Hechos 24

Bexa judio msake Pabl ndoꞌ Félix

1Leꞌa ngol sgaꞌay wizh ulayaꞌ Ananías uleꞌay ndon leꞌa nsak, no pla bexa gox nsak ten bexa judio, no dub xa nsaleaꞌ Tértulo dub xa ntsid ley. Leꞌa itea bexa ndee wa ulayaꞌ ndoꞌ Félix, usake bexa Pabl. 2Leꞌa gor ulenno be soldad Pabl, leꞌa Tértulo usaxan ndadiꞌizh ndoꞌ Félix, nsake xa Pabl ndab xa:

—Félix, uzhebpa wen nibeꞌe go sa ndee, ta weꞌe wen ndebe besa no leꞌaka nak itea be taꞌa. 3Idub tiemp no itea lad nsaꞌa besa xno ndoꞌ go Félix idub ncho ladna besa. 4Leꞌa naꞌ lá nlad koo tiemp ten ga, parea leꞌa nat inaꞌab naꞌ goꞌón ga ta gudiꞌizh besa dub xlaꞌaltsa. 5Leꞌa besa ngwaꞌizheal leꞌa Pabl ndee uzhebpa ugap ndun, leꞌa xa nchealuyo bexa judio idub ndoꞌ gizhliyo. No leꞌa xa nak dub xa nsak ten partid ten bexa nsaleaꞌ nazareno. 6No ndiꞌizh gun bzhiꞌik xa niꞌi ten Dios, ta weꞌe usen besa xa, nlad besa gunno besa xa lak nibeꞌe ley ten besa. 7Ná leꞌa Lisias xa nibeꞌe be soldad wa cha ulen lat besa, cha lajuers mlat xa Pabl ndoꞌ besa. 8Cha ndab xa usake besa Pabl ndoꞌ go sa ndee. Nat tal inabdiꞌizh go ndoꞌ xa, iniꞌí go leꞌa itea ta nsake besa xa ta ugeaka.

Pabl ntsakndoꞌ ndoꞌ Félix xa nibeꞌe

9Leꞌa bexa judio wa dubtsa ndab leꞌa ta wa ta ugeaka. 10Ná leꞌa Félix cha mbin sein ndoꞌ Pabl iníꞌi Pabl. Leꞌa Pabl cha ndab:

—Leꞌa naꞌ uní leꞌa go kwenla nak juez ten idub sa ndee, ta weꞌe nten lad naꞌ utsakndoꞌ naꞌ ndoꞌ ga. 11Tal leꞌa go koxnes‑a, leꞌa go szheal leꞌa pa msa tibtop wizh ngwaa naꞌ Jerusalén ngwankea naꞌ Dios. 12Leꞌa bexa baꞌ naꞌanpa iniꞌí masa ton dub men uteyotoꞌo besa. No ni lá ngun naꞌ dub ta gun leꞌa be men gaklono naꞌ, ni tale ten niꞌi ten Dios, no ni len be niꞌi sa nzhealbe bexa judio, no ni len gezh wa. 13No ni dub taꞌa li nsake bexa baꞌ naꞌ, lá gun bexa gan uluu leꞌa‑yá ta ugea. 14Ta ugeaka leꞌa naꞌ ndankea Dios xa na ngwankea be usan gox polta ten besa, no ndankea naꞌ nes ten Jesús. Leꞌa bexa ndee ndab leꞌa ta wa naꞌanpa leꞌa nak, parea leꞌa naꞌ nxobgek ndoꞌ itea be diꞌizh ten Dios, ta mkeꞌa Moisés nsea bexa mbidiꞌizh sakndoꞌ Dios. 15No ndangea lad naꞌ lak ndangea ladna bexa ndee, leꞌa Dios ixiste bexa ngutla, tal bexa wen natal bexa ugap. 16Ta weꞌe uzhebpa ndun naꞌ juers utsin gak naꞌ ndoꞌ Dios no ndoꞌ be men.

17’Leꞌa naꞌ sian liꞌin ngwaꞌukesea be gezh sit, ná nat nsea naꞌ Jerusalén ndontsa usa naꞌ med ndoꞌ bexa uban nak no usa naꞌ man xnab ndoꞌ Dios sa wa. 18Ná ndalen ndun naꞌ be ta wa, gor na mbinla naꞌ ta msambiꞌi naꞌ ndoꞌ Dios, weꞌe leꞌa pla bexa judio bexa Asia uniꞌíla naꞌ wats niꞌi ten Dios wa. Leꞌa wats naꞌ wa ni lid kwaꞌad men ndebe, no ni naꞌanpa ndakloo be men. 19Leꞌa bexa wa nsabndoꞌ gidyab‑a ndoꞌ ga, tal bexa ndap ta nsake bexa naꞌ. 20Ná tal gab bexa ndee tal leꞌa bexa ngwaꞌizheal leꞌa naꞌ ndun ta lid leꞌa nak, gor na usoꞌ naꞌ ndoꞌ bexa wa. 21Nabtsa syoꞌo gan usake bexa naꞌ ta na ugeꞌ uníꞌi naꞌ ndoꞌ bexa wa, ndáp naꞌ leꞌa naꞌ nsoꞌ ndoꞌ bexa wa geal ta na ndangea lad naꞌ leꞌa Dios ixiste bexa ngutla.

22Leꞌa Félix yá uniꞌíla cuent ten nes ten Jesús, ta weꞌe gor na mbiꞌín xa ta wa, cha ndab xa:

—Uni ta ndee. Ilentsa Lisias, weꞌe gun naꞌ regl cuent ten bega.

23Cha unibeꞌe Félix ndoꞌ soldad nibeꞌe wa ikeanyaw Pabl, parea ulaꞌa xa ikesea Pabl len niꞌi wa, no ulaꞌa xa tal be ltsaꞌa xa yaꞌinaꞌ xa no gakno bexa xa.

Pabl ukeanyaw top liꞌin Cesarea

24Leꞌa ngol stapla wizh wa leꞌa Félix no Drusila, xa judio xagots ten xa, ulayaꞌgal sa wa. Leꞌa Félix cha unibeꞌe goꞌo be soldad Pabl sa nsob Félix. Weꞌe cha mbiꞌín bexa ta mbidiꞌizh Pabl ná xteꞌe ndangea ladna men Jesucristo. 25Ná leꞌa gor na mbidiꞌizh Pabl xteꞌe nlad Dios gun be men, no xteꞌe lá nsabndoꞌ gun be men sbeꞌen ta nladtsa na, no xteꞌe yoo dub wizh leꞌa Dios leꞌa gab ná ton ndap ke, weꞌe leꞌa Félix cha mzheb, cha ndab xa ndoꞌ Pabl:

—Nat byaꞌ. Leꞌa wizh na ulat naꞌ wa, leꞌa naꞌ sbeꞌezhkagal lu.

26Tsoꞌo wa nlad Félix leꞌa Pabl usaꞌa med ndontsa ulaꞌa xa Pabl, ta weꞌe sian biaj utezh xa Pabl gudiꞌizhno xa Pabl. 27Ngok top liꞌin leꞌa Félix mtoꞌo sa wa. Cha uyatsob dub xa nsaleaꞌ Porcio Festo. Ná leꞌa Félix nlad wen yaꞌan ndoꞌ bexa judio wa, ta weꞌe lá igoꞌo xa Pabl sa nkeanyaw Pabl.

Currently Selected:

Hechos 24: zpt

Highlight

Copy

Compare