Mateo 27

Si Isa binoꞌo pu si Pilatus

(Markus 15:1; Lukas 23:1-2; Yahiya 18:28-32)

1Pagsalung ne magisun kēmon meꞌ nakuraꞌ imamin duk meꞌ kabahiꞌanin bang saꞌingge pamapateyde si Isahin. 2Manjari pagubus siye magisun, iningketan weꞌ de si Isa duk binoꞌo weꞌ de pī sinōngan pu si Pilatus, iye gubnul bangsa Romahin.

Matey si Judas

(Hinangan 1:18-19)

3Pagkataꞌuhan si Judas, iye mamuddihan si Isahin, weꞌ ubus ne hinukum si Isa pinapatey, magsusun teꞌed iye duk hap pī iye si meꞌ nakuraꞌ imamin duk meꞌ kabahiꞌanin mabalik tellumpūꞌ kayuꞌ sīn tuwasin. 4Paꞌinne si siye, “Bakas magduse ku, peggeꞌ binuddihan weꞌ ku aꞌa manggaꞌ niyaꞌ dusenen bu sōng iye pinapatey.” Nambung siye, paꞌinde, “Gaꞌ ne niyaꞌ lamud kami luꞌu. Bayaꞌ-bayaꞌnu ne.” 5Manjari ilakasan weꞌ si Judas sīnin dem langgal hadjehin bu tahalaꞌ iye. Pī iye mowet dine duk iye matey. 6Manjari tinimuk weꞌ meꞌ nakuraꞌ imamin sīnin duk paꞌinde, “Gaꞌi makajari sīn inin pinatampu si sīn langgalin peggeꞌ sīn inin bakas pagtangdan mapatey aꞌa.” 7Magisun siye weꞌ gunade sīn miyaꞌan pamellide bulak aꞌa maghinang-hinang paliyukin duk hinangde pagkubulan meꞌ aꞌa liyu-liyu. 8Hangkan hep bulak miyaꞌan inēnan “Bulak Lahaꞌ” sampay kuweꞌitu, peggeꞌ sīn pamelli iyehin sīn bakas pagtangdan mapatey. 9Manjari tuman ne bissā Nabi Jeremiya bakas sinulat dem kitabin, paꞌinne, “Eddoꞌde tellumpūꞌ kayuꞌ sīn tuwasin, iye halgaꞌ pagisunan meꞌ aꞌa Israꞌilin, 10duk gunade inin pamellide bulak aꞌa maghinang paliyukin. Inin bakas pangandaꞌakan aku weꞌ Tuhanin.”

Si Isa si harapan Pilatus

(Markus 15:2-5; Lukas 23:3-5; Yahiya 18:33-38)

11Manjari paglaꞌi ne si Isa si harapan gubnulin, tinilew iye weꞌ gubnulin, paꞌinne, “Sultan meꞌ Yahudihin ke kew?” Nambung si Isa, paꞌinne, “Iye du pinaꞌinnu iyan.” 12Saguwaꞌ sakaliꞌ iye tinuntutan weꞌ meꞌ nakuraꞌ imamin duk meꞌ kabahiꞌanin, gaꞌ iye nambung. 13Paꞌin Pilatus si iye, “Gaꞌi takalenu kēmon tuntutde si kaꞌu inin?” 14Saguwaꞌ gaꞌ nambung si Isa bisan da tegtang, hangkan ulaliꞌ teꞌed gubnulin.

Si Isa ilaboꞌan hukuman pinapatey

(Markus 15:6-15; Lukas 23:13-25; Yahiya 18:39–19:16)

15Na, kahabaꞌ tahun bang baytu Kādjaꞌan Pangesseban, iye addat gubnulin maluwas iye dambuwaꞌ pilisu sine-sine kabayaꞌan meꞌ aꞌahin pinaluwas. 16Masa miyaꞌan, niyaꞌ dambuwaꞌ pilisu bantu, inēnan Barabbas. 17Manjari pagtipun ne meꞌ aꞌa mabanesin, paꞌin Pilatus si siye, “Sine kabayaꞌanbi pinaluwaskun, Barabbas atawa si Isa inēnan Almasihin.” 18Hangkan siye tinilew weꞌ ne sa miyaꞌan peggeꞌ kataꞌuhanne weꞌ sinōngan si Isa weꞌ meꞌ nakuraꞌ meꞌ Yahudihin si iye peggeꞌ kinimbūhan si Isa weꞌ de.

19Sasang ningkoloꞌ Pilatus si siya paghukumanin, masan andanen si iye, paꞌinne, “Daꞌa kew maghinang ine-ine si aꞌa manggaꞌ niyaꞌ dusene iyan. Peggeꞌ dibuhiꞌ niyaꞌ taginepku duk magsandal ku teꞌed dem taginepkun sabab iye.”

