1 Corinthians 14
14
Iḷisaurrutivsaat Ilitqusiġiksuam Aitchuutiŋigun
1Piviuttaqsriñiq allanik iñuŋnik kipiġniuġutigiłhaaqsiuŋ supayaamiñ. Aasiisuli kipiġniuġutigipiaġmiḷugich aitchuutiŋi Ilitqusiġiksuam, kipiġniuġutigiłhaaġlugu aitchuusiaqaġniq uqaqtauniġmik God-mun. 2Qanuq iñuk uqaqtuaq uqautchimik nalukkaġmiñik uqaqtuq God-mun, uqautiŋitkai iñuich, qanuq iñuum kialiqaa kaŋiqsiḷaitkaa, uqaqtiłługu Ilitqusiġiksuam kaŋiqsiñaitchuamik uqautchimik. 3Aglaalli iñuk uqaqtauruaq God-mun kaŋiqsiñaqtuamik uqaqłuni suaŋasiḷaaġiruq iñuich ukpiġutiŋiññik, qapiŋaisaaqługiḷḷu suli arakługich. 4Iñuk uqaqtuaq kaŋiqsiñaitchuamik uqautchimik nalukkaġmiñik, suaŋasiḷaaqtuq inmiñun, aglaalli uqaqtauruam God-mun suaŋasiḷaaġai aŋaiyyuliqiruat.
5Tavra paŋmapak iluqasi uqaqugivsi allauruanik uqautchiñik. Aglaan kipiġniuttaġiłhaaġiga uqaqtautquyumavlusi God-mun. Iñuk uqaqtauruaq God-mun kaŋiqsiñaqtuakun uqautchikun kamanałhaaqtuq iñuŋmiñ uqaqtuamiñ kaŋiqsiñaitchuamik uqautchimik, iñuŋmik mumiksaqtiqaŋisuaqpan, aŋaiyyuliqiruat ukpiġutaat suaŋasiḷaaġumiñaġlugu. 6Aniqatiit, ullakkuvsi iḷaanni aasii uqaaqsiḷuŋa allauruanik uqautchiñik nalukkavsiññik, anniqsuġayaitkivsi. Aglaan uvaŋa puttuqsripkaġupku ilivsiññun iḷaŋaunnii iḷumun ittuam, naaggaqaa iḷitchuġipkaġlusi iḷumun ittuamik, naaggaunnii alġaqsruiḷuŋa naagga iḷisaurriḷuŋa ilivsiññik, anniqsuusiaqaġniaġaluaqtusi. 7Uvva uuktuun. Iñuich atuqtuuraġniḷuŋmata atuqtuurayuiḷḷaġmiŋ suvluaqtuġnanik naagga nuqaqtiliŋnik atuqtuuranik, iñuich naalaġniruat iḷisaġiyumiñaitkaat iġiñaŋa atuutim. 8Aasiisuli aŋuyaktim atuqtuuraŋa nivliqpan nalupqinaqtuamik nipimik, allat aŋuyaktit upisalakkumiñaitchut aŋuyaksaġlutiŋ. 9Tainnainmiuq ilivsiññun uqaġuvsi kaŋiqsiñaitchuanik uqautchiñik iñuum kialiqaa kaŋiqsiyumiñaiñmigaasi. Siḷałhiñamun uqaġmatun piñiaqtusi. 10Nalupqinaitchuamik iñugiaktuat allakaaġiich uqautchich nunamiitkaluaqtut, aasii nalliat-unnii sivunġiñŋitchuq. 11Aglaan uvaŋa kaŋiqsiḷaitkupku iñuk uqaqtuaq uqayuiḷauniaqtuq uvamnun, suli taamna uvaŋaptauq ilaanun. 12Tainnatuttauq ilivsi. Kipiġniuqtuagukavsi piqaġumapiaqłusi Ilitqusiġiksuam aitchuutiŋiñik, apiqsrivigisiuŋ aitchuusiaqaġuglusi nakuuniqsrauruanik, tamatkuniŋa aitchuusianik anniqsuutauyumiñaqtuanik aŋaiyyuliqiruanun.
