1 Kinivo 5

Kini Solomoni ivalabubuna Iave na Temupolo inayoqoni

1Tutuyanina Kini Deibida meyawaina Kini Ilami me Taia dikini iveianeni. Tutuyanina Kini Ilami valea inoqai Deibida natuna Solomoni me Isileli dikini kaivauna, tupwaidiavo natogumetavo bwaigidi ivetunedi inaqo inavonamwasamwasaneni. 2We Kini Solomoni navalea ivetuneni Kini Ilami waineye ivo,

3“Komu kuyagovi tutuyanina tamagu Deibida meyawaina ietalaqa kabaloina puedi ikapavivileni, beqa ge kanasala temupolo inayoqoni Iave na Yaubada kanawavaqa kanadidiqa paipaina. Giladi ilalaugamasa Iave inakaivaiseni kanaqaviavo matatabudi kaqena matakwanineye inayatodi. 4We deqoina Iave gu Yaubada niwalova ivelegu gukabaloina waineye amia giagiamai kabaloinanidiavo vivigue taiauda, beqa ge mekaguqaviavo wete vetalaqa gebuka. 5#2 Sam 7:12, 13Beqa yau anuanuana temupolo aiyoqoni Iave gu Yaubada kanawavaqa kanadidiqa paipaina mesaida base ivonadabadaba tamagu Deibida waineye ivo, ‘Natumu aiyatoi inavekini kamuketopesala, gumanina temupolo inayoqoni Kaguwavaqa kanadidiga paipaina.’

6“Beqa mutolituqavo kudavetunedi idanaqo Lebanoni Polovinisi waineye welavi seda inatalaqidi paipaigu, we gutolituqavo taiauda inalituqa, paina kayagovi mutomo'otoqavo Saidoni welavi totalaqa giamaidi, ge mesaida kima me Isileli. Kago gunuanuana kimwasaneni kivonegu kaditutula kaivia kanabwaiga beqa mutolituqavo aitakonadi.”

Beqa Kini Solomoni welavinidiavo itakonadi Kini Ilami waineye'eqa, we me Isileli tomoqovo kadiyoko 30,000 ivonedi welavi wete tupwaidiavo saku inakewadi Iave na Temupolo kanayoqona paipaina. Wete Kini Solomoni tomoqovo kadiyoko 150,000 ivonedi gileu bwaigidi inagusudi Iave na Temupolo kanakautu paipaina.

Currently Selected:

1 Kinivo 5: mzz

Highlight

Copy

Compare