Matie 22
22
Tale kafo lanɔ sɛnɛiyo
(Luke 14.15-24)
1Mí Yeesu soaa vɛlɛ o nda lo o talelan nin, mó dimi aa: 2«Masale halataala len le co maa masa yaw ɲɛdiaa kafoo le lanɔ sɛnɛi po ndɔɔ-o. 3Mó viam buɛyaa ndɔa le vanaa ndóò yoongu le ɲɛdiaa kon-nda kɔlan veeloo, kɛ vanaa kan a cɛl le hunɔɔ le. 4Mó viam vɛlɛ buɛyaa celen aa: ‹La kɔ dimul vanaa ya yoongu-a maa ɲɛdiaa cuu yaw, i cii nawva a cɔlua celulaa diyɔɔ, ɲɛ-ɲɛ cuu toosiaa, a hun le ɲɛdiaa kafo lanɔ sɛnɛiyo dioo.› 5Kɛ a saalan sɔɛi ken te, mí vana-vana kɔannun o mako ndɔ nin. Mì o pum kɔannun o ndu lo panga, mí o pum kɔannun yulalen. 6Mí vanaa tɔ̀a bii buɛyaa kan, má saangiaa nda, má diw nda. 7Mí masaa tuulu kɔl, mó viam vanaa ndɔa cɔwva, má kɔ diw vanaa diuvaa kan, má loam kobi ndaa. 8O kon mó dimul buɛyaa ndɔa aa: ‹Ɲɛdiaa kafo lanɔ sɛnɛiyo cuu toosiaa, kɛ vanaa yáà yoongu-a ndáà bɛnda le veelu sɔla le. 9Lelan la kɔ o nɛilan, mì la veelu vanaa niaa komalnin-nda le ɲɛdiaa kafoo ho dioo.› 10Mí buɛyaa ndɔa piɔl o nɛilan coo, má mɔɔsiaa vanaa nda komal lon-nda kpede, a vɔɔnda a à kɛndɛa. O kon mí cɛi kafoo va tosanndo nin-ndo pia cá a vanáà hin-nda. 11Mí masaa luɛi le vanáà hin kan-nda tofaa, mó saalun langbanɔɔ pum, ndóò nɔ volɔɔla kafo lekɔɔ le. 12Mó ɲuna ndu aa: ‹Caan nuu sei! Vɛɛ nɔm looku yɛ luɛyɔɔ nanu a sɔla volɔɔla kafo lanɔ sɛnɛiyo le?› Langbanɔ kon kuŋ te o soli le. 13O kon mí masaa dimul buɛiya aa: ‹La yii ndu pelon a balan, mì la viow ndu o ɲumndan nin o bɛ́ɛ̀, nɛɛ caŋndan a ciŋndon sɔmndo vanin-nda.› 14Kani vanaa bɔɔ-bɔɔ a veelun, kɛ a hɛlin-nda co sɛ́lɛ́ le.»
Le Sesar muloo solullo
(Marke 12.13-17, Luke 20.20-26)
15Mí Faliisia kɔ yii dúmbóó le nɛilan nuwviaa le Yeesu biyɔɔ o sɔɛi ndɔɛi sondoei nin. 16Má vim ndu kaandeŋaa ndaa a vanaa va Herɔde kɔɔli-a a pum. Má kɔ dimul ndu aa: «Kɔɔfa, n sina maa vana toɲaa n co ni, a co vannda nɛila Hala lan pɛɛkoo a toɲaa, a nɔ sika a vana-vana le, kani a tofa vanndacieea le mɛɛ nda co yɛ le. 17Lelan dimul naa: O bɛnda pá mì n mal muloo Sesar o ba?» 18Kɛ le tùú Yeesu ndóò sina yiyannda ndala vɔɔnndan-ndo, mó muli aa: «Le yɛɛ niaa co yɛ ya yaŋɔɔlen hendullo, niaa vanaa muuluannda ha? 19La cɔm-ndɔ ya volin niaa mal muloo-on.» Má cɔm ndu volii támái. 20Mó ɲuna nda aa: «Hɔlaa nɛ̀ɛ́ a diola nɛ̀ɛ́ la co yɛ lan lecoo?» 21Má mulul ndu aa: «Sesar ni.» O kon mó dimul nda aa: «Mɛɛ la mingul Sesar ɲɛ co le Sesar-o, mì la mingul Hala ɲɛ co le Hala-o.» 22Mí kɔndɔfillo bii nda a muli nda tuei kon-ndo, má mal ndu, má kɔannun.
