Loina Kanaveluqa 17

Mosese tomo'otoqa ivonedi Kini kanavesinua paipaina

14 # 1 Sam 8:5 We Mosese ivonedi ivo, “Tutuyanina kwailugu pwayapwayanina Iave mi Yaubada ivelevelemi kwaikewai mipwayapwaya waineye kwaimiana, demesaida kwaivesipupuyedi kwanavo, ‘Kabaloina matatabuna imiavelauvivilida medikini beqa kida dakini taivesinueni.’ 15Iave kaisena tomoqo inavesinueni mimanuqa waineye'eqa, kwaisilagai gumanina mikini. Tomoqonina Isileli waimie'eqa, ge malitomo'otoqa waidie. 16We kininina ge kanasala naosi puedi inakewadi vetalaqa paipaina wete tomo'otoqa ge inavetunedi inanaqo Itipita osi puedi inagimwanedi, paina Iave ivo, ‘Komi ge kwaivila kwainaqo Itipita.’ 17#1 Ki 11:1-8Kininina ge kanasala mwanenavo inavepue kago mesaida vevinenidiavo nuana inasivilai Iave inatunukubui. We seluba wete goula beqa ge inaveguyoguyo. 18Tutuyanina tomoqonina inavekini loinanidiavo taunina nabuki waineye inagilili-damanedi nakabakisa, we tovelomu tupwaidiavo Libai namanuqa waineye'eqa inakiseni inakawagiagiamaieni. 19We yawaina kanamatatabu waineye bukinina vivineye inakenokeno we inawawawai kaiata puena, kavagi menavekimatana Iave na Yaubada inagololoyeni wete naloinavo inavekimatana-vekavekaiedi. 20We kago mesaida inavalabubunedi ge kanasala taunina inadidigeni natomo'otoqavo waidie. Beqa loinanidiavo ge inabailedi inasivilai kanakataqie wete kanakelie we kaia tutuya matatabuna inaemuli-vekavekaiedi. Beqa gumanina wete tubuleleleqinavo me Isileli inaloloinedi tutuya kaniakwanina.”

Currently Selected:

Loina Kanaveluqa 17: mzz

Highlight

Copy

Compare