1 Kinivo 3
3
Kini Solomoni ivelaukui nuauya paipaina Iave waineye
3Kini Solomoni Iave ivenapwayeweni wete tamana Deibida naloinavo matatabudi ivemuliedi. We saku kaitamoqana waineye Iave ge idavemuli-vekavekaieni paina velomu ikakalaqeiedi wete vane igabugabunidi yaubadavo dikabasobwanu waidie koya siaidi debapoudie. 4We dikabasobwanu bwaigiotoqina koya siaidi debapoudie Gibioni taoni waineye, beqa Kini Solomoni inaqo no waineye 1,000 kaisaya matatabudi igabunidi ivelomuyedi Iave waineye. 5We lovane Iave ilausimatala Solomoni waineye kenokisakisaeqa. Ivelautolieni ivo, “Vakai wayaqimu? Kuvelaukui aivelemu.”
7Solomoni ibaivila ivo, “O Iave gu Yaubada, kuvesinuegu aivekini tamagu Deibida nakabaloina waineye, we yau mesaida gwamana siaina, ge adayagovi banikodiqa tomo'otoqa aikedagumetedi. 8Yau mutolituqa, mutomo'otoqavo vesivesinuadi gamwadie, kadiyoko bwaigiotoqina wawawayoqa. 9Ge tamo aitoi kaisena kanasala mutomo'otoqavo inaloinedi. Beqa nuauya kivelegu waineye'eqa kanasala mutomo'otoqavo ailoina-vekavekaiedi wete aiyagovi vakai giamaina wete vakai kapoina.”
10Paina Kini Solomoni ivelaukui nuauya paipaina, beqa Iave imwasaneni. 11We Iave ibaivila ivo, “Kuvelaukuiegu kaia nuauya wete nuakawananaqai tonotonovidi paipaina beqa kanasala gutomo'otoqavo kiloina-vekavekaiedi, we ge kudavelaukuiegu mumiana kaniakwanina paipaina o guyoguyo paipaidi o kamuqaviavo ailuvewapadi. 12Beqa vakai kuvelaukuiegu paipaina aivelemu nuauya wete nuakawananaqai giamaidi waidie'eqa kavagi ge tamo aitoi inasalamu base, deqoina wete tutuya imaimai waidie. 13We ge kudavelaukuiegu kiveguyoguyo wete wavaqa bwaigina paipaina, we sakunidiavo aivelemu kavagi tutuyanina meyawaimue ge tamo kini naguyoguyo o kanawavaqa bwaigina inasalamu. 14Kago guvona kinoqai we guloinavo wete guvemataluana kivekimatanedi mesaida tamamu Deibida, mumiana aikavekaniakwani.”
Kini Solomoni nanuauya
16Tamo tutuya waineye vevine kadikailuqa matadi ge nuvadi imai Kini Solomoni waineye, kadimwau inasivetonovi. 17Tamo vavine ivona ivo, “Ae Kini, kima kamakailuqa vanuqa tamoqana waineye kamiamia we yau gwamana lamoqina kavenatuneni. 18Kaiata kaitonu ikakava dede vavinenidi wete gwamana lamoqina ivenatuneni. We kamakailuqa kaisema kamiamia vanuqe, ge tamo aitoi taiauda. 19Tamo lovana waineye ikenolaga natudi tabwaneye ikenovewapai. 20Lovana gamwane kakenomataiva-otoqa, vavinenidi itovoi natugu manawameye ikewai we katupai natudi wapana vilameye ivekenovi, natugu yawayawaina ikewai taiauda ikeno. 21Kawakawaie katovoi wayaqima natugu kaivesusuya we kakiseni gwamana wapana. Tutuyanina maqeteye kakisa-vekavekaia, kakiseni ge natugu.”
22Tamo iadi ivo, “Gebuka, yawayawaina natugu we gwamana wapana natumi!”
We vavine gumegumetadi ivona-veluveluluna ivo, “Gebuka! Gwamana wapana natumi, we yawayawaina natugu!” Dede mesaida kadikailuqa iekawadibidibi Kini Solomoni mataneye.
23Beqa Kini Solomoni ivesipupu ivo, “Vavina gumegumetadi ivo, ‘Yawayawaina natugu we gwamana wapana natumi,’ we iami ivo, ‘Gebuka! Wapana natumi we yawayawaina natugu.”
24We ivesipupu natolituqavo waidie ivo, “Kepata kwakewai kwamaieni.” Beqa kepata ikewai imaieni kini waineye.
25Kini Solomoni iloina ivo, “Gwamana yawayawaina kwagusuluqedi! Vikaina tamo vavina kwaiveledi wete vikaina iadi kwaiveledi.”
26We gwamana yawayawaina inaotoqina ivenapwayewa-otoqeni, beqa ivoneni ivo, “Ae Kini, kaiana! Gwamana kukalaqeieni no vavinenidi waidie ge kiluvewapai.”
We iadi ivo, “Gebuka, kwagusuluqedi. Beqa no gwamananina ge yau wete ge gumanidi natudi.”
27Beqa Kini Solomoni ivo, “Gwamana ge kwailuvewapai! Kwakalaqeieni vavinenidi ivonegu ‘gwamana ge kiluvewapai’ waidie, paina gumanidi inaotoqina.”
28Tutuyanina me Isileli matatabudi Kini Solomoni navesinua vevinenidiavo waidie valeana inoqai, ivekimataneni we iyagovi Iave nuauya wete nuakawananaqai tonotonovidi iveleni beqa kanasala natomo'otoqavo inaloina-vekavekaiedi.
Currently Selected:
1 Kinivo 3: mzz
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