Sɔɛi tendul vanvílɛ́iya
(Marke 12.18-27, Luke 20.27-40)
23Paale pilɛle len, mí Sadusea, a va dimio maa vanvílɛ́iya tendulnin te-a, a hun ɲuna Yeesu aa: 24«Kɔɔfa, Moise dimi aa: Te vanndo vi pɛ, mò mɛi hɔ́ɔ́ le, puapilɛ vana kon bɛnda mò loo lanɔ o mɛi-yo, mò koma vilul vana vi kon-ndo cuawva. 25Nduyɛ puapilɛa pum va naa tɛɛn nda ŋɔmmɛw. Mí o tasoo cua lanɔɔ, mó vu. Le tùú o mɛi hɔ́ɔ́ loo, mó mel puapilɛ ndɔɔ laa ndɔ. 26Mí dɛnɛ pilɛ kon tosan a o diinndɔɔ. O kon kɔɔli, mó tosan lende a o yàándɔɔ kɔlan tiiyaa háá di a o ŋɔmmɛwndɔɔ. 27O nda kpow kɔɔli, mí lanɔ kon bɛɛ vu. 28O tendul vanvílɛ́iya, lanɔɔ nɛ̀ɛ́-nɛ̀ cua kon va yɛnin o puapilɛa ŋɔmmɛvaa kan tɛɛn? Kani nda kpow, o kei nda o ba.» 29Mí Yeesu mulul nda aa: «O pɔwlan nin niaa co nuaa ni! Kani la bii ɲɛ co o sɛvaa o Sɛbɛ Hala-o nin-ndo bila le, la bii vɛlɛ kpaaya Hala-o bila le. 30Kani o tendul vanvílɛ́iya, vanpiaandua yilnin n'laandu le, vanlaandua bɛɛ a celnin o lanɔ le, kɛ maa mɛlɛkaa co o halataala-a vanndacieea vanin ni. 31Le o co a tendul vanvílɛ́iya o kɔɔ-o yɛ, vɛ̀ɛ̀ la ci sɔɛi Hala dimul niaa o Sɛbɛ ndɔɔ nin-nde i sɛvaa le aa: 32‹Ya co Hala Abraham-ndo ni, Hala Isaak-o a Hala Yakɔb-o›? Hala co Hala n'vanvílɛ́i le, kɛ Hala vanaa yoomaa o co ni.» 33Mí pɛɛkuu Yeesu-o pilan sɛ́lɛ́ va lon-ndo kɔltan.
Tɔŋ hiow vaa o bɔɔ-o
(Marke 12.28-34, Luke 10.25-28)
34Faliisia tueyɔɔ maa Yeesu kinda Sadusea sondolan, má cuungian, 35mí vana pilɛ o nda tɛɛn, vana pɛɛkaa latɔŋndo pum ɲuna ndu le ndu kɔlɔɔ solio aa: 36«Kɔɔfa, o tɔŋndan nin kpow, ɔ́ɔ̀ tɔŋ hiow vaa o bɔɔ-o?»
37Mí Yeesu mulul ndu aa: «Kaola Mɛlɛka, o co Hala nɔmndo-o a kɔl nɔmndo kpow, a yoomu nɔmndo kpow a á yiyan nɔmndo kpow. 38Tɔŋ tasoo a tɔŋ hiow tɔŋnda tɔ̀lan-ndo co kon ni. 39O diinndɔɔ co hoo ni, ndu bɛɛ velan a o tasoo: kaola caanda maa nɔm pila. 40O tɔŋnda tiɔnndan ndan nin tɔŋnda tɔ̀lan kpow a sɔɔn vanaa-tɛɛngaa-diom Hala-a dimi-on n kɛsi tumndo ni.»
Krista, po David-o
(Marke 12.35-37, Luke 20.41-44)
41Mɛɛ Faliisia va a cuungiannda nɛɛ pilɛ yɛ, mí Yeesu ɲuna nda aa: 42«Vɛ̀ɛ̀ niaa yiyan yɛ a Krista? Po nɛ̀ɛ́ o co yɛ?» Má mulul ndu aa: «Po David-o o co ni.» 43Mí Yeesu ɲuna nda aa: «Le kɔlɔ yɛɛ David veelu yɛ ndu niko o kpaaya Kɔl-Diandaa bɛngu aa: ‹Maalii›? Kani telen pilɛ mó dimi-o aa:
44‹Mɛlɛka dimul Maalii nuu aa:
Cal-la o ba kɛndɔɔ coo,
háá mì luei yaamɔaa nɔmnda
nɔm o pelon bɛngu.›
45Te David pila veelu ndu pɛ aa ‹Maalii›, vɛ̀ɛ̀ o nɔla yɛ vɛlɛ mò va po ndɔɔ?» 46Hali diomndo pilɛ, vana nɔla ndu mulullo le. Kandɔɔ nin ɲinkon, vana-vana tɔɔndan-ndɛ le ndu isɔɔ ɲuna le.
