YouVersion Logo
Search Icon

Wozé 8

8
1«Koolei vɛ!
Maanɔɠɔi ɠa yeizu Ɠɔoɠɔ GALAGI ná-zooi ma, eɠɛ koɠɛi,
mazɔlɔɔ ti nà-minazeɠegi ɠoloɠologɛ,
ti wuzeɠe nà-kalagi laalɔɠɔma.
2Ta wooɠulazu mà,
ti ɗa ɠɛ mà: ‹Ee, gá-ƓALAGI, gi è ɠwɛni!›
3Izilayɛle ɠɛlɛni faa ʋagɔi ʋa,
naa ɠa é ba, sili nui ɠa polu, é ɗa kpɛ.
4Ti la gàazaɠani, ti ɗa masagiti sei ɓɔɠɔ unda.
Ti ɗa kundiɠiiti to, ti la kì toa su.
Ta ta-waliiti ta zanugiti seɠezu, ti ɗa kpɛtɛ ga kɔɔɠɔ ganigiti,
nii a ɠɛ ga undaaʋili saɓui.
5Ee, Samali, ɗa-nikɛ yiʋoi ʋɛlɛ la bɛ̀!
Nà-ziiɠaawanai ma abui soga è laalɔɠɔma.
Yeeɠɛɠala lielegɔ ɠa è kɛɛzu, è la ziaa ɲade fai wu?
6Mazɔlɔɔ ɗa-nikɛ yiʋoi ɠulaʋɛ Izilayɛle,
ɲɛɛliɠi ɠɛ nui ta ɠa é kpɛtɛa,
naa la ga gala.
Tɔ ɠa é ba, Samali nikɛ yiʋoi ɠa vaza, é la ga gilagila.
7Tɛi ti fiilɛi vazagai,
ta tona viilɛ wolai leʋe.
Eɠɛʋelei faalaalii wosu la ga:
‹Moloi kɛzɛ la su, é la ɓulu vukɔi vea.›
Ni a feena, toɠa ɠɛ ga wɛɛinti kɔnɔgi.
8Izilayɛle maaɓɔlega.
Tiya ɠanu ti zii ɠiligiti saama,
eɠɛ anii nii kulanuma la ba.
9Mazɔlɔɔ diiʋɛ, é ɓɔɛ Asiili ʋɔ.
Dɔɓɔ zoovalegi ɠa ɗa ná-ɓɔɠɔyeemalai makɛ,
kɛlɛ Efelayime ɠa ná-wɛɛinti geyazu.
10Anɛɛ ɓalaa ta vebɛanii kpein feezu zii ɠiligiti zea,
su la mɔ ɠoozazu, gè ti ɠaalɛ ba.
Tama ná tago nɔ ʋe niina, ti lɔ kpɔlɔi zu kasɔi wu,
nii Asiili masagi daazu ti unma.
11Efelayime zalaɠa ɠulazuʋɛti togɛ ga mɔinɗa,
nii a kɛ kotoi zeɠe ba,
kɛlɛ zalaɠa ɠulazuʋɛ naati mu ti ɠɛɛʋɛ bɛ ga kotoi ɠɛɛ zaɓui.
12Gè nà-kalagi ma woo ʋɛlɛʋɛlɛgi kpein sɛʋɛ ʋa,
gè fe zea, naa ɠa ɠulazu ma nɔ ga wɛɛn.
13Wɔin ɠa ti ma ga ti ɗa zalaɠaiti kula,
mazɔlɔɔ ta ma zuai miizu.
Kɛlɛ Ɠɔoɠɔ GALAGI ɠoozu la nɛɛni ta-zalaɠaiti ma.
Za ʋoluma toɠa ɠitoo ta-ɠotoiti su,
é ti maaɠolo tɔɔzei ta-vaaɠaaza golaiti faa ʋa.
Ta ɠalesu ma Ezipete yooi zu.
14Gaamazu Izilayɛle yeemaa Kpɛtɛ Nui ma,
é ɗa masa pɛlɛ wolaiti to,
Zuda ɗa siɠigiti to ná-taa wolaiti ma.
Kɛlɛ nà abui ʋilisu ná,
é ta-masa pɛlɛ wolaiti gala.»

Currently Selected:

Wozé 8: GDZ

Highlight

Copy

Compare

Share

None

Want to have your highlights saved across all your devices? Sign up or sign in

Text copyright © 2023 Pioneer Bible Translators and The Bible Society in Guinea-Conakry

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Texte copyright © 2023 Traducteurs Pionniers de la Bible et Alliance Biblique en Guinée

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Learn More About GALA Daawoo Zɛʋɛi
Previous Chapter
Next Chapter