wi
14Wi nuo seh di Laa kom fahn God spirit. Di trobl dah no wid di Laa, bot dah wid mii weh dah hyuuman. Ahn mii dah wan porsn weh dah wan sliev tu sin. 15Laik, Ah no andastan demde tingz weh Ah deh du, bikaaz Ah no du weh Ah waahn du. Insida dat, Ah deh du aal di tingz weh Ah hiet fi du! 16Ahn sins Ah du weh Ah no waahn du, mi kanshans shuo mi seh, Ai grii seh di Laa rait! 17So, Ah no du demde bad tingz; dah di sin weh deh iina mi haat, mek Ah du dem! 18Bikaaz Ah gat wan sinful nietyo, Ai aalwiez gwain sin iina mi sinful haat. So den, iivn duo Ah waahn du weh gud, Ah kyaahn du'ih. 19Dis dah weh hapm: Ah no du di gud weh Ah waahn du, ahn di bad weh Ah no waahn du, dah dat Ah du! 20Bot, if Ah du weh Ah no waahn du, dat miin seh dah no mii dah di wan weh du'ih. Dah di sin weh deh iina mi —mi sinful nietyo— weh du'ih!
21So den, dis dah weh Ai fain iina mi laif: Wen Ah waahn du rait, Ah end'op deh du bad. 22Bot iina mi haat Ai hapy wid di Laa weh kom fahn God. 23Bot Ah si seh mi bady deh fala wan difrent laa; ih deh fait gens di Laa iina mi main. Dat mek Ah bii laik wan prizna tu di laa weh mi bady deh fala, weh deh mek Ah sin. 24Puor mii! Ah so mizarabl! Dah huu gwain frii mi fahn weh dis bady waahn Ah du —dis bady weh det deh kanchruol? 25Tank God! Di ansa dah Jesus Christ, wi Laad, weh gwain frii mi!
So den, dis dah how Ah stan now: iina mi main, Ah gwain sorv God ahn fala ihn Laa, wail mi hyuuman nietyo mek Ah bii wan sliev tu sin.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
The New Testament in Islander Creole © Sociedad Bíblica Colombiana and © Wycliffe Bible Translators, Inc., 2015.