Roma 8
8
Meꞌ aꞌa pinagbayaꞌan weꞌ Niyawa Sutsihin nuhut kinabayaꞌan Niyawa Sutsihin
1Manjari, kite bi, meꞌ magdambuwaꞌ duk Isa Almasihin, kuweꞌitu gaꞌi ne kite ilegga weꞌ Tuhanin. 2Peggeꞌ magdambuwaꞌ ne kite bi duk Isa Almasi, Niyawa Tuhanin ne magbayaꞌ si kitehin bi duk baꞌahuhanne ateyten bi. Hangkan gaꞌi ne kite bi tadaꞌag weꞌ duse. Duseten jānnen hangkan kite tapī si narkaꞌ. 3Gaꞌi kite lumuwas amban duseten bi sabab panuhutte saraꞌin peggeꞌ manusiyaꞌ du hadja kite bi duk gaꞌi tatuhutte saraꞌin. Saguwaꞌ niyaꞌ tahinang Tuhanin supaya ne kite bi gaꞌi taboꞌo weꞌ disalite bi magdusehin. Pinapitu weꞌ ne Anaknen inanakan tuꞌu si dunya magbaran manusiyaꞌ duk addatnen kuweꞌ addatten bi saguwaꞌ gaꞌ iye taboꞌo magduse. Ilegga iye sabab duseten bi duk matey iye supaya kite bi gaꞌi ne taboꞌo weꞌ disalite bi magdusehin. 4Hininang inin weꞌ Tuhanin supaya asal tatuhutte meꞌ pangandaꞌakan dem saraꞌnen duk bentel ne meꞌ hinanganten. Peggeꞌ bang ne kite sandel pu si Isa, gaꞌi ne tuhutte kinabayaꞌan napsuten. Saguwaꞌ iye tinuhutten meꞌ kinabayaꞌan Niyawa Sutsihin. Hangkan hep bang tuhutte panoloꞌ Niyawa Sutsihin, asal tatuhutte meꞌ pangandaꞌakan dem saraꞌ Tuhanin. 5Meꞌ aꞌa pinagbayaꞌan weꞌ napsuden, iye luwal pinikilden nuhut kinabayaꞌan napsuden. Saguwaꞌ meꞌ aꞌa pinagbayaꞌan weꞌ Niyawa Sutsihin iye luwal pinikilden nuhut kinabayaꞌan Niyawa Sutsihin. 6Bang aꞌahin luwal pinikilnen nuhut napsunen, sudda matey du iye duk tapī si narkaꞌ. Saguwaꞌ bang aꞌahin iye luwal pinikilnen nuhut kinabayaꞌan Niyawa Sutsihin, urungan Tuhanin iye umul salama-lama duk sanyang ne ateynen. 7Peggeꞌ bang aꞌahin iye luwal pinikilnen nuhut kinabayaꞌan napsunen, kuntarahanne Tuhanin. Gaꞌi iye nuhut saraꞌ Tuhanin duk asal gaꞌi tatuhutne. 8Meꞌ manuhut kinabayaꞌan napsuden, gaꞌi teꞌed tasulutde Tuhanin.
9Saguwaꞌ kaꞌam dumaꞌin ne tinuhutbin kinabayaꞌan napsubin. Iye tinuhutbin kinabayaꞌan Niyawa Tuhanin bang bennal du weꞌ luꞌu ne iye patennaꞌ dem ateybi. Sine-sine gaꞌi palaꞌihan Niyawa Tuhanin, iye pinapitu Almasihin, dumaꞌin iye sukuꞌ pu Isa Almasi. 10Saguwaꞌ bang luꞌu Almasi dem ateybi, bisan sukuꞌ baranbin matey sabab dusebin, saguwaꞌ urungan Niyawa Sutsihin du kaꞌam umul salama-lama peggeꞌ inampun ne kaꞌam duk kinimmatan ne kaꞌam bentel weꞌ Tuhanin. 11Bang bennal luꞌu patennaꞌ dem ateybi Niyawa Sutsihin, pakellum Tuhanin du isab kaꞌam kuweꞌ pamakellumne Isa Almasi amban kamateynen.
