Roma 5

Maghāp ne kite bi duk Tuhanin

1Manjari, peggeꞌ ubus ne kite bi inampun duk kinimmatan bentel weꞌ Tuhanin peggeꞌ sandel kite bi pu Isa Almasi, hangkan maghāp ne kite bi duk iye sabab bakas tahinang Isa Almasi, Panuhutanten bi. 2Pakitehan Isa Almasi si kite bi lasa duk aseꞌ Tuhan si kitehin bi pagsakaliꞌ kite bi sandel si iye duk kuweꞌitu kinimmatan ne kite bi bentel weꞌ Tuhanin. Magkēg isab kite bi peggeꞌ bugtuꞌ inase-aseten bi weꞌ magtuhut du kite bi duk Tuhanin duk pahadjene du kite bi laꞌi si surgaꞌ. 3Dumaꞌin hadja miyaꞌan, saguwaꞌ kēgan isab kite bi bisan kite bi kasigpitan peggeꞌ kataꞌuhante bi weꞌ sabab sigpitten bi ujud taꞌu kite bi magsandal. 4Bang tasandalte bi meꞌ kasigpitanten bi, kasulutan Tuhanin si kite bi. Duk bang kataꞌuhante bi weꞌ kasulutan Tuhanin si kite bi, kabugtuꞌante bi weꞌ niyaꞌ hāp ase-asete bi amban Tuhan. 5Kabugtuꞌante bi weꞌ asal tumanan Tuhanin du inase-asete bi amban iyehin peggeꞌ kataꞌuhante bi dem ateyte bi weꞌ malasa teꞌed Tuhanin si kite bi. Pinabugtuꞌ inin si kite bi weꞌ Niyawa Sutsi pinangurung Tuhan si kitehin bi.

6Asal malasa teꞌed Tuhanin si kite bi. Matuꞌuhin gaꞌ teꞌed niyaꞌ tahinangte bi supaya kite bi lumuwas amban duseten bi. Saguwaꞌ pagtekka ellew pangeddew Tuhanin, matey si Isa Almasi sababte bi meꞌ aꞌa dusehanin. 7Hunit aꞌahin maglillaꞌ matey ngagantiꞌan aꞌa bentel. Inday, kaw isab niyaꞌ makatawakkal matey ngagantiꞌan aꞌa hāp manamal. 8Saguwaꞌ pinakitehan weꞌ Tuhanin bang saꞌingge hadje lasane si kitehin bi, sabab dinaꞌak weꞌ ne pitu Isa Almasi matey sababte bi sābute bi pe magdusehin. 9Manjari bang sabab kamateynen puꞌunte bi inampun duk kinimmatan kite bi bentel weꞌ Tuhanin, pasōng ne asal bugtuꞌ weꞌ timbul kite bi weꞌ Isa Almasi duk gaꞌi ne kite bi tewwaꞌ mulkaꞌ Tuhanin si ellew dambuli. 10Matuꞌuhin kuntarahante bi Tuhanin. Saguwaꞌ kuweꞌitu gaꞌi ne kite bi magbanta duk iye, peggeꞌ hāp Tuhanin ne kite bi sabab bakas ne Anaknen matey sababte bi. Bang sabab kamatey Anaknen hāp Tuhanin ne kite bi, pasōng ne bugtuꞌ weꞌ timbulne du kite bi peggeꞌ ellum ne balik Isa Almasi, Anakne miyaꞌan. 11Duk dumaꞌin hadja iyan. Saguwaꞌ pinakēg isab kite bi weꞌ Tuhanin peggeꞌ sabab Isa Almasi, Panuhutanten bi, hināp ne kite bi weꞌ ne.

Magbiddaꞌ tahinang Apuꞌ Adamin duk tahinang Isa Almasihin

12Na, weꞌey enteꞌ niyaꞌ duse si dunya? Inin kahalannen: tagnaꞌ, dambuwaꞌ du hadja manusiyaꞌ magdusehin, si Apuꞌ Adam. Iye miyaꞌan tagnaꞌan duse si dunyahin. Peggeꞌ niyaꞌ ne duse si dunya, niyaꞌ isab kamatey dem dunya. Hangkan hep kēmon manusiyaꞌin ujud matey peggeꞌ kēmon magduse. 13Gaꞌ pe saraꞌin pangurung pu si Musa, andang ne meꞌ aꞌahin magduse. Saguwaꞌ bang gaꞌ niyaꞌ saraꞌ, gaꞌ niyaꞌ makajari tinuksaꞌ weꞌ langgalanne saraꞌin. 14Saguwaꞌ peggeꞌ dusehin moꞌo kamatey, hangkan kemuwe amban Apuꞌ Adam sampay pī pu si Musa, kēmon aꞌahin matey bisan du siye gaꞌ kapagduse kuweꞌ pagduse Apuꞌ Adamin sakaliꞌ langgalanne pangandaꞌakan Tuhanin.

