1 Kinivo 8
8
Vonadabadaba Kanadedewaga ikavalai iluguveni Iave na Temupolo naqeneye
1 #
2 Sam 6:12-16
Tutuyanina Iave na Temupolo iyoqoni ikakava Kini Solomoni Isileli kanatomoqovo bwaigidi wete dimanuqa kaditogumetavo matatabudi wete susu tamoqana tamoqana kaditogumetavo iqolekauqidi inamai Ielusalema, we Iave Navonadabadaba Kanadedewaga inakewai Kini Deibida nataoni kanawavaqa Saioni waineye'eqa inanaweni inaluguveni Iave na Temupolo waineye.
3We tutuyanina me Isileli tomoqovo bwaigidi matatabudi ilekwa, tovelomuvo Vonadabadaba Kanadedewaga isipoia. 4Tovelomuvo wete Libai namanuqa kanatomoqovo Iave Navonadabadaba Kanadedewaga ikavalai, Ukweta Maqemaqetana wete kanasakuvo maqemaqetadi taiauda inawedi Iave na Temupolo waineye. 5We Kini Solomoni wete me Isileli matatabudi ivelautaubama Vonadabadaba Kanadedewaga manawaneye, sipi, gouti wete bulumakau pueotoqidi ielomuyedi, we kaisayanidiavo ge tamo aitoi kanasala inawawadi.
6Matautauda tovelomuvo Iave Navonadabadaba Kanadedewaga ikavalai iluguveni Temupolo naqeneye Tutudaba Maqemaqetana'otoqina waineye. Tutudabanina naqeneye goula selubima kadikailuqa me papedi itovotovoi. Papedi matakwanidie Vonadabadaba Kanadedewaga iyatoi.
10 #
Isa 40:34, 35 Tutuyanina tovelomuvo Tutudaba Maqemaqetana ikiaweni waumana iobuma Iave na Temupolo iveadaqi. 11We waumananina tovelomuvo dilituqa igiavekwadai paina Iave maqetana mata'udu'udulina na Temupolo iveadaqi.
22Matautauda Kini Solomoni Iave kanavelomu kabakanigabu mataneye itovoi we me Isileli matatabudi mulineye itovotovoi. Dimana isilagaidi abame 23ivelaukui dede mesaida ivo,
“O Iave me Isileli ma Yaubada ge tamo yaubada mesaida komu abame wete pwayepwayeye. Tutuya matatabuna muvonadabadaba kunuanuani wete mutomo'otoqavo kuenapwayewedi gumanidiavo nuapoudi matatabunaeqa iekimatanemu.
27“Iave komu kanasala pwayepwayeye kimia? Mukabamia ketowavawayoqa, abama kuvebwaiga-peleni! We dede Temupolo ayoqoni ge kamuketoava! 28O Iave gu Yaubada yau mutolituqa taniqamu kugebeni guvelaukui kuvevaneneqeni. Wayaqigu guvelaukui venua'ina'inaqe waimue kudanoqai kasiotoqa. 29Komu dede Temupolonina paipaina kuvesipupu kuvo, ‘Kaguwavaqa no waineye inamiamia,’ beqa kaiate wete lovane dede Temupolonina kuvekisabodebodeni wete tutuyanina aikisanaqo waineye guvelaukui waimue kudanoqanoqaidi. 30Yau mutolituqa, wayaqigu yau wete mutomo'otoqavo me Isileli mavelaukui venua'ina'inaqe kudanoqanoqaidi tutuyanina kaikisanaqo dede Temupolonina waineye wete kaivelaukui waimue. Mukabamia abama waineye mavelaukui kudanoqai we makapoina kudanuataqonidi.
41-42“We tutuyanina tomialuguaqeta, gumanidiavo ge me Isileli, kamuwavaqa bwaigina, muveluluna wete sakunidiavo kabanuavilele kuvalabubunidi valeana inanoqai kanikie'eqa inamai inakisanaqo mu Temupolo waineye we inavelaukui waimue. 43Mukabamia abama waineye divelaukui kudanoqai, we vakai paipaina ielaukui kivalabubuni, kavagi tomiapwayapwaya matatabudi inayagovimu medigololo inavekimatanemu mesaida mutomo'otoqavo Isileli ivavalabubunedi. Inayagovi dede Temupolonina ayoqoni kabavekimatana komu paipaimu.”
Currently Selected:
1 Kinivo 8: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