12Hangkan hep meꞌ kapungtinaꞌihanku masandel pu si Isa Almasihin, niyaꞌ teꞌed subey hinangte duk inin dumaꞌin paꞌin nuhut kinabayaꞌan napsuten. 13Peggeꞌ bang asal tuhutte kinabayaꞌan napsuten, sukuꞌten matey duk tapī si narkaꞌ. Saguwaꞌ bang lebbahante ne teꞌed meꞌ hinangante malaꞌatin weꞌ tabang Niyawa Tuhan si kitehin, ellum du kite salama-lama. 14Peggeꞌ sasuku binoꞌo-boꞌo weꞌ Niyawa Tuhanin bennal siye meꞌ anak Tuhanin. 15Peggeꞌ pinangurung weꞌ Tuhanin si kite bi Niyawanen, gaꞌi ne kite bi subey tinalew kuweꞌ banyagaꞌin tinalew si amunen. Saguwaꞌ pinangurung weꞌ ne Niyawanen si kite bi duk kite bi manjari meꞌ anakne. Hangkan makajari Tuhanin ēnante bi Samate bi. 16Pinabugtuꞌ weꞌ Niyawa Tuhanin dem ateyte bi weꞌ kite bi asal meꞌ anak Tuhanin. 17Duk peggeꞌ pinaganak kite bi weꞌ Tuhanin, tasangkate bi du si ellew dambuli kēmon meꞌ inennaꞌne para si meꞌ pinaganaknen. Duk taga bahagiꞌ du isab kite bi si kēmon inennaꞌ Tuhan para pu Isa Almasihin. Bang tasandalte bi kasigpitanin kuweꞌ panandal si Isahin, tumuhut du isab kite bi si iye pinahadje.
Pahadje Tuhanin du kite bi si pasōngan
18Kabugtuꞌanku weꞌ kasigpitan sinandalante bi kuweꞌitu inin kuweꞌ manggaꞌ du hadja bang pikilte bi kēgten bi si pasōngan bang ne kite bi pahadje Tuhanin. 19Dumaꞌin hadja kite bi, manusiyaꞌin, saguwaꞌ kēmon pinapanjari Tuhanin agad-agadde ellew si pasōngan inin bang pahadje Tuhanin ne meꞌ anaknen. 20Kēmon bakas pinapanjari Tuhanin, dumaꞌin ne kuweꞌitu kuweꞌ tagnaꞌin. Saguwaꞌ dumaꞌin amban salaꞌde hangkan siye dumaꞌin kuweꞌ hāpan tagnaꞌin saguwaꞌ amban bayaꞌ Tuhanin du. Saguwaꞌ meꞌ pinapanjari Tuhan inin 21kuweꞌ ngase-ngase teꞌed weꞌ magkahāp du siye si pasōngan. Kuweꞌitu kēmon pinapanjari Tuhanin sukuꞌnen matey. Saguwaꞌ ngabaꞌahu siye kēmon bang tekka ellew pamahadje Tuhan meꞌ anaknen. Gaꞌi ne siye matey saguwaꞌ ngahāp ne teꞌed siye ellew miyaꞌan. 22Kataꞌuhante weꞌ kemuwe amban pagduse Apuꞌ Adamin sampay kuweꞌitu, kuweꞌ magtiksaꞌ kēmon bayuꞌ-bayuꞌan bakas pinapanjari Tuhanin, kuweꞌ dende peddiꞌan bang sōng nganak. 23Dumaꞌin hadja sinduwe meꞌ pinapanjari Tuhanin magtiksaꞌin saguwaꞌ sampay kite bi meꞌ pangurungan Tuhan Niyawanen, iye lasa-lasahanne tagnaꞌin, magtiksaꞌ du isab kite bi sābute bi mangagad-ngagad ellew pamaꞌahu Tuhan baranten bi duk ne kite bi gaꞌi saki-saki duk matey. Bang tekka ne ellew miyaꞌan, pastiꞌ ne teꞌed weꞌ asal paganakne ne kite bi. 24Iye hep inin inase-aseten bi kemuwe sandel kite bi pu Isa Almasi. Saguwaꞌ bang tuman ne inase-aseten, gaꞌi ne kite subey ngase-ngase. Ngase-ngase pe ke kite bang tuman ne inase-aseten? 25Saguwaꞌ peggeꞌ gaꞌ pe tuman inase-aseten, agad-agadte ne paꞌin katumannen duk gaꞌi kite jumuꞌ ngagad-ngagad.
