Wozé 11

Ɠɔoɠɔ GALAGI ná-nɛɛbɛi

1«Gè Izilayɛle nɛɛni ʋɛ, kɛai ma dɛ ga doungoi,

gè dòun zunui lolini ga é ɠula Ezipete yooi ʋa.

2Taɠiligaa ti tolini,

é maaɠooza bà naati maaʋele ma.

Ɓaalegiti ka Izilayɛle ɠɛni zalaɠai ɠulazu ti ʋɛ,

é ɗa ansansegiti gala kɔɔɠɔ ganigiti bɛ.

3Tama, nà ɠa gè Efelayime maalɛlɛni ga siɛi, gè so zèei ʋa,

kɛlɛ é la buuɠwɛɛni ga gè ɠɛni ɓaazu maazu.

4Nuɓusɛlai ma ɠalui ɠa gè mɛɛnga la,

ta nɛɛbɛ ɠɔlu yɔlɔɠɔiti.

Gè ɠɛni bɛ eɠɛ nui nii é doun ɓɔigi zeɠezu, é pɛɛ ɠoma,

gè ɠɛni kɔnɔgi lɔɔzu da.

5Ti la mɔ ɠalega ma Ezipete yooi zu,

kɛlɛ tɛi ti la kɛɛni ti ʋa ɠale ma pɔ̀,

Asiili masagi ɠa niina é zeizu ti unda.

6Naa ɠa é kɛɛzu boɠa zɔkpɔi latilatisu da ta-laa wolaiti su,

é ti-ʋoluzeizuʋɛti koloɠolo.

Toɠa ti mi ɲɛgɛlɛin, tɔɔzei ta-ɠisiɛiti ba.

7Nà-nuɓusɛiti ti devea ga ti ʋoluave bà.

Ta ti lolisu ga ti ɠaaʋote naa ma,

nii é zeini anii pɛ unga,

kɛlɛ ti ɠila kpalaa ge la kɛɛzu é ʋa unbuzeɠe.

8Ee, Efelayime! Nà zoo ɠale gè ɠɛlɛ è ʋa?

Ee, Izilayɛle! Nà zoo ɠale è ɠwɛɛzu?

Sòogɛ ɠale gè è zo eɠɛʋelei gè taa wola felegɔi niiti soni da,

Adema ta Seɓoyime?#11:8 Wɛlɛ ʋɛ: TSV 29:22.

Naa ɠa zìiɓɔlɔzu, è maawɔin sòga gola.

9Ɓa, gè la ʋaazu ziɛzu ga ʋelei gòla yiiɠaawanaai la,

gè la Efelayime ɠoloɠolosu ʋolu.

Nɔ̀un nà ga GALA, gè la ga nuɓusɛi,

tama, nà ga GALAGI nii ɲadegai,

nà wo zaama, gè la ʋaazu wo ʋɔ ga ziiɠaawanai.

10Ta ʋilɛ Ɠɔoɠɔ GALAGI ʋolu,

naa ɠa zikɔ eɠɛ zalai.

Sikɔ wooi ma, ma yiʋoiti ta zeɠe folo liizu ʋelei,

ti ʋa ga kpalii.

11Ta zeɠe ɓalaa Ezipete yooi zu, ti ʋa, ti ɗa ɓalii.

Eɠɛʋelei ɓalaa wɔniiti ti la, ta poopo kolegiti,

ʋele ɠana ti yɛsu da, ti zeɠe Asiili, ti ʋa.

Nà ma, nà ti zei ʋolu ga niinɛ ta-yooi zu,»

Ɠɔoɠɔ GALAGI wooi ɠana.

Currently Selected:

Wozé 11: GDZ

Highlight

Copy

Compare

Want to have your highlights saved across all your devices? Sign up or sign in

This work is licensed under the Creative Commons Attribution-NonCommercial-NoDerivatives 4.0 International.

https://creativecommons.org/licenses/by-nc-nd/4.0/

Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.

Learn More About GALA Daawoo Zɛʋɛi