20Saguwaꞌ meꞌ aꞌa mabanesin tasegeꞌ weꞌ meꞌ nakuraꞌ imamin duk meꞌ kabahiꞌanin weꞌ subey pākude pinaluwas si Barabbas duk si Isa subey pinapatey. 21Tinilew siye balik weꞌ Pilatus, paꞌinne, “Inggehin si duwangan inin kabayaꞌanbi pinaluwaskun?” “Si Barabbas,” paꞌinde. 22Paꞌin Pilatus si siye, “Na, inumeyku pu si Isa, inēnan Almasihin?” Paꞌinde kēmon, “Lansangun iye diyataꞌ olom.” 23Saguwaꞌ paꞌin Pilatus, “Weꞌey? Ine laꞌat tahinangnen?” Saguwaꞌ pasōng ne siye magkalolop, paꞌinde, “Lansangun iye diyataꞌ olom.”

24Kataꞌuhan Pilatus weꞌ gaꞌ niyaꞌ gunane magbissā namba, peggeꞌ sōng hewuhalaꞌ meꞌ aꞌa mabanesin. Manjari ngeddoꞌ iye boheꞌ duk kinosoꞌan weꞌ ne tangannen si harapan meꞌ aꞌahin, tandaꞌ weꞌ gaꞌ iye palamud si hinanganden. Duk paꞌinne, “Bang matey aꞌa inin gaꞌ niyaꞌ duseku. Kaꞌam dinusehin.” 25Nambung kēmon meꞌ aꞌahin, paꞌinde, “Ambat kamateynen moleꞌ si kami duk si meꞌ anak kamihin.” 26Ubus pinaluwas ne weꞌ Pilatus Barabbas pī si siye. Duk si Isa daꞌakne ilubakan ubus bu sinōngan ne iye weꞌ ne supaya iye talansang diyataꞌ olom.

Hinang dagey weꞌ meꞌ sundaluhin si Isa

(Markus 15:16-20; Yahiya 19:2-3)

27Manjari binoꞌo si Isa weꞌ meꞌ sundalu Pilatusin pī dem astanaꞌ gubnulin duk patipun pī kēmon sundalu da kumpaniyahin. 28Paglaꞌi siye kinuwantangan weꞌ de si Isa duk pinasemmekan iye weꞌ de semmek taluk kuweꞌ bantuk semmek sultan masaley. 29Ngalakal siye bāhan luhihan hininang kuweꞌ korona sultan bu pinapī weꞌ de si kōk si Isa. Ubus pinaꞌantanan weꞌ de si Isa kayu-kayu si tanganne kanawanin. Pagubus miyaꞌan pasujud siye magmā-mā mahadje iye duk paꞌinde, “Assalamu alaikum Sultan meꞌ Yahudihin.” 30Ubus pinagluraꞌan si Isa weꞌ de duk ineddoꞌ weꞌ de kayu-kayu inantanannen bu pinogpog weꞌ de kōknen. 31Pagubus iye hinangde dagey, iluwasan weꞌ de semmek taluk miyaꞌan duk pinasemmekan iye balik duk semmeknen. Ubus binoꞌo ne iye weꞌ de pabukut duk ne iye talansangde diyataꞌ olom.

Si Isa ilansang diyataꞌ olom

(Markus 15:21-32; Lukas 23:26-43; Yahiya 19:17-27)

32Sasangde paluwas amban puweblo, niyaꞌ tadugpakde lella amban lahat Kirene, ēnnen si Simon. Ginagahan iye weꞌ meꞌ sundaluhin dinaꞌak pinanangkit olom sōng pangalansangan si Isahin. 33Pagtekka siye laꞌi si lugal inēnan Golgota, hātinen, “Lahatan Bungkug,” 34niyaꞌ sōng pamaꞌinumde iye boheꞌ ubas sinagetan tambal paꞌit, saguwaꞌ pagtakinamne gaꞌ inumne. 35Pagubus ne si Isa ilansang diyataꞌ olom, maglegot meꞌ sundaluhin pagbahagiꞌde semmek si Isahin. 36Ubus ningkoloꞌ siye laꞌi manteyan iye. 37Sinulat laꞌi si atag kōk si Isa tuntut si iyehin, pinaꞌin, “Inin si Isa Sultan meꞌ Yahudihin.” 38Niyaꞌ duwangan mundu pinasumbayaꞌ pu si Isa ilansang diyataꞌ olomde. Dambuwaꞌ olomin pinatengge si kanawananne duk dambuwaꞌin si bibanganne. 39Meꞌ aꞌa mapalabeyin pinagsayehan iye weꞌ de. Magkeleng-keleng siye duk paꞌinde pu si Isa, 40“Aha, bakas paꞌinnu weꞌ talaraknu langgal hadjehin ubus bu patenggenu balik dem tellu ellew. Na, weꞌey gaꞌi tabangnu dinun? Bang bennal kew Anak Tuhanin, duwaꞌi kew amban diyataꞌ olom iyan.” 41Damikkiyan isab meꞌ nakuraꞌ imamin duk meꞌ guru si saraꞌ āgamahin duk meꞌ kabahiꞌanin pagudjiꞌande iye, paꞌinde, 42“Bakas tabangne aꞌa seddilihin, saguwaꞌ dinen gaꞌi tatabangne. Iye koꞌ sultan meꞌ Israꞌilin. Na, ambat iye duwaꞌi amban olom iyan kuweꞌitu duk kite bi kahagad si iye. 43Ngandel iye si Tuhan duk paꞌinne weꞌ Anak Tuhanin iye. Payamante bi koꞌ bang asal tabang Tuhanin iye.” 44Bisan meꞌ mundu ilansang pinasumbayaꞌ si iyehin matuk du isab missā-missāhan iye.

