Zakali 4

Kulakɛlɛmai lɔɔlusiɛi: Fitina zei anii ta wolive wulu felegɔi

1Geezuɠeelai nii é ɠɛni ɓɔɛzu pɔ̀, naa ʋaani ʋolu, é màaloɠa, ʋelei nu a ɗa ɲiimɛni nui maaloɠa la. 2É ɠɛni mà: «Leeni ɠa è kaazu?» Gè gooɠaaʋoteni, gè ɠɛ ma: «Fitina zei anii ɠa gè kaazu é ga zanugi nɔ ɲɛgɛlɛin, fitina lɔfela ɠa é zeini ga. Gulɔ aniɲakai zeini ti maazuʋɛ, sɔɔʋɛ lɔfelaiti togai ba, gulɔi ziɛzu ti zu, é zeeli fitinaiti su. 3Wolive wulu felegɔ ɠa loni gulɔ aniɲakai ɠobaʋɛ, gilagi ɠa zeezazuʋɛ, zɔi ɠɛ ga kɔʋɛzu ʋelei.» 4Gè geezuɠeelai ɠaazaɠani ʋolu, nii é ɠɛni ɓɔɛzu pɔ̀, gè ɠɛ ma: «Màliɠii, nii ʋoluʋɛ ɠa ga leeni?» 5Geezuɠeelai é ɠɛni ɓɔɛzu pɔ̀, é gàazaɠani é ɠɛ mà: «È la naa ʋoluʋɛ ɠwɛɛ?» Gè ɠɛ ma: «Ungo Màliɠii, gè la poluɠwɛɛ.» 6É gòoɠaaʋoteni, é ɠɛ mà: «Ɠɔoɠɔ GALAGI wooi ɠa é bosu Zoloɓaɓɛle ma: È la niima wotii ɠɛa ga zobogi ta gaaɓaai, kɛni nà-zɛnvui zɛbɛi zu. Ɠɔoɠɔ GALAGI, Fai-Pɛ-Maliɠii ɠa é boga.

7Ɗa ga leeni kae, gize wolai?

Ɗa valibosu è ɠɛ ga nɛmɛi Zoloɓaɓɛle luɠɔ.

Toɠa kɔtu ɓiigi ɠula è zu,

maamusɛ wooi zaama, ti ɗa ɠɛ ma:

‹Tuya ɠɔtui! Tuya ɠɔtui!› »

8Ɠɔoɠɔ GALAGI ɓɔɛni pɔ̀ ʋolu, é ɠɛ mà: 9«Zoloɓaɓɛle yeeiti ka ti niima wuulaagi laa, tiya ma nɔ ɠa ti pɛlɛi nii lo fai ɠaaɓelazu. Naa ɠa ɠɛɛna wa kwɛɛ naazu ga Ɠɔoɠɔ GALAGI, Fai-Pɛ-Maliɠii ɠa é tèʋega wo ma. 10Ɓɛɛni ka mu ti botii lɔɔzeizuʋɛ goi ʋaaɠulaai? Ti maa ɠɛni nɛɛni ga ti ɠoozunɛ, siɛgi zu ti kɔtu zaɠa ɠɔlui ɠaani la zoni Zoloɓaɓɛle ya. Kɔtu ɠaazu lɔfelaiti ta ga Ɠɔoɠɔ GALAGI ɠaazuɠɛzɛiti, ti wɛlɛzu fai pɛ ma, ti ɠɛɛzu zooi ɠa.»

11Gè gaazaɠani ʋolu, gè ɠɛ ma: «Wolive wulu felegɔi nuuti poluʋɛ ɠa ga leeni, ti loni fitina zei anii yeezazuʋɛ ta kɔʋɛzuʋɛ?» 12Gè ɠɛ ma mɔnɔ: «Wolive wulu ɓeke felegɔi nuuti poluʋɛ ɠa ga lee, ti loni zanu sɔɔʋɛ felegɔiti koba, niiti gulɔ ɓɛlɛi ziɛzu ti zu?» 13É ɠɛni mà: «È la ti ʋoluɠwɛɛ?» Gè ɠɛ ma: «Ungo Màliɠii, gè la ti ʋoluɠwɛɛni.» 14É polulɛɛni ga ze, é ɠɛ mà: «Zunu felegɔiti kana niiti gulɔi ziaai ti ma, ti losu eteai pɛ Maliɠii ɠakala.»

Currently Selected:

Zakali 4: GDZ

Highlight

Copy

Compare

Want to have your highlights saved across all your devices? Sign up or sign in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Learn More About GALA Daawoo Zɛʋɛi