26Duk tabangan Niyawa Sutsihin isab kite bi bang lamma sandelte bi si Tuhanin duk asigne ateyten bi. Peggeꞌ bang kite bi ngampun-ngampun bu gaꞌi kataꞌuhante bi bang ine patut pinākuten bi atawa bang saꞌingge pamākuten bi, manjari Niyawa Sutsi dem ateyten bi māku-māku si Tuhan para si kite bi bu gaꞌi kataꞌuhante bi bang saꞌingge. 27Tuhanin mangataꞌuhan dem ateyten, kataꞌuhanne isab bang ine hāti pinaꞌin Niyawa Sutsihin. Peggeꞌ bang Niyawa Sutsihin ne mamāku para si kitehin bi, meꞌ masandel pu si Isahin, kēmon pinākunen asal iye du isab kinabayaꞌan Tuhan si kitehin bi.
28Kataꞌuhante weꞌ bang malasa kite si Tuhan duk tapeneꞌ weꞌ Tuhanin ngahinang kinabayaꞌannen, ine-ine talabeyte hāp-laꞌat tabangan Tuhanin du kite duk meꞌ talabeyte miyaꞌan moleꞌ si kahāpante. 29Meꞌ andang tapeneꞌ weꞌ Tuhanin, pinaꞌil siye isab weꞌ Tuhanin weꞌ subey siye manjari kuweꞌ Anaknen, si Isa, supaya kēmon meꞌ tapeneꞌnen kuweꞌ magpungtinaꞌi duk sakaden si Isa. 30Duk kēmon meꞌ pinaꞌilnen tinawag weꞌ Tuhanin nuhut iye. Duk meꞌ tinawagnen inampun duk kinimmatan bentel weꞌ ne. Duk meꞌ kinimmatanne mabentelin pahadjene isab.
Pakitehan si Isa Almasi bang saꞌingge hadje lasa Tuhanin si kite bi
31Bang pikilte bi bakas pinaꞌinku miyaꞌan, kataꞌuhante bi weꞌ gaꞌ teꞌed niyaꞌ makadaꞌag kite bi peggeꞌ bēbbegan Tuhanin kite bi. 32Tuhanin gaꞌ kayimananne Anaknen saguwaꞌ paglillaꞌne pinapatey si kahāpante bi kēmon. Bang tahinangne miyaꞌan kabugtuꞌante bi weꞌ asal urunganne kite bi kēmon masukal si kitehin bi. 33Kite bi meꞌ tapeneꞌ Tuhan hinangne meꞌ aꞌanen, niyaꞌ ke makatuksaꞌ kite bi weꞌ kapagduse kite bi? Gaꞌ niyaꞌ, peggeꞌ bakas inampun ne kite bi duk kinimmatan ne kite bi bentel weꞌ Tuhanin. 34Hangkan gaꞌ niyaꞌ kapagpaꞌin weꞌ subey kite bi ilegga duk tapī si narkaꞌ sabab duseten bi. Peggeꞌ Isa Almasi bakas ne matey sabab duseten bi duk dumaꞌin hadja iyan, saguwaꞌ pinakellum isab iye balik weꞌ Tuhanin duk pinahadje iye weꞌ ne laꞌi si kanawananne, lugal tamanan mabangsahanin. Iye isab sūhanten bi laꞌi si Tuhanin mēbbegan kite bi. 35Hangkan hep kabugtuꞌante weꞌ bisan ine umantag si kite, asal kalasahan Isa Almasi kite. Bang kite dem kasusehan atawa dem katiksaꞌan atawa dem kabinasahan, dumaꞌin hātinen weꞌ gaꞌi ne kite kalasahanne. Bisan kite kakulangan kinakan duk semmek, bisan kite dem kasiya-siyahan atawa bisan kite pinapatey, asal gaꞌi usaꞌ lasa Almasi si kitehin bi. 36Meꞌ katiksaꞌante inin tasulat dem kitab, pinaꞌin,
“Sabab panuhut kami si kaꞌuhin, Tuhan, luwal kami siya-siya sōng pinapatey. Meꞌ aꞌahin pangimmatde kamihin kuweꞌ kami meꞌ bili-bili sōng sinumbaliꞌ.”
37Saguwaꞌ bisan kuweꞌ inin pagtiksaꞌten bi, gaꞌi kite bi daꞌag peggeꞌ kalasahan Isa Almasi kite bi. 38Peggeꞌ kataꞌuhanku teꞌed weꞌ asal kalasahanne kite bi manamal. Bisan kite ellum atawa matey, kalasahanne kite. Gaꞌ niyaꞌ makaꞌānan lasane si kitehin. Bisan pe malaꞌikat atawa meꞌ seyitan, gaꞌ niyaꞌ balakatde ngānan lasanen amban kite. Ine-ine talabeyte kuweꞌitu atawa si pasōngan, masi kite kalasahanne. 39Gaꞌ niyaꞌ bisan ine diyataꞌ langit atawa dem dunya atawa ine-ine bakas pinapanjari weꞌ Tuhanin makasapeꞌ kite amban lasa Tuhanin, iye pinakitehan Isa Almasi, Panuhutanten bi.
Currently Selected:
Roma 8: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
Roma 8
8
Meꞌ aꞌa pinagbayaꞌan weꞌ Niyawa Sutsihin nuhut kinabayaꞌan Niyawa Sutsihin
1Manjari, kite bi, meꞌ magdambuwaꞌ duk Isa Almasihin, kuweꞌitu gaꞌi ne kite ilegga weꞌ Tuhanin. 2Peggeꞌ magdambuwaꞌ ne kite bi duk Isa Almasi, Niyawa Tuhanin ne magbayaꞌ si kitehin bi duk baꞌahuhanne ateyten bi. Hangkan gaꞌi ne kite bi tadaꞌag weꞌ duse. Duseten jānnen hangkan kite tapī si narkaꞌ. 3Gaꞌi kite lumuwas amban duseten bi sabab panuhutte saraꞌin peggeꞌ manusiyaꞌ du hadja kite bi duk gaꞌi tatuhutte saraꞌin. Saguwaꞌ niyaꞌ tahinang Tuhanin supaya ne kite bi gaꞌi taboꞌo weꞌ disalite bi magdusehin. Pinapitu weꞌ ne Anaknen inanakan tuꞌu si dunya magbaran manusiyaꞌ duk addatnen kuweꞌ addatten bi saguwaꞌ gaꞌ iye taboꞌo magduse. Ilegga iye sabab duseten bi duk matey iye supaya kite bi gaꞌi ne taboꞌo weꞌ disalite bi magdusehin. 4Hininang inin weꞌ Tuhanin supaya asal tatuhutte meꞌ pangandaꞌakan dem saraꞌnen duk bentel ne meꞌ hinanganten. Peggeꞌ bang ne kite sandel pu si Isa, gaꞌi ne tuhutte kinabayaꞌan napsuten. Saguwaꞌ iye tinuhutten meꞌ kinabayaꞌan Niyawa Sutsihin. Hangkan hep bang tuhutte panoloꞌ Niyawa Sutsihin, asal tatuhutte meꞌ pangandaꞌakan dem saraꞌ Tuhanin. 5Meꞌ aꞌa pinagbayaꞌan weꞌ napsuden, iye luwal pinikilden nuhut kinabayaꞌan napsuden. Saguwaꞌ meꞌ aꞌa pinagbayaꞌan weꞌ Niyawa Sutsihin iye luwal pinikilden nuhut kinabayaꞌan Niyawa Sutsihin. 6Bang aꞌahin luwal pinikilnen nuhut napsunen, sudda matey du iye duk tapī si narkaꞌ. Saguwaꞌ bang aꞌahin iye luwal pinikilnen nuhut kinabayaꞌan Niyawa Sutsihin, urungan Tuhanin iye umul salama-lama duk sanyang ne ateynen. 7Peggeꞌ bang aꞌahin iye luwal pinikilnen nuhut kinabayaꞌan napsunen, kuntarahanne Tuhanin. Gaꞌi iye nuhut saraꞌ Tuhanin duk asal gaꞌi tatuhutne. 8Meꞌ manuhut kinabayaꞌan napsuden, gaꞌi teꞌed tasulutde Tuhanin.
