1 Timoti 4
4
A asasongo na tena asaerla
1A Talngan Tabu i apuasa i mang al tarai lar han masik kusun a momol a tortorot ana ararop a pukakiarla, pa lar mur a mot asasongola, pa lar mur a asasaerla anuna motla. 2A asasaerla ne i hanot miting tana tena asasongola, a tarai ning bel la oroi lalan a tostosna pa laulauna, anasa a tostos a nuknukinla ka mat. 3A ngas a tarai ne, la sairas a tinaulai pa la sairas a tarai sur gong la ien al ngas a utna na hangan. A utna na hangan ning, e God i akes tari, sur a tarai a tortorot ning la tasman a momolna, lar atong wakak tetek e God onoi pa lar ieni. 4Anasa a ututnala rop ning e God i akes tar la, la wakak, pa gong dala bilbilor la. Dalar atong wakak tetek e God onoi ning dalar ieni. 5Anasa a warwara ane God pa a nunung dia awakak a utna na hangan sur ir wakak na mata e God.
A wakak a tena titol ane Karisito
6Ning ur asaer na tastasimla ana asasaer ne, u a wakak a tena titol ane Karisito Iesu, ning u ka alasan wakak pas u ana tortorot momol pa a wakak a asasaer ning u muri. 7Ur han masik kusun a asasaer orosla ning bel i topas al utna. Ur alasan u sur ur gomo ana ngas a lalaun ning e God i mang suri. 8Ning dala alasan a palaondala ana ngas a urmatana mon, i nangan a palaondala, ika ning dala alasan dala sur dalar gomo ana toltol ning e God i mang suri, i wakak kol tana ututnala rop. I nangan a lalaun ne pa a lalaun lamur otleng. 9A warwara ne a atongi, i momol kol, i wakak ning dalar muri pa dalar tortorot onoi. 10Ine a kamkamna ning mila rakrakai pa mila titol rakrakai, anasa mila harnanai ana tortorot o e God, esaning i laun pa i sira alaun anuna taraila rop, ning la tortorot onoi.
11Ur asaer la pa ur arakrakai la ana ututnala ne. 12Gong u noren tik ning ir oroi purpurum u anasa u barman. Ur tol a wakak a toltol tetek a tena tortorotla ana num a warwara, anuma toltol, anuma marmaris, anuma tortorot pa anuma totoh a lalaun, sur lar muri. 13Ur rakrakai ana wawas ting na Buk Tabu tetek a tarai a lotu, ur rakrakai ana warawai taum ana asasaerla tetek la, tuk ning ar hanot. 14Gong u noren a artabar ana Talngan Tabu, ning di sarani tetek u, ning a ningnigola la suah tar a kunla saot hom pa la warwara na propet.
15Ur titol rakrakai ana ututnala ne. Ur saran anuma lalaun sur a ututnala ne, sur a taraila rop lar oroi u mang u gomo ana lalaun ning e God i mang suri. 16Ur tai alar anuma lalaun pa anuma asasaer, ur tur rakrakai on diau. Anasa, ning ur toli larning, ur alaun pas u ot, pa la otleng ning la longor u.
Currently Selected:
1 Timoti 4: lbb
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