Currently Selected:
Matie 22: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
Matie 22
22
Tale kafo lanɔ sɛnɛiyo
(Luke 14.15-24)
1Mí Yeesu soaa vɛlɛ o nda lo o talelan nin, mó dimi aa: 2«Masale halataala len le co maa masa yaw ɲɛdiaa kafoo le lanɔ sɛnɛi po ndɔɔ-o. 3Mó viam buɛyaa ndɔa le vanaa ndóò yoongu le ɲɛdiaa kon-nda kɔlan veeloo, kɛ vanaa kan a cɛl le hunɔɔ le. 4Mó viam vɛlɛ buɛyaa celen aa: ‹La kɔ dimul vanaa ya yoongu-a maa ɲɛdiaa cuu yaw, i cii nawva a cɔlua celulaa diyɔɔ, ɲɛ-ɲɛ cuu toosiaa, a hun le ɲɛdiaa kafo lanɔ sɛnɛiyo dioo.› 5Kɛ a saalan sɔɛi ken te, mí vana-vana kɔannun o mako ndɔ nin. Mì o pum kɔannun o ndu lo panga, mí o pum kɔannun yulalen. 6Mí vanaa tɔ̀a bii buɛyaa kan, má saangiaa nda, má diw nda. 7Mí masaa tuulu kɔl, mó viam vanaa ndɔa cɔwva, má kɔ diw vanaa diuvaa kan, má loam kobi ndaa. 8O kon mó dimul buɛyaa ndɔa aa: ‹Ɲɛdiaa kafo lanɔ sɛnɛiyo cuu toosiaa, kɛ vanaa yáà yoongu-a ndáà bɛnda le veelu sɔla le. 9Lelan la kɔ o nɛilan, mì la veelu vanaa niaa komalnin-nda le ɲɛdiaa kafoo ho dioo.› 10Mí buɛyaa ndɔa piɔl o nɛilan coo, má mɔɔsiaa vanaa nda komal lon-nda kpede, a vɔɔnda a à kɛndɛa. O kon mí cɛi kafoo va tosanndo nin-ndo pia cá a vanáà hin-nda. 11Mí masaa luɛi le vanáà hin kan-nda tofaa, mó saalun langbanɔɔ pum, ndóò nɔ volɔɔla kafo lekɔɔ le. 12Mó ɲuna ndu aa: ‹Caan nuu sei! Vɛɛ nɔm looku yɛ luɛyɔɔ nanu a sɔla volɔɔla kafo lanɔ sɛnɛiyo le?› Langbanɔ kon kuŋ te o soli le. 13O kon mí masaa dimul buɛiya aa: ‹La yii ndu pelon a balan, mì la viow ndu o ɲumndan nin o bɛ́ɛ̀, nɛɛ caŋndan a ciŋndon sɔmndo vanin-nda.› 14Kani vanaa bɔɔ-bɔɔ a veelun, kɛ a hɛlin-nda co sɛ́lɛ́ le.»
Le Sesar muloo solullo
(Marke 12.13-17, Luke 20.20-26)
15Mí Faliisia kɔ yii dúmbóó le nɛilan nuwviaa le Yeesu biyɔɔ o sɔɛi ndɔɛi sondoei nin. 16Má vim ndu kaandeŋaa ndaa a vanaa va Herɔde kɔɔli-a a pum. Má kɔ dimul ndu aa: «Kɔɔfa, n sina maa vana toɲaa n co ni, a co vannda nɛila Hala lan pɛɛkoo a toɲaa, a nɔ sika a vana-vana le, kani a tofa vanndacieea le mɛɛ nda co yɛ le. 17Lelan dimul naa: O bɛnda pá mì n mal muloo Sesar o ba?» 18Kɛ le tùú Yeesu ndóò sina yiyannda ndala vɔɔnndan-ndo, mó muli aa: «Le yɛɛ niaa co yɛ ya yaŋɔɔlen hendullo, niaa vanaa muuluannda ha? 19La cɔm-ndɔ ya volin niaa mal muloo-on.» Má cɔm ndu volii támái. 20Mó ɲuna nda aa: «Hɔlaa nɛ̀ɛ́ a diola nɛ̀ɛ́ la co yɛ lan lecoo?» 21Má mulul ndu aa: «Sesar ni.» O kon mó dimul nda aa: «Mɛɛ la mingul Sesar ɲɛ co le Sesar-o, mì la mingul Hala ɲɛ co le Hala-o.» 22Mí kɔndɔfillo bii nda a muli nda tuei kon-ndo, má mal ndu, má kɔannun.