9Saguwaꞌ kaꞌam dumaꞌin ne tinuhutbin kinabayaꞌan napsubin. Iye tinuhutbin kinabayaꞌan Niyawa Tuhanin bang bennal du weꞌ luꞌu ne iye patennaꞌ dem ateybi. Sine-sine gaꞌi palaꞌihan Niyawa Tuhanin, iye pinapitu Almasihin, dumaꞌin iye sukuꞌ pu Isa Almasi. 10Saguwaꞌ bang luꞌu Almasi dem ateybi, bisan sukuꞌ baranbin matey sabab dusebin, saguwaꞌ urungan Niyawa Sutsihin du kaꞌam umul salama-lama peggeꞌ inampun ne kaꞌam duk kinimmatan ne kaꞌam bentel weꞌ Tuhanin. 11Bang bennal luꞌu patennaꞌ dem ateybi Niyawa Sutsihin, pakellum Tuhanin du isab kaꞌam kuweꞌ pamakellumne Isa Almasi amban kamateynen.
12Hangkan hep meꞌ kapungtinaꞌihanku masandel pu si Isa Almasihin, niyaꞌ teꞌed subey hinangte duk inin dumaꞌin paꞌin nuhut kinabayaꞌan napsuten. 13Peggeꞌ bang asal tuhutte kinabayaꞌan napsuten, sukuꞌten matey duk tapī si narkaꞌ. Saguwaꞌ bang lebbahante ne teꞌed meꞌ hinangante malaꞌatin weꞌ tabang Niyawa Tuhan si kitehin, ellum du kite salama-lama. 14Peggeꞌ sasuku binoꞌo-boꞌo weꞌ Niyawa Tuhanin bennal siye meꞌ anak Tuhanin. 15Peggeꞌ pinangurung weꞌ Tuhanin si kite bi Niyawanen, gaꞌi ne kite bi subey tinalew kuweꞌ banyagaꞌin tinalew si amunen. Saguwaꞌ pinangurung weꞌ ne Niyawanen si kite bi duk kite bi manjari meꞌ anakne. Hangkan makajari Tuhanin ēnante bi Samate bi. 16Pinabugtuꞌ weꞌ Niyawa Tuhanin dem ateyte bi weꞌ kite bi asal meꞌ anak Tuhanin. 17Duk peggeꞌ pinaganak kite bi weꞌ Tuhanin, tasangkate bi du si ellew dambuli kēmon meꞌ inennaꞌne para si meꞌ pinaganaknen. Duk taga bahagiꞌ du isab kite bi si kēmon inennaꞌ Tuhan para pu Isa Almasihin. Bang tasandalte bi kasigpitanin kuweꞌ panandal si Isahin, tumuhut du isab kite bi si iye pinahadje.
