Ruta 1
1
Elimeleki dakota 'bënï ï'bënnï mï Mowaba
1Mï kadra mati vo ko'dɔ vurë 'e mï dakaŋo 'ba Yiserele, madöyï ayi dakaŋo. Kora maako tëmï gawo 'ba Beteleme mï dakaŋo 'ba Yuda ila dakaŋo 'bënï ï'bë alima mï dakaŋo 'ba Mowaba, ïrï mbara 'bënï 'dö gisikora rïyö 'bënï aba. 2Kora ne, ru mo Elimeleki. Mbara 'bɔmo ru mo Nawomi. Gisi rïyö 'bëzë ru zë Mahaloni zë nï Kiliyoni aba. Zë tëmï vïdï 'ba Efereta, tëmï Beteleme, Yuda. Zë ï'bënnï mï Mowaba alimannï ani.
3Yaanya aba, Elimeleki kora 'ba Nawomi oli ila mo ku gisi aba rïyö. 4Zë ozennï mbara 'bënnï tëmï vïdï 'ba Mowaba, ma kölö ru mo Orupa magamo ru mo Ruta. Ta gɔmo zë alimannï ani kaa kɔɔ 'butë, 5Mahaloni 'dö Kiliyoni aba olinnï kpa ku, ila Nawomi ku kazi gisikora rïyö 'bënï nee o'di 'bënï aba.
6Mati mo owo iya mï dakaŋo 'ba Mowaba Yekova ayi ku kɔnyi vïdï 'bënï zi kï'dï wakonyo zi zë, Nawomi mbara 'ba gisi 'bënï ëtï, akɔ'jɔ rënnï zi ta'ba liŋɔ ta ani. 7Nawomi, mbara rïyö 'ba gisi 'bënï ëtï, mo ila bi mati zë ëdïnnï lima 'dɔmo ne, ayetonnï tï'bë ga gërï 'ba dakaŋo 'ba Yuda.
8Mora Nawomi iya henye, zi mbara rïyö 'ba gisi 'bënï nee, “A'ba'e hulëhu liŋɔ 'ba maa 'e. Yekova 'bayada watɔwɔ zi 'e kaa ma ayada zi ma neene zi vïdï mati oli nani nee. 9Yekova 'bï'dï 'e ki'ja lawo mï liŋɔ 'ba kora maako.” Here mo anzunzu lɔ'bɔ#1:9 Lɔbɔ anzunzu. Ne daleti 'ba Hïbïru ëzë omba ku kila vïdï 'bëyï. zë, zi zë kila nï. Zë u'dunnï kuyë le rïyë, 10iyannï henye zi mo, “Domba ta'ba yï aba hulëhu zi vïdï 'bëyï.”
11Mora Nawomi iya henye, “A'ba'e liŋɔ gisi mïnzö 'bama'e. Omba'e tayi ma aba ga a'di? Ma tëdï ndö gisikora maako aba mï ma zi tëdïnnï na kora 'bee? 12A'ba'e liŋɔ, gisi mïnzö 'bama'e. Mendro ku zi tëdï kora maako aba. Gbï le ëzë ma sösu, kö'du sösu maako ëdï gba kö'du ma, ëzë mo'do le kora maako aba yɔndɔ nenye aba, neene zi ko'jo gisikora'e, 13akisi bi zë le zi tövu? Akalima'e kazi kïrï kora ga kö'du zë? Hɔɔ, gisi mïnzö ama'e! Ëdï ndra na kyigɔ kö'du ma ta da kö'du 'e, ga kö'du Yekova ila kö'du kyënyë ayi ku da ma.”
14Zë ayetonnï ku'du kuyë löhu. Neene, Orupa anzunzu lɔ'bɔ wese 'bënï, ayeto ta'ba hulëhu. Mora Ruta onzo wese 'bënï, Nawomi, ŋbïrï. 15Nawomi iya henye, “Ongɔ te, mbara 'ba yɔkɔ yï ëdï ta'ba hulëhu zi vïdï 'bënï'e neene zi wïrï 'bënï'e, a'ba hulëhu mo aba.” 16Mora, Ruta aya'ba dɔmo, iya henye, “Aya'ba da ma dë, zi ma kila yï mandere zi ma ta'ba hulëhu ta rë yï. Bi mati ëdï tï'bë 'dɔmo, ma tï'bë 'dɔmo. Bi mati ëdï lima 'dɔmo, ma kalima 'dɔmo, vïdï 'bëyï 'e atëdïnnï na vïdï 'bama, Wïrï 'bëyï, atëdï na Wïrï 'bama. 17Bi mati akoli 'dɔmo, ma koli 'dɔmo, ne ra bi mati akusu ma 'dɔmo. Yekova 'bï'dï rayaza 'bayi da ma na kyënyë, ëzë le wa maako mora koli ra nje akinye yï ta ra ma.” 18Mati Nawomi ayɔlɔ Ruta omba ngoro tï'bë nï aba, mo ɔrɔ gbɔ ta bi lëlu dɔmo.
19Vïdï mbara rïyö nee ï'bënnï nduwë le zë ɔkɔnnï mï gawo 'ba Beteleme. Mati zë ɔkɔnnï mï Beteleme, gawo biya na wïrïwïrï ga kö'du zë, vïdï mbara ma mï gawo ani nee iyannï henye, “Nenye anza dë Nawomi ra?” 20Mo iya zi zë, “Ako'jo ma dë ‘Nawomi.’ Ako'jo ma ‘Wakata,’ ga kö'du Wïrï vo kyigɔ gärä o'dɔ lawo ma ku na kyënyë. 21Mï'bë yaga ndɔ, mora Yekova aya'ba ma hulëhu na mbiya. Ako'jo ma Nawomi ga a'di? Yekova o'dɔ ma watɔɔ riti aba, Wïrï vo kyigɔ gärä ika dɔnɔ kyënyë ku da ma.”
22Nawomi a'ba ta Mowaba. Ruta, mbara ma tëmï vïdï 'ba Mowaba ra ika gɔmo, mbara 'ba wisi 'bɔmo. Zë ɔkɔnnï mï Beteleme neene kadra 'ba kumu kowaya ëdï ku ayeto.
Currently Selected:
Ruta 1: MGC
Highlight
Copy
Compare
Share
Want to have your highlights saved across all your devices? Sign up or sign in
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/