Roma 3

1Kaw niyaꞌ magpaꞌin weꞌ gaꞌ niyaꞌ kahāpanne bang kite bangsa Yahudi duk bang tuhutte addat magislamin. 2Saguwaꞌ ekka kahāpanne. Kaꞌissaꞌ, si meꞌ Yahudihin hep pinangandel weꞌ Tuhanin lapalnen supaya tuhutde duk akade si meꞌ aꞌa. 3Kaw paꞌinbi, “Saguwaꞌ gaꞌ du tuhut meꞌ sinduwehin lapal Tuhanin.” Bennal iyan. Saguwaꞌ bisan gaꞌ tuhutde lapal Tuhan pinangandel si siyehin, dumaꞌin hātinen weꞌ gaꞌi kapangandelan Tuhanin duk weꞌ gaꞌi ne tumananne sanggupnen. 4Bisan du kēmon manusiyaꞌin dustaꞌan saguwaꞌ Tuhanin gaꞌi magdustaꞌ. Ine-ine bissāne tumananne teꞌed. Tasulat dem kitab sabab inin, pinaꞌin,

“Ine-ine bissānu, Tuhan, asal toꞌo du, hangkan kataꞌuhan weꞌ bentel kew.

Duk bang niyaꞌ nallaꞌ kaꞌu ujud kataꞌuhan du weꞌ gaꞌ niyaꞌ sāꞌnu.”

5Kaw paꞌin meꞌ sinduwehin, “Bang kite maghinang laꞌat, hāp isab iyan peggeꞌ bang mikil meꞌ aꞌahin sabab meꞌ hinangante malaꞌatin duk meꞌ hinangan Tuhanin, tasabutde teꞌed weꞌ hāp manamal meꞌ hinangan Tuhanin, manjari pudjide iye. Na, bang pudjide Tuhanin sabab hinangante malaꞌatin, gaꞌi bentel Tuhanin bang leggane kite sabab malaꞌat bakas tahinangten.” (Iye inin bissā meꞌ sinduwehin.) 6Saguwaꞌ gaꞌi iyan toꞌo. Bang kite bi meꞌ magdusehin gaꞌi legga Tuhanin, hātinen gaꞌi iye bentel. Bu bang gaꞌi iye bentel, gaꞌi makajari weꞌ iye mangahukum kēmon manusiyaꞌin. 7Kaw paꞌinbi, “Aku, bisan ku magdustaꞌ, saguwaꞌ sabab pagdustaꞌkun pasōng du ngapastiꞌ weꞌ Tuhanin asal gaꞌi magdustaꞌ hangkan tapudji du iye. Na, weꞌey hukuman Tuhan si akuhin weꞌ dusehan ku bu tapudji du iye sabab dusekun?” 8Bang sa inin pagdaꞌawabin, hātinen subey kite magduse ne paꞌin supaya kaꞌujudannen hāp. Niyaꞌ meꞌ aꞌa ngalimutan aku duk tuksaꞌde ku weꞌ inin koꞌ panoloꞌkun. Legga Tuhanin du meꞌ aꞌa magpaꞌin inin duk patut siye ilegga.

Kēmon manusiyaꞌin dusehan

9Manjari, daꞌa kaꞌam magpaꞌin weꞌ kami meꞌ Yahudihin hāp si matahan Tuhan amban meꞌ bangsa dumaꞌin Yahudihin, peggeꞌ gaꞌi iyan toꞌo. Bakas tapapastiꞌku ne si kaꞌam weꞌ kēmon manusiyaꞌin, Yahudi ke atawa dumaꞌin Yahudi, saliꞌ-saliꞌ katagihan magduse. 10Tasulat hep dem kitab, pinaꞌin,

“Gaꞌ niyaꞌ aꞌa bentel si pagmatahan Tuhan, gaꞌ niyaꞌ bisan dambuwaꞌ.

11Gaꞌ niyaꞌ makahāti bang ine mabentelin duk gaꞌ niyaꞌ ngatu nuhut kinabayaꞌan Tuhanin.

12Kēmon manusiyaꞌin tayikutande Tuhanin. Gaꞌ ne niyaꞌ kagunahan Tuhanin si siye. Gaꞌ niyaꞌ maghinangan hāp, gaꞌ niyaꞌ bisan dambuwaꞌ.

13Gaꞌi hāp bissāden, kuweꞌ dalil kubul bewwan buhuk gaꞌ kadebbunan. Luwal siye magdustaꞌ. Meꞌ bissāde pangalimutde saweꞌden bisa manamal, kuweꞌ bisahan sawe bang nigtuk, peggeꞌ bissāden asal makapagkaꞌat.

14Luwal siye nuknaꞌan saweꞌden.

15Mura-mura siye mapeddiꞌ duk mapatey.

16Tungan-tungande ekka magkaꞌat weꞌ de, duk moꞌo siye kasusehan si meꞌ aꞌa.

17Gaꞌi siye mabayaꞌ magsulut-sinulut.