Pahadje Tuhanin du kite bi si pasōngan
18Kabugtuꞌanku weꞌ kasigpitan sinandalante bi kuweꞌitu inin kuweꞌ manggaꞌ du hadja bang pikilte bi kēgten bi si pasōngan bang ne kite bi pahadje Tuhanin. 19Dumaꞌin hadja kite bi, manusiyaꞌin, saguwaꞌ kēmon pinapanjari Tuhanin agad-agadde ellew si pasōngan inin bang pahadje Tuhanin ne meꞌ anaknen. 20Kēmon bakas pinapanjari Tuhanin, dumaꞌin ne kuweꞌitu kuweꞌ tagnaꞌin. Saguwaꞌ dumaꞌin amban salaꞌde hangkan siye dumaꞌin kuweꞌ hāpan tagnaꞌin saguwaꞌ amban bayaꞌ Tuhanin du. Saguwaꞌ meꞌ pinapanjari Tuhan inin 21kuweꞌ ngase-ngase teꞌed weꞌ magkahāp du siye si pasōngan. Kuweꞌitu kēmon pinapanjari Tuhanin sukuꞌnen matey. Saguwaꞌ ngabaꞌahu siye kēmon bang tekka ellew pamahadje Tuhan meꞌ anaknen. Gaꞌi ne siye matey saguwaꞌ ngahāp ne teꞌed siye ellew miyaꞌan. 22Kataꞌuhante weꞌ kemuwe amban pagduse Apuꞌ Adamin sampay kuweꞌitu, kuweꞌ magtiksaꞌ kēmon bayuꞌ-bayuꞌan bakas pinapanjari Tuhanin, kuweꞌ dende peddiꞌan bang sōng nganak. 23Dumaꞌin hadja sinduwe meꞌ pinapanjari Tuhanin magtiksaꞌin saguwaꞌ sampay kite bi meꞌ pangurungan Tuhan Niyawanen, iye lasa-lasahanne tagnaꞌin, magtiksaꞌ du isab kite bi sābute bi mangagad-ngagad ellew pamaꞌahu Tuhan baranten bi duk ne kite bi gaꞌi saki-saki duk matey. Bang tekka ne ellew miyaꞌan, pastiꞌ ne teꞌed weꞌ asal paganakne ne kite bi. 24Iye hep inin inase-aseten bi kemuwe sandel kite bi pu Isa Almasi. Saguwaꞌ bang tuman ne inase-aseten, gaꞌi ne kite subey ngase-ngase. Ngase-ngase pe ke kite bang tuman ne inase-aseten? 25Saguwaꞌ peggeꞌ gaꞌ pe tuman inase-aseten, agad-agadte ne paꞌin katumannen duk gaꞌi kite jumuꞌ ngagad-ngagad.
26Duk tabangan Niyawa Sutsihin isab kite bi bang lamma sandelte bi si Tuhanin duk asigne ateyten bi. Peggeꞌ bang kite bi ngampun-ngampun bu gaꞌi kataꞌuhante bi bang ine patut pinākuten bi atawa bang saꞌingge pamākuten bi, manjari Niyawa Sutsi dem ateyten bi māku-māku si Tuhan para si kite bi bu gaꞌi kataꞌuhante bi bang saꞌingge. 27Tuhanin mangataꞌuhan dem ateyten, kataꞌuhanne isab bang ine hāti pinaꞌin Niyawa Sutsihin. Peggeꞌ bang Niyawa Sutsihin ne mamāku para si kitehin bi, meꞌ masandel pu si Isahin, kēmon pinākunen asal iye du isab kinabayaꞌan Tuhan si kitehin bi.