Niyaꞌ kuweꞌ pagsaliꞌan tahinang Apuꞌ Adamin duk tahinang Almasihin, iye dinaꞌak Tuhan mapitu si dunyahin. Saliꞌ-saliꞌ siye peggeꞌ tahinangden niyaꞌ kaꞌujudanne si manusiyaꞌ. 15Saguwaꞌ magbiddaꞌ siye peggeꞌ gaꞌi tapagsaliꞌte duse tahinang Apuꞌ Adamin duk lasa-lasahan Tuhanin. Peggeꞌ weꞌ sabab duse tahinang dambuwaꞌ aꞌa hadja, Apuꞌ Adam, kēmon aꞌahin sukuꞌnen matey. Saguwaꞌ pasōng hadje kahāpan tahinang dambuwaꞌ aꞌa isab, Isa Almasi, peggeꞌ sabab tahinangnen ekka aꞌa makasangka lasa-lasahan Tuhanin, hātinen lasane duk aseꞌne si siyehin. 16Lasa-lasahan Tuhanin gaꞌi magsaliꞌ duk kaꞌujudan duse Apuꞌ Adamin. Kaꞌujudan duse Apuꞌ Adam dambuwaꞌ miyaꞌan, ilaboꞌan hukuman weꞌ Tuhanin kēmon manusiyaꞌin weꞌ dusehan duk subey ilegga. Saguwaꞌ iye inin lasa-lasahan Tuhanin, bisan kēmon aꞌahin magduse, inampun siye duk kinimmatan bentel weꞌ ne. 17Kaꞌujudan lasa duk aseꞌ Tuhan si kitehin pasōng pe amban kaꞌujudan duse Apuꞌ Adamin. Sabab duse Apuꞌ Adamin, kēmon aꞌahin sukuꞌnen matey. Saguwaꞌ meꞌ manayimaꞌ lasa duk aseꞌ Tuhanin kinimmatan ne bentel weꞌ Tuhanin, iye kuweꞌ lasa-lasahan Tuhanin. Siye inin ellum si surgaꞌ gaꞌ tamanan duk patuhut siye pu si Isa Almasi magbayaꞌ peggeꞌ sandel siye pu Isa Almasi.

18Manjari, sabab dambuwaꞌ duse hadja, kēmon manusiyaꞌin sukuꞌnen ilegga weꞌ Tuhanin. Damikkiyan isab sabab dambuwaꞌ hinangan bentel, kēmon manusiyaꞌin makajari inampun duk kinimmatan bentel weꞌ Tuhanin duk ellum siye gaꞌ tamanan. 19Sabab gaꞌ panuhut dambuwaꞌ aꞌa pangandaꞌakan Tuhanin, hangkan kēmon manusiyaꞌin dusehan. Saguwaꞌ sabab panuhut dambuwaꞌ aꞌa pangandaꞌakan Tuhanin, hangkan kēmon manusiyaꞌin makajari kinimmatan bentel weꞌ Tuhanin.

20Gaꞌ pe pangurung Tuhanin saraꞌin, andang ne meꞌ aꞌahin magduse. Pinangurung weꞌ Tuhanin saraꞌin supaya kataꞌuhande weꞌ pasōng ngaꞌekka duseden. Saguwaꞌ bisan pasōng ngaꞌekka duse meꞌ aꞌahin, pasōng pe teꞌed Tuhanin malasa duk maꞌaseꞌ si meꞌ aꞌa madusehanin. 21Manjari, matuꞌuhin basag dusehin, hangkan kēmon manusiyaꞌin magduse duk matey siye. Saguwaꞌ kuweꞌitu, hawal lasa duk aseꞌ Tuhanin, sasuku masandel pu si Isa Almasihin inampun du duk kinimmatan bentel weꞌ Tuhanin. Duk urunganne siye umul gaꞌ tamananne si surgaꞌ sabab bakas tahinang Isa Almasi, Panuhutanten bi.

Currently Selected:

Roma 5: yakV

Highlight

Copy