13Tavra iñuk uqaqtuaq nalukkaġmigun uqausikun aŋaiyyuruksrauruq mumiḷḷasuglugu uqausiġikkani. 14Qanuq aŋaiyyuguma nalukkapkun uqausikun, ilitqusiġa aŋaiyyugaluaqtuq aglaan kaŋiqsiŋitkiga qanuq uqaqtilaaġa. 15Tavraasii qanuġniaġniqpik? Aŋaiyyuniaqtuŋa uqautchikun nalukkapkun, suli aŋaiyyuniaġmiuŋa iḷisimakkapkun uqausikun. Atuġniaġmiuŋa iluqaakkun nalukkapkullu, iḷisimakkapkullu uqautchikkun. 16Aŋaiyyuguvsi nanġaiguvsiḷu sivuġaanni aŋaiyyuruat kaŋiqsiñaitchuakun uqautchikun, tamatkua kaŋiqsiŋitchuat Amen-chumiñaitkaat aŋaiyyutiksi quyyan, qanuq nalurut sunik uqaqtilaavsiññik. 17Ilivsi quyyavigilluataġugnaġaluaġiksi God, aglaan allat anniqsuusiaqaġniaŋitchut. 18Quyyavigigiga God uqallakama uqautchiñik naluraiññik iñuich qaaŋiqł̣ugu iluqasi uqallaniqsi. 19Aglaan itqataukama aŋaiyyuruani, uqaġummatiqałhaaqtuŋa tallimatualuŋnik uqaluŋnik kaŋiqsiñaqtuakun uqausipkun, 10,000-niñ uqaluŋniñ kaŋiqsiñaitchuakun uqaġniġmiñ.
20Aniqatiit, miqłiqtutun kaŋiqsisiqaġnasi Ilitqusiġiksuam aitchuutiŋigun, aglaan irrusiqaġitchi iñuguaksraiŋaruatun. Aglaattauq, ittitchi miqłiqtuuratun kaŋiqsisivsiññi pigiitchuamik. 21#Is 28.11, 12.Bible-ni aglausimaruq Ataniq uqallaŋanivḷugu inna,
“Uqautiniaġitka iñutka atuġluŋa
iñuŋnik uqausiqaqtuanik allakanik uqautchiñik,
allaniḷḷu nunaniŋŋaqtanik,
naaggasuli kamaginiaŋiñmigaanŋa,
uvaŋa Ataniq uqaqtuŋa.”
22Taavrumuuna iḷitchuġirugut kaŋiqsiñaitchuat uqautchich nalunaiñŋutautilaaŋannik God-im suaŋŋataanun ukpiŋaitchuanun sivuniqaqługu. Taamna nalunaiñŋutauŋitchuq ukpiqtuanun. Aasiiḷi uqaqtauniq God-mun kaŋiqsiñaqtuakun uqausikun anniqsuutauvluni ukpiqtuanun, ukpiŋaitchuanun anniqsuutauŋitchuq. 23Tavraasii, iluqaġmiŋ aŋaiyyuliqiruat aŋaiyyuliaqamiŋ uqarraqsikpata kaŋiqsiñaitchuanik uqautchiñik tamatkua ukpiqtuaġummaġiksiŋaitchuat ukpiŋaipiaqtuallu aŋaiyyuliaqataukpata ilivsiññun, isumaniaqtut iluqasi kinnaġuġasugalusi. 24Aglaan iluqasi uqaqtauguvsi God-mun kaŋiqsiñaqtuakun uqautchikun, ukpiŋaitchuaq naagga ukpilimmaġiksiŋaitchuaq aŋaiyyuliaġumi, qanuqpisiiḷḷirauniaqtuq piḷuunmigun ukpiliqsuksrauluni, 25ilaan nalunaqtuat isummatiŋi satqummiġñiaqtut ilaanun, aasii pulluni aŋaiyyuviginiaġaa God, aasii uqallausiġilugu God iḷumun akunnavsiññiinniḷugu.
Pialaŋirrun Aŋaiyyuviŋmi
26Qanuq uqallausiġiniaqpisigu naigḷiḷugu taavruma sivuniŋa, Aniqatiit? Aŋaiyyuliaqavsi, iñuk atuġumiñaqtuq aŋaiyyunmik, allali iḷisaurriyumiñaqtuq, allasuli quliaqtuaġumiñaqtuq God-im satqummikkaŋanik inmiñun, allali uqaġumiñaqtuq kaŋiqsiñaitchuamik uqautchimik, naagga mumiksiyumiñaqtuq uqautauruamik. Sunapayaaq piḷi iñupayaat suaŋasiḷaaqtauyumiñaqsiḷugich ukpiġunmiŋni. 27Kisulliqaa uqaqpata kaŋiqsiñaitchuamik uqautchimik, malġuulik iñugiagniqsrat pikpata piŋasutunnii apaigurut, suli aqulligiigḷutiŋ, aasii atausiq mumiksirauluni. 28Aglaan mumiksiriksraitpan, aŋaiyyuliaqavsi iluqaġmiŋ nipaisaaġlich uqaqsiññaġluni isumamiñi inmiñun God-mullu. 29Malġuk iññuk naagga piŋasut God-im uqaqtiŋi uqaġlich, aasii allat nalaunŋatilaaġlugu uqautigikkaŋat. 30Allaptauq God-im uqaqtaa aquppiruaq tamaani qanimi aitchuusiaqaqpan puttuqsripkaunmik, sivulliq uqaqqaaqtuaq aġiuli. 31Qanuq iluqasi uqaqtauyumiñaqtusi God-mun atausiullaalusi, iñuich iluqaisa iḷitchitqulugich suli iluqaisa qapiŋaisaaqtautqulugich. 32Iñuk uqaluksriusiaqaqtuaq God-miñ aŋalataġillaruq inmiñik, aasii utaqqiḷugu piviksrani, 33qanuq God pipkairuaguŋitchuq piallagniġmik aglaan atiugaġniġmik. Tamatkunatun ilaaguaqtauruatun God-mun allani inini aŋaiyyuliaqamiŋ piḷġusiatitun, 34tainnatuttauq aġnasi nipaisaaqtuksraummiut aŋaiyyuliaqavsi. Qanuq uqaqurauŋitchut, qaukłiuyummataitchuksraurut, pitqurat uqaluatitun. 35Sumigliqaa kipiġniuttaqaġumiŋ iḷisimasuglutiŋ, kaŋiqsiuġlisigik tuvaaqatitiŋ aimaaġviŋmi, qanuq kanŋunaqtuq aġnam uqaġniksraŋa aŋaiyyuliaqavsi.
36Iłuigivisiuŋ taamna? Iłuigiraksraġiŋitkiksi. God-im uqalua aguiñŋaitchuq ilivsiññiñ, suli kisivsisualuk anniqsuusiaġiŋitkiksi. 37Kiñaliqaa isummatigigumi God-mun uqaqtiginiḷuni, naagga puttuqsrisiqaqtinniḷuni Ilitqusiġiksuamun, paaqsaaŋaniaŋitkai aglaatka ilivsiññun, God-mun pitquraġiniḷugich. 38Aasii kiñaliqaa paaqsaaŋagumi, tainna kiikaa kaŋiqsisaiḷḷi. 39Tavra, aniqatiitka, kipiġniupiaġataġitchi uqaqtausugniġmun God-mun, suli pitchaiḷiñagu uqaġniq nalukkavsiññik uqautchiñik. 40Aglaan supayaat pisigik suqpanaipiaqtuakun atiugaġnikullu.
Currently Selected:
1 Corinthians 14: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
1 Corinthians 14
14
Iḷisaurrutivsaat Ilitqusiġiksuam Aitchuutiŋigun
1Piviuttaqsriñiq allanik iñuŋnik kipiġniuġutigiłhaaqsiuŋ supayaamiñ. Aasiisuli kipiġniuġutigipiaġmiḷugich aitchuutiŋi Ilitqusiġiksuam, kipiġniuġutigiłhaaġlugu aitchuusiaqaġniq uqaqtauniġmik God-mun. 2Qanuq iñuk uqaqtuaq uqautchimik nalukkaġmiñik uqaqtuq God-mun, uqautiŋitkai iñuich, qanuq iñuum kialiqaa kaŋiqsiḷaitkaa, uqaqtiłługu Ilitqusiġiksuam kaŋiqsiñaitchuamik uqautchimik. 3Aglaalli iñuk uqaqtauruaq God-mun kaŋiqsiñaqtuamik uqaqłuni suaŋasiḷaaġiruq iñuich ukpiġutiŋiññik, qapiŋaisaaqługiḷḷu suli arakługich. 4Iñuk uqaqtuaq kaŋiqsiñaitchuamik uqautchimik nalukkaġmiñik, suaŋasiḷaaqtuq inmiñun, aglaalli uqaqtauruam God-mun suaŋasiḷaaġai aŋaiyyuliqiruat.
5Tavra paŋmapak iluqasi uqaqugivsi allauruanik uqautchiñik. Aglaan kipiġniuttaġiłhaaġiga uqaqtautquyumavlusi God-mun. Iñuk uqaqtauruaq God-mun kaŋiqsiñaqtuakun uqautchikun kamanałhaaqtuq iñuŋmiñ uqaqtuamiñ kaŋiqsiñaitchuamik uqautchimik, iñuŋmik mumiksaqtiqaŋisuaqpan, aŋaiyyuliqiruat ukpiġutaat suaŋasiḷaaġumiñaġlugu. 6Aniqatiit, ullakkuvsi iḷaanni aasii uqaaqsiḷuŋa allauruanik uqautchiñik nalukkavsiññik, anniqsuġayaitkivsi. Aglaan uvaŋa puttuqsripkaġupku ilivsiññun iḷaŋaunnii iḷumun ittuam, naaggaqaa iḷitchuġipkaġlusi iḷumun ittuamik, naaggaunnii alġaqsruiḷuŋa naagga iḷisaurriḷuŋa ilivsiññik, anniqsuusiaqaġniaġaluaqtusi. 7Uvva uuktuun. Iñuich atuqtuuraġniḷuŋmata atuqtuurayuiḷḷaġmiŋ suvluaqtuġnanik naagga nuqaqtiliŋnik atuqtuuranik, iñuich naalaġniruat iḷisaġiyumiñaitkaat iġiñaŋa atuutim. 8Aasiisuli aŋuyaktim atuqtuuraŋa nivliqpan nalupqinaqtuamik nipimik, allat aŋuyaktit upisalakkumiñaitchut aŋuyaksaġlutiŋ. 9Tainnainmiuq ilivsiññun uqaġuvsi kaŋiqsiñaitchuanik uqautchiñik iñuum kialiqaa kaŋiqsiyumiñaiñmigaasi. Siḷałhiñamun uqaġmatun piñiaqtusi. 10Nalupqinaitchuamik iñugiaktuat allakaaġiich uqautchich nunamiitkaluaqtut, aasii nalliat-unnii sivunġiñŋitchuq. 11Aglaan uvaŋa kaŋiqsiḷaitkupku iñuk uqaqtuaq uqayuiḷauniaqtuq uvamnun, suli taamna uvaŋaptauq ilaanun. 12Tainnatuttauq ilivsi. Kipiġniuqtuagukavsi piqaġumapiaqłusi Ilitqusiġiksuam aitchuutiŋiñik, apiqsrivigisiuŋ aitchuusiaqaġuglusi nakuuniqsrauruanik, tamatkuniŋa aitchuusianik anniqsuutauyumiñaqtuanik aŋaiyyuliqiruanun.
13Tavra iñuk uqaqtuaq nalukkaġmigun uqausikun aŋaiyyuruksrauruq mumiḷḷasuglugu uqausiġikkani. 14Qanuq aŋaiyyuguma nalukkapkun uqausikun, ilitqusiġa aŋaiyyugaluaqtuq aglaan kaŋiqsiŋitkiga qanuq uqaqtilaaġa. 15Tavraasii qanuġniaġniqpik? Aŋaiyyuniaqtuŋa uqautchikun nalukkapkun, suli aŋaiyyuniaġmiuŋa iḷisimakkapkun uqausikun. Atuġniaġmiuŋa iluqaakkun nalukkapkullu, iḷisimakkapkullu uqautchikkun. 16Aŋaiyyuguvsi nanġaiguvsiḷu sivuġaanni aŋaiyyuruat kaŋiqsiñaitchuakun uqautchikun, tamatkua kaŋiqsiŋitchuat Amen-chumiñaitkaat aŋaiyyutiksi quyyan, qanuq nalurut sunik uqaqtilaavsiññik. 17Ilivsi quyyavigilluataġugnaġaluaġiksi God, aglaan allat anniqsuusiaqaġniaŋitchut. 18Quyyavigigiga God uqallakama uqautchiñik naluraiññik iñuich qaaŋiqł̣ugu iluqasi uqallaniqsi. 19Aglaan itqataukama aŋaiyyuruani, uqaġummatiqałhaaqtuŋa tallimatualuŋnik uqaluŋnik kaŋiqsiñaqtuakun uqausipkun, 10,000-niñ uqaluŋniñ kaŋiqsiñaitchuakun uqaġniġmiñ.
20Aniqatiit, miqłiqtutun kaŋiqsisiqaġnasi Ilitqusiġiksuam aitchuutiŋigun, aglaan irrusiqaġitchi iñuguaksraiŋaruatun. Aglaattauq, ittitchi miqłiqtuuratun kaŋiqsisivsiññi pigiitchuamik. 21#Is 28.11, 12.Bible-ni aglausimaruq Ataniq uqallaŋanivḷugu inna,
“Uqautiniaġitka iñutka atuġluŋa
iñuŋnik uqausiqaqtuanik allakanik uqautchiñik,
allaniḷḷu nunaniŋŋaqtanik,
naaggasuli kamaginiaŋiñmigaanŋa,
uvaŋa Ataniq uqaqtuŋa.”
22Taavrumuuna iḷitchuġirugut kaŋiqsiñaitchuat uqautchich nalunaiñŋutautilaaŋannik God-im suaŋŋataanun ukpiŋaitchuanun sivuniqaqługu. Taamna nalunaiñŋutauŋitchuq ukpiqtuanun. Aasiiḷi uqaqtauniq God-mun kaŋiqsiñaqtuakun uqausikun anniqsuutauvluni ukpiqtuanun, ukpiŋaitchuanun anniqsuutauŋitchuq. 23Tavraasii, iluqaġmiŋ aŋaiyyuliqiruat aŋaiyyuliaqamiŋ uqarraqsikpata kaŋiqsiñaitchuanik uqautchiñik tamatkua ukpiqtuaġummaġiksiŋaitchuat ukpiŋaipiaqtuallu aŋaiyyuliaqataukpata ilivsiññun, isumaniaqtut iluqasi kinnaġuġasugalusi. 24Aglaan iluqasi uqaqtauguvsi God-mun kaŋiqsiñaqtuakun uqautchikun, ukpiŋaitchuaq naagga ukpilimmaġiksiŋaitchuaq aŋaiyyuliaġumi, qanuqpisiiḷḷirauniaqtuq piḷuunmigun ukpiliqsuksrauluni, 25ilaan nalunaqtuat isummatiŋi satqummiġñiaqtut ilaanun, aasii pulluni aŋaiyyuviginiaġaa God, aasii uqallausiġilugu God iḷumun akunnavsiññiinniḷugu.
Pialaŋirrun Aŋaiyyuviŋmi
26Qanuq uqallausiġiniaqpisigu naigḷiḷugu taavruma sivuniŋa, Aniqatiit? Aŋaiyyuliaqavsi, iñuk atuġumiñaqtuq aŋaiyyunmik, allali iḷisaurriyumiñaqtuq, allasuli quliaqtuaġumiñaqtuq God-im satqummikkaŋanik inmiñun, allali uqaġumiñaqtuq kaŋiqsiñaitchuamik uqautchimik, naagga mumiksiyumiñaqtuq uqautauruamik. Sunapayaaq piḷi iñupayaat suaŋasiḷaaqtauyumiñaqsiḷugich ukpiġunmiŋni. 27Kisulliqaa uqaqpata kaŋiqsiñaitchuamik uqautchimik, malġuulik iñugiagniqsrat pikpata piŋasutunnii apaigurut, suli aqulligiigḷutiŋ, aasii atausiq mumiksirauluni. 28Aglaan mumiksiriksraitpan, aŋaiyyuliaqavsi iluqaġmiŋ nipaisaaġlich uqaqsiññaġluni isumamiñi inmiñun God-mullu. 29Malġuk iññuk naagga piŋasut God-im uqaqtiŋi uqaġlich, aasii allat nalaunŋatilaaġlugu uqautigikkaŋat. 30Allaptauq God-im uqaqtaa aquppiruaq tamaani qanimi aitchuusiaqaqpan puttuqsripkaunmik, sivulliq uqaqqaaqtuaq aġiuli. 31Qanuq iluqasi uqaqtauyumiñaqtusi God-mun atausiullaalusi, iñuich iluqaisa iḷitchitqulugich suli iluqaisa qapiŋaisaaqtautqulugich. 32Iñuk uqaluksriusiaqaqtuaq God-miñ aŋalataġillaruq inmiñik, aasii utaqqiḷugu piviksrani, 33qanuq God pipkairuaguŋitchuq piallagniġmik aglaan atiugaġniġmik. Tamatkunatun ilaaguaqtauruatun God-mun allani inini aŋaiyyuliaqamiŋ piḷġusiatitun, 34tainnatuttauq aġnasi nipaisaaqtuksraummiut aŋaiyyuliaqavsi. Qanuq uqaqurauŋitchut, qaukłiuyummataitchuksraurut, pitqurat uqaluatitun. 35Sumigliqaa kipiġniuttaqaġumiŋ iḷisimasuglutiŋ, kaŋiqsiuġlisigik tuvaaqatitiŋ aimaaġviŋmi, qanuq kanŋunaqtuq aġnam uqaġniksraŋa aŋaiyyuliaqavsi.
36Iłuigivisiuŋ taamna? Iłuigiraksraġiŋitkiksi. God-im uqalua aguiñŋaitchuq ilivsiññiñ, suli kisivsisualuk anniqsuusiaġiŋitkiksi. 37Kiñaliqaa isummatigigumi God-mun uqaqtiginiḷuni, naagga puttuqsrisiqaqtinniḷuni Ilitqusiġiksuamun, paaqsaaŋaniaŋitkai aglaatka ilivsiññun, God-mun pitquraġiniḷugich. 38Aasii kiñaliqaa paaqsaaŋagumi, tainna kiikaa kaŋiqsisaiḷḷi. 39Tavra, aniqatiitka, kipiġniupiaġataġitchi uqaqtausugniġmun God-mun, suli pitchaiḷiñagu uqaġniq nalukkavsiññik uqautchiñik. 40Aglaan supayaat pisigik suqpanaipiaqtuakun atiugaġnikullu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)