Markus 16
16
Si Isa ellum balik
(Mateo 28:1-8; Lukas 24:1-12; Yahiya 20:1-10)
1Pagpuwas ellew Sabtuꞌ, ellew liꞌihin, si Mariyam dende amban Magdalahin, duk si Salome, duk Mariyam saꞌi si Yakubin, melli laksiꞌ duk siye tapī ngalaksiꞌan bangkey si Isahin. 2Manjari salung-salung pe ellew Ahad, hap pī siye si kubul. 3Magbissā-bissā siye si lān, paꞌinde, “Sine mangaligidan batu tampeng lingabin duk kite bi dumiyalem?” Bu asal hadje batuhin. 4Pagtekkade laꞌi, takitede batuhin ubus ne iligidan. 5Padiyalem siye dem lingab. Ngite siye laꞌi dambuwaꞌ lella bataꞌ magsemmek poteꞌ ningkoloꞌ-ningkoloꞌ si antag kanawan. Takeddut teꞌed siye. 6Paꞌinne si siye, “Daꞌa kaꞌam tinalew. Kataꞌuhanku pihabi si Isa, aꞌa Nasaret bakas ilansang diyataꞌ olomin. Gaꞌ ne iye tuꞌu. Ellum ne iye balik. Payamanun bi bakas pamabākan iyehin. 7Na, pī ne kaꞌam,” paꞌinne, “akahanun bi meꞌ tindegnen duk si Petros weꞌ padehellu iye amban kaꞌam hap lahat Jalil. Kitebi du iye iyan laꞌi, sa pangakane kaꞌamin.” 8Manjari paluwas siye duk lahi siye amban kubulin peggeꞌ migpid siye hawal dahitden. Gaꞌ niyaꞌ bissāde bisan pu sine peggeꞌ tinalew siye.
Pakite si Isa pu si Mariyam, dende amban Magdalahin
(Mateo 28:9-10; Yahiya 20:11-18)
9Pagellum ne balik si Isa amban kamateynen ellew Ahad miyaꞌan, paguwaꞌ iye dehellu pu Mariyam dende amban Magdalahin, iye ne bakas pinaluwasanne seyitan pituꞌin. 10-11Manjari pī si Mariyam si meꞌ tindeg si Isahin sasangde laꞌi magsugul duk magtangis. Inakahan siye weꞌ Mariyam weꞌ ellum si Isa duk bakas takitene, saguwaꞌ gaꞌ siye kahagad.
Pakite si Isa si duwangan meꞌ tindegnen
(Lukas 24:13-35)
12Pagubus miyaꞌan, paguwaꞌ si Isa si duwangan tindegnen sasangde lumengngan hap lahat diyataꞌ. Saguwaꞌ pinda bantuknen. 13Manjari balik siye hap Awrusalam ngakahan meꞌ saweꞌden. Saguwaꞌ gaꞌ du isab siye kinahagad weꞌ de.
Pakite si Isa si meꞌ tindegne sampuk-dambuwaꞌin
(Mateo 28:16-20; Lukas 24:36-49; Yahiya 20:19-23; Hinangan 1:6-8)
14Ubus miyaꞌan, paguwaꞌ si Isa si sampūꞌ duk dambuwaꞌ tindegnen sasangde mangan. Inamāhan siye weꞌ ne peggeꞌ gaꞌ siye kahagad duk peggeꞌ tuwas kōkden. Paꞌinne, bisan siye inakahan weꞌ meꞌ bakas mangite iyehin weꞌ ellum ne iye balik amban kamateynen, gaꞌi du siye kahagad. 15Manjari paꞌinne si siye, “Pī kaꞌam si kēmon kalahat-lahatan si dunya duk mahalayakun bi aka-aka mahāpin si kēmon manusiyaꞌ. 16Sasuku makahagadin duk tapandi, tandaꞌ weꞌ sandel ne iye si aku,” paꞌin si Isa, “timbul du iye. Saguwaꞌ manggaꞌi makahagadin, tewwaꞌ hukuman Tuhanin du. 17Duk meꞌ masandel si akuhin, inurungan du balakat maghinang meꞌ hinangan makaꞌulaliꞌ. Makapaluwas siye iyan meꞌ seyitan weꞌ balakat ēnkun duk makabissā siye meꞌ bissā gaꞌi kataꞌuhande. 18Bang siye bessuwang makaꞌantan sawe, duk bang siye bessuwang makaꞌinum ine-ine gantaꞌ makamatey, gaꞌi du makaꞌine siye. Duk bang bettadde tanganden si meꞌ masakihin, kawuliꞌan du siye.”
Paꞌangkat si Isa hap surgaꞌin
(Lukas 24:50-53; Hinangan 1:9-11)
19Manjari pagubus Panuhutanin si Isa missā si meꞌ tindegnen, paꞌangkat iye hap surgaꞌ duk ningkoloꞌ iye si kanawanan Tuhanin, lugal mabangsahanin. 20Manjari lumengngan ne meꞌ tindegnen magmahalayak si kēmon kalahat-lahatan. Duk inurungan siye weꞌ Panuhutanin balakat maghinang meꞌ hinangan balakatan, supaya kataꞌuhan meꞌ aꞌahin weꞌ toꞌo meꞌ panoloꞌden.
Currently Selected:
Markus 16: yakV
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.