28Kataꞌuhante weꞌ bang malasa kite si Tuhan duk tapeneꞌ weꞌ Tuhanin ngahinang kinabayaꞌannen, ine-ine talabeyte hāp-laꞌat tabangan Tuhanin du kite duk meꞌ talabeyte miyaꞌan moleꞌ si kahāpante. 29Meꞌ andang tapeneꞌ weꞌ Tuhanin, pinaꞌil siye isab weꞌ Tuhanin weꞌ subey siye manjari kuweꞌ Anaknen, si Isa, supaya kēmon meꞌ tapeneꞌnen kuweꞌ magpungtinaꞌi duk sakaden si Isa. 30Duk kēmon meꞌ pinaꞌilnen tinawag weꞌ Tuhanin nuhut iye. Duk meꞌ tinawagnen inampun duk kinimmatan bentel weꞌ ne. Duk meꞌ kinimmatanne mabentelin pahadjene isab.
Pakitehan si Isa Almasi bang saꞌingge hadje lasa Tuhanin si kite bi
31Bang pikilte bi bakas pinaꞌinku miyaꞌan, kataꞌuhante bi weꞌ gaꞌ teꞌed niyaꞌ makadaꞌag kite bi peggeꞌ bēbbegan Tuhanin kite bi. 32Tuhanin gaꞌ kayimananne Anaknen saguwaꞌ paglillaꞌne pinapatey si kahāpante bi kēmon. Bang tahinangne miyaꞌan kabugtuꞌante bi weꞌ asal urunganne kite bi kēmon masukal si kitehin bi. 33Kite bi meꞌ tapeneꞌ Tuhan hinangne meꞌ aꞌanen, niyaꞌ ke makatuksaꞌ kite bi weꞌ kapagduse kite bi? Gaꞌ niyaꞌ, peggeꞌ bakas inampun ne kite bi duk kinimmatan ne kite bi bentel weꞌ Tuhanin. 34Hangkan gaꞌ niyaꞌ kapagpaꞌin weꞌ subey kite bi ilegga duk tapī si narkaꞌ sabab duseten bi. Peggeꞌ Isa Almasi bakas ne matey sabab duseten bi duk dumaꞌin hadja iyan, saguwaꞌ pinakellum isab iye balik weꞌ Tuhanin duk pinahadje iye weꞌ ne laꞌi si kanawananne, lugal tamanan mabangsahanin. Iye isab sūhanten bi laꞌi si Tuhanin mēbbegan kite bi. 35Hangkan hep kabugtuꞌante weꞌ bisan ine umantag si kite, asal kalasahan Isa Almasi kite. Bang kite dem kasusehan atawa dem katiksaꞌan atawa dem kabinasahan, dumaꞌin hātinen weꞌ gaꞌi ne kite kalasahanne. Bisan kite kakulangan kinakan duk semmek, bisan kite dem kasiya-siyahan atawa bisan kite pinapatey, asal gaꞌi usaꞌ lasa Almasi si kitehin bi. 36Meꞌ katiksaꞌante inin tasulat dem kitab, pinaꞌin,
“Sabab panuhut kami si kaꞌuhin, Tuhan, luwal kami siya-siya sōng pinapatey. Meꞌ aꞌahin pangimmatde kamihin kuweꞌ kami meꞌ bili-bili sōng sinumbaliꞌ.”
37Saguwaꞌ bisan kuweꞌ inin pagtiksaꞌten bi, gaꞌi kite bi daꞌag peggeꞌ kalasahan Isa Almasi kite bi. 38Peggeꞌ kataꞌuhanku teꞌed weꞌ asal kalasahanne kite bi manamal. Bisan kite ellum atawa matey, kalasahanne kite. Gaꞌ niyaꞌ makaꞌānan lasane si kitehin. Bisan pe malaꞌikat atawa meꞌ seyitan, gaꞌ niyaꞌ balakatde ngānan lasanen amban kite. Ine-ine talabeyte kuweꞌitu atawa si pasōngan, masi kite kalasahanne. 39Gaꞌ niyaꞌ bisan ine diyataꞌ langit atawa dem dunya atawa ine-ine bakas pinapanjari weꞌ Tuhanin makasapeꞌ kite amban lasa Tuhanin, iye pinakitehan Isa Almasi, Panuhutanten bi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.