Kamatey si Isahin

(Markus 15:33-41; Lukas 23:44-49; Yahiya 19:28-30)

45Na, paglettu ne ellewin maglindem dem tibuꞌukan lahat miyaꞌan sampay lisag tellu kohapin. 46Paglisag tellu ne magkilahap si Isa papales, paꞌinne, “Eli, Eli, lama sabachthani?” Hātinen, “O Tuhanku, weꞌey ku pasagadannu?” 47Pagtakale inin weꞌ meꞌ aꞌa magtengge-tengge malaꞌihin, paꞌin sinduwehin, “Lingananne Nabi Eliyas.” 48Dangan siye magtawus magubas pī ngeddoꞌ kuweꞌ gapas bu ngaleglebanne magdem ininum. Ubus tinogsokan weꞌ ne miyaꞌan diyataꞌ kayu-kayu bu sinōngan weꞌ ne pamasessep pu si Isa. 49Saguwaꞌ sinduwehin paꞌinde, “Daꞌa kew dahuꞌ, payamante bi bang pitu ke Nabi Eliyas nabang iye.” 50Manjari magkilahap si Isa balik ubus bu bekkat ne napasnen.

51Magtawus garet semmek subuk hinang ellig dem langgal hadjehin. Garet paduwe amban diyataꞌ ngeregseꞌ diyawaꞌ. Niyaꞌ isab linug duk niyaꞌ meꞌ batu hadje kepak. 52Luka isab meꞌ lingab pagkubulanin duk ekka aꞌa mamatey makahagad si Tuhanin ellum balik. 53Pagellum ne si Isa balik, paluwas siye amban lingab pangubulan siyehin duk hap pī siye si Awrusalam. Ekka aꞌa ngite siye. 54Kapitanin duk meꞌ sundalune mamanteyan si Isahin, pagkitede linugin duk meꞌ maꞌumantagin, tinalew teꞌed siye duk paꞌinde, “Sabennal aꞌa inin Anak Tuhanin.”

55Ekka isab meꞌ dende laꞌi mayam-mayam amban katala-talahan. Bakas siye nuhut si Isa amban Jalil duk luwal iye tabangande. 56Dem grupu miyaꞌan laꞌi si Mariyam dende amban Magdalahin duk Mariyam saꞌi si Yakub duk si Yusupin duk anda Sebedehin.

Kinubul si Isa

(Markus 15:42-47; Lukas 23:50-56; Yahiya 19:38-42)

57Pagkohap ne niyaꞌ tekka pī dambuwaꞌ aꞌa dayahan, aꞌa Arimati, inēnan si Yusup. Tindeg si Isa du isab iye. 58Aꞌa miyaꞌan hap pī pu si Pilatus duk pināku weꞌ ne bangkey si Isahin. Ubus daꞌak Pilatus ne pangurung. 59Ineddoꞌ bangkeyin weꞌ si Yusup duk sinaput weꞌ ne duk kakanaꞌ. 60Ubus pinabāk weꞌ ne dem lingab batu pagkubulan baꞌahu du hinangne pamanyapne dine. Ngaligid iye batu hadje panampeng gawang lingabin, ubus bu tahalaꞌ ne iye. 61Si Mariyam, dende amban Magdalahin duk Mariyam sangeynen ningkoloꞌ laꞌi paharap si kubulin.

Guwaldiya si kubul si Isahin

62Pagellew dambuwaꞌin, hātinen ellew Sabtuꞌ, hap pī pu si Pilatus meꞌ nakuraꞌ imamin duk meꞌ Pariseohin. 63Paꞌinde, “Tuwan, taꞌesseb kami weꞌ bakas paꞌin aꞌa dustaꞌan miyaꞌan kaꞌellumnen, weꞌ bang iye matey, pagtaꞌabut tellu ellew, ellum iye balik. 64Hangkan daꞌakun ginuwaldiyahan kubulnen sampay katellu ellewnen, kaw hap pī meꞌ tindegnen nangkew bangkeynen ubus paꞌinde weꞌ ellum iye balik. Bang magdustaꞌ siye sa miyaꞌan pasōng teꞌed laꞌat pangakkalden.” 65Paꞌin Pilatus si siye, “Boꞌohun bi meꞌ guwaldiya iyan duk guwaldiyahanun bi kubulin manamal.” 66Manjari hap pī ne siye duk papīhande indan gawang lingabin supaya kataꞌuhan bang niyaꞌ bakas ngalukane duk daꞌakde meꞌ sundaluhin magguwaldiya.

Currently Selected:

Mateo 27: yakV

Highlight

Copy