18Gaꞌ niyaꞌ talewde si Tuhan.”

19Kēmon pinaꞌin miyaꞌan sakup dem kitab. Kataꞌuhante bi weꞌ meꞌ aꞌa pangurungan saraꞌin subey siꞌ tuhutde pangandaꞌakan dem saraꞌin. Saguwaꞌ peggeꞌ gaꞌi tuhutde, hangkan gaꞌ ne niyaꞌ kapagdaꞌawa weꞌ gaꞌ du niyaꞌ dusede, peggeꞌ sabab saraꞌ inin tahāti meꞌ aꞌahin weꞌ kēmon manusiyaꞌ si dunyahin dusehan si matahan Tuhan duk subey siye legga Tuhanin. 20Peggeꞌ gaꞌ teꞌed niyaꞌ aꞌa inampun duk kinimmatan bentel weꞌ Tuhanin sabab panuhutne saraꞌ Tuhanin, saguwaꞌ sabab saraꞌ Tuhanin hep puꞌun kataꞌuhante bi weꞌ dusehan kite bi.

Pakitehan Tuhanin bang saꞌingge supaya duseten taꞌampun duk kimmatanne kite bentel

21Saguwaꞌ kuweꞌitu pinagintaꞌu ne weꞌ Tuhanin si kite bang saꞌingge duk duseten taꞌampun supaya ne kite kimmatanne bentel. Duk inin dumaꞌin sabab panuhutte saraꞌin. Tasulat du hep isab dem saraꞌ si Musahin duk dem kitab meꞌ kanabi-nabihanin bang saꞌingge duk duseten taꞌampun. 22Kuweꞌitu ampun Tuhanin meꞌ duseten duk kimmatanne kite bentel bang kite sandel pu Isa Almasi. Kēmon masandel pu Isa Almasihin asal kinimmatan bentel weꞌ Tuhanin bisan ine bangsanen. Gaꞌi siye pinagbiddaꞌ weꞌ Tuhanin. 23Saliꞌ-saliꞌ kēmon kapagduse, bisan dambuwaꞌ gaꞌ niyaꞌ siye tapudji weꞌ Tuhanin. 24Saguwaꞌ sabab lasa duk aseꞌ Tuhan si kitehin bi, iye lasa-lasahanne si kitehin bi, hangkan inampun weꞌ ne duseten bi duk kinimmatan kite bi bentel weꞌ ne, peggeꞌ sandel kite bi pu Isa Almasi, mangalekkat kite bi amban duseten bi. 25Pinapitu weꞌ Tuhanin Isa Almasi supaya iye matey duk buꞌus lahaꞌnen duk sabab kamateyne miyaꞌan inampun du duse meꞌ manusiyaꞌin bang siye sandel si iye. Hinang Tuhanin inin pamakitene weꞌ iye asal bentel. Matuꞌuhin sandalan Tuhanin hinangan meꞌ aꞌahin duk kuweꞌ gaꞌ hadja hinangne ine meꞌ duseden. 26Saguwaꞌ masi du legga Tuhanin bang niyaꞌ magduse. Hangkan hep leggane si Isa ngagantiꞌan kite bi bisan iye gaꞌ bakas magduse. Sabab inin niyaꞌ ne purebane weꞌ asal bentel teꞌed iye duk weꞌ kimmatanne bentel sasuku masandel pu Isa Almasihin.

27Manjari bang kuweꞌ inin, niyaꞌ ke pagabbute si pagmatahan Tuhan? Asal gaꞌ niyaꞌ. Peggeꞌ kinimmatan kite bentel weꞌ Tuhanin dumaꞌin sabab panuhutte saraꞌin saguwaꞌ sabab sandelte pu Isa Almasihin. 28Peggeꞌ kabugtuꞌanku weꞌ iye hadja puꞌunne hangkan kite inampun duk kinimmatan bentel weꞌ Tuhanin, weꞌ sabab sandelte pu Isa Almasihin, dumaꞌin sabab panuhutte saraꞌ Tuhanin. 29Hatu kannalbi weꞌ Tuhanin Tuhan meꞌ Yahudihin hadja. Saguwaꞌ iye matoꞌohin, Tuhanin Tuhan meꞌ bangsa dumaꞌin Yahudihin du isab. 30Peggeꞌ dambuwaꞌ du hadja Tuhanin, Yahudi duk dumaꞌin Yahudi, saliꞌ-saliꞌ siye inampun duk kinimmatan bentel weꞌ Tuhanin bang siye sandel pu Isa Almasi. 31Kaw paꞌinbi, “Na, bang sa iyan, hātinen peggeꞌ sandel kite bi pu Isa Almasi, gaꞌ ne niyaꞌ guna saraꞌ Tuhanin.” Dumaꞌin sa īꞌ. Bisan miyaꞌan, asal pasōng pe tuhutte saraꞌ Tuhanin.

Currently Selected:

Roma 3: yakV

Highlight

Copy