Sɔɛi tendul vanvílɛ́iya
(Marke 12.18-27, Luke 20.27-40)
23Paale pilɛle len, mí Sadusea, a va dimio maa vanvílɛ́iya tendulnin te-a, a hun ɲuna Yeesu aa: 24«Kɔɔfa, Moise dimi aa: Te vanndo vi pɛ, mò mɛi hɔ́ɔ́ le, puapilɛ vana kon bɛnda mò loo lanɔ o mɛi-yo, mò koma vilul vana vi kon-ndo cuawva. 25Nduyɛ puapilɛa pum va naa tɛɛn nda ŋɔmmɛw. Mí o tasoo cua lanɔɔ, mó vu. Le tùú o mɛi hɔ́ɔ́ loo, mó mel puapilɛ ndɔɔ laa ndɔ. 26Mí dɛnɛ pilɛ kon tosan a o diinndɔɔ. O kon kɔɔli, mó tosan lende a o yàándɔɔ kɔlan tiiyaa háá di a o ŋɔmmɛwndɔɔ. 27O nda kpow kɔɔli, mí lanɔ kon bɛɛ vu. 28O tendul vanvílɛ́iya, lanɔɔ nɛ̀ɛ́-nɛ̀ cua kon va yɛnin o puapilɛa ŋɔmmɛvaa kan tɛɛn? Kani nda kpow, o kei nda o ba.» 29Mí Yeesu mulul nda aa: «O pɔwlan nin niaa co nuaa ni! Kani la bii ɲɛ co o sɛvaa o Sɛbɛ Hala-o nin-ndo bila le, la bii vɛlɛ kpaaya Hala-o bila le. 30Kani o tendul vanvílɛ́iya, vanpiaandua yilnin n'laandu le, vanlaandua bɛɛ a celnin o lanɔ le, kɛ maa mɛlɛkaa co o halataala-a vanndacieea vanin ni. 31Le o co a tendul vanvílɛ́iya o kɔɔ-o yɛ, vɛ̀ɛ̀ la ci sɔɛi Hala dimul niaa o Sɛbɛ ndɔɔ nin-nde i sɛvaa le aa: 32‹Ya co Hala Abraham-ndo ni, Hala Isaak-o a Hala Yakɔb-o›? Hala co Hala n'vanvílɛ́i le, kɛ Hala vanaa yoomaa o co ni.» 33Mí pɛɛkuu Yeesu-o pilan sɛ́lɛ́ va lon-ndo kɔltan.
Tɔŋ hiow vaa o bɔɔ-o
(Marke 12.28-34, Luke 10.25-28)
34Faliisia tueyɔɔ maa Yeesu kinda Sadusea sondolan, má cuungian, 35mí vana pilɛ o nda tɛɛn, vana pɛɛkaa latɔŋndo pum ɲuna ndu le ndu kɔlɔɔ solio aa: 36«Kɔɔfa, o tɔŋndan nin kpow, ɔ́ɔ̀ tɔŋ hiow vaa o bɔɔ-o?»
37Mí Yeesu mulul ndu aa: «Kaola Mɛlɛka, o co Hala nɔmndo-o a kɔl nɔmndo kpow, a yoomu nɔmndo kpow a á yiyan nɔmndo kpow. 38Tɔŋ tasoo a tɔŋ hiow tɔŋnda tɔ̀lan-ndo co kon ni. 39O diinndɔɔ co hoo ni, ndu bɛɛ velan a o tasoo: kaola caanda maa nɔm pila. 40O tɔŋnda tiɔnndan ndan nin tɔŋnda tɔ̀lan kpow a sɔɔn vanaa-tɛɛngaa-diom Hala-a dimi-on n kɛsi tumndo ni.»
Krista, po David-o
(Marke 12.35-37, Luke 20.41-44)
41Mɛɛ Faliisia va a cuungiannda nɛɛ pilɛ yɛ, mí Yeesu ɲuna nda aa: 42«Vɛ̀ɛ̀ niaa yiyan yɛ a Krista? Po nɛ̀ɛ́ o co yɛ?» Má mulul ndu aa: «Po David-o o co ni.» 43Mí Yeesu ɲuna nda aa: «Le kɔlɔ yɛɛ David veelu yɛ ndu niko o kpaaya Kɔl-Diandaa bɛngu aa: ‹Maalii›? Kani telen pilɛ mó dimi-o aa:
44‹Mɛlɛka dimul Maalii nuu aa:
Cal-la o ba kɛndɔɔ coo,
háá mì luei yaamɔaa nɔmnda
nɔm o pelon bɛngu.›
45Te David pila veelu ndu pɛ aa ‹Maalii›, vɛ̀ɛ̀ o nɔla yɛ vɛlɛ mò va po ndɔɔ?» 46Hali diomndo pilɛ, vana nɔla ndu mulullo le. Kandɔɔ nin ɲinkon, vana-vana tɔɔndan-ndɛ le ndu isɔɔ ɲuna le.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée