1 Samuela 3
3
Iave Samuela iqoleni
1Samuela gunabeida ivetubuau ilitulituqa Iave paipaina wete Ilai ikakaivaiseni. Tutuyanina waineye Iave ge tutuya puena idaesipupu tomo'otoqa waidie wete ge idasasauyeni tomo'otoqa waidie kenokisakisaeqa.
2We Ilai matana ikapo-otoqa saiqanaqa inapwalu. Tamo lovana ikenokeno nakabakeno waineye. 3We Samuela ikenokeno Iave navanuqe we Vonadabadaba Kanadedewaga ikenokeno Tutudaba Maqemaqetana'otoqina waineye. We Iave nalamupa giladi ikalakalata ge idakweuya. 4Iave iveqoleluguaqeta ivo, “Samuela!”
Samuela ibaivila ivo, “Yau sidede.”
5Itovoi ilaukwavina inaqo Ilai waineye ivo, “Yau sidede. Komu kuqolegu beqa amai.”
We Ilai ivo, “Yau ge adaqolemu kunaqo kukeno.” Beqa Samuela ivila inaqo iketobala.
6We Iave iveqole-vaituqana ivo, “Samuela!”
Samuela itovoi ivila inaqo Ilai waineye ivo, “Yau sidede. Komu kuqolegu beqa yau amai.”
We Ilai ivo, “Natugu, yau ge adaqolemu, kuvila kunaqo kukeno.”
7Base Iave ge tamo tutuya Samuela waineye idavesipupu, beqa bonana ge idanoqayakinanai. 8Dede kanavetonu Iave naveqole waineye, beqa Samuela itovoi ivila inaqo Ilai waineye ivo, “Yau sidede. Komu kuqolegu beqa amai.”
Matautauda Ilai inuakawananaqaia Iave Samuela iqoleqoleni. 9Beqa Ilai Samuela ivoneni ivo, “Kunaqo kuketobala. Kago aitoi inaveqole vaituqana, demesaida kivesipupuyeni kunavo, ‘Iave, kuvesipupu waigue yau mutolituqa aevaneneqa.” Beqa Samuela ivila inaqo iketobala.
10We Iave imai itovoi Samuela vivineye iveqole base mesaida iveqoleyeni ivo, “Samuela, Samuela!”
We Samuela ivo, “Kuvona, mutolituqa ievaneneqa.”
11We Iave ivoneni ivo, “Yau tamo mwau aivalabubuni me Isileli aivesalawapadi. Tutuyanina tomo'otoqa inanoqai paipaina inagololo. 12Yau kaimatavuloqa aivalabubuni Ilai menasusuvo waidie, we kaia sakunidiavo avesipupuyeni matatabudi mwaqitana inasauyeni waidie, kabavelamu inanaqo kabavekakava waineye. 13Gunabeida avoneni kaimatavuloqa aimaieni nasusuvo waidie inakeno-vaqata paina natunavo ikawakapoyegu, iyagovi we ge wayaqina inasivetonovidi. 14Beqa avonadabadaba, oge Ilai menatunavo inakalaqei-maimaiqa o inavelomu waigue dikapoina paipaina we dikapoina ge ainuataqonidi.”
15Samuela kanakivie iketobala vaituqana kanaketoava ikawananaqai itovoi Iave navanuqa kana'awa isibaledi. We igololo ge wayaqina Iave navona inavesipupuyeni Ilai waineye. 16We Ilai iveqole ivo, “Samuela, natugu.”
Samuela ibaivila ivo, “Yau sidede.”
17We Ilai ivelautolieni ivo, “Iave vakai ivesipupuyeni waimue? Vonanidiavo matatabudi kuvonegu, ge tamo vona kivaigavuyeni. Kago tamo vona kivaigavuyeni Iave kaimatavuloqa bwaigina inavelemu!” 18Beqa Samuela vonanidiavo Ilai ivoneni, we ge tamo idavaigavuyeni.
Ilai ivesipupu ivo, “Iave vakai inuani tonotonovina kaia inavalabubuni.”
19We Iave Samuela taiauda tutuyanina nataulai waineye, wete tutuyanina Samuela ivonavaqata kaia kadimwaqitana isasauyedi. 20Beqa me Isileli matatabudi Dani taoni waineye'eqa inaqo Bedisiba taoni waineye iyagova-otoqi Samuela Iave napalopita. 21Tutuya puena Iave ilalausimatala Sailo taoni waineye, navalea ikakalaqeieni Samuela waineye.
Currently Selected:
1 Samuela 3: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
