Wahayu Yahayya 1

1Nde'e Deftere e saawi wahayu ɗum Allah holli Yeesu Almasiifu, gam holla maccuɓe muuɗum ko ɓadii wargo. Yeesu lilii malaa'ikaajo muuɗum to maccuɗo muuɗum Yahayya, gam o yeccoo mo fii ɗuum. 2Yahayya boo saaydake koo ɗume ko yi'i ɗum voliinde Allah, e goongaaji ɗi Yeesu holli mo. 3Barkaa no laatanto janngeyɗo nde'e deftere annabaaku. Barkaa no laatanto nanɓe ko vinndaa nder nde'e deftere tokki ɗum. Gam wakkaci fii ɗuum vanngata ɓadake.

Kinnooje gam ikiliisiyaaji gonɗi ci'e joveeɗiɗi

4Miin Yahayya, emi vinndana goonɗinɓe wonɓe ci'e joveeɗiɗi gonɗe nder