Loina Kanaveluqa 4

Mosese me Isileli ivonedi Iave inavekimataneni

1Mosese me Isileli ivonedi ivo, “Me Isileli kwaivevaneneqa-vekavekai, loina matatabuna avonevonemi kwaivekimatanedi, kavagi komi meyawaimi kwaimiamia we kwainaqo pwayapwayanina Iave tubudavo di Yaubada ivelevelemi waineye kwailugu kwaikewai mipwayapwaya. 2Iave mi Yaubada naloinavo avonevonemi, ge kwaikavesulaidi wete ge kwaikewayavuledi kaia kwaivekimatanedimo.”

6“Loinanidiavo kwaivekimatanedi kavagi kabaloina tupwaidiavo minuauya wete minuakawananaqai inakisedi giamaidi. Tutuyanina loinanidiavo inanoqaidi inavo, ‘Mwaqitana, me Isileli kabaloina bwaigiotoqina nuanuauyadi wete tonuakawananaqai.’ 7We Iave da Yaubada vivideye beqa tutuyanina taivelaukui waineye inakaivaiseda. We ge tamo kabaloina bwaigidi o siaidi diyaubada mesaida. 8Dede loinanidiavo avonevonemi tonotonovidi wete giamaidi, we ge tamo kabaloina bwaigidi o siaidi diloina mesaida.”

32-34“Tutuyanina Iave mi Yaubada navelulunaeqa ikewaluguaqetemi Itipitaeqa, valabubuna bwaigidi wete kabanuavilele ivalabubunidi. Me Itipita taiauda paipaimi ivetalaqa veviqa bwaigina iveledi. No waineye ikewami komi natomo'otoqavo. Koya Sainai waineye kwanoqai kaikalakalata naqeneye'eqa ivesipupu waimie, we komi giladi meyawaimi. Ge tamo tutuya dede sakunidiavo mesaida idasauyeni waimie. Gebuka-otoqa! Kwanuani basenaqaida Iave tomo'otoqa ivalabubuni pwayapwaya tabwaneye kanaketoava deqoina, kwailauala pwayapwaya matatabuna waineye, we ge tamo yaubada dede mesaida vakai idavalabubunidi.”

39“Kwainuavekavini wete kwaivetumaqaneni tutuya matatabuna, Iave mi Yaubada kaisena imiamia abame wete pwayepwayeye, we ge tamo yaubada. 40Iave naloina deqoina avelevelemi matatabudi kwaivekimatanedi, kavagi komi wete tubuleleleqimiavo mimia inavegiagiamai wete inavekaniakwana pwayapwayanina Iave mi Yaubada ivelevelemi ge menakabakakava waineye.”

Currently Selected:

Loina Kanaveluqa 4: mzz

Highlight

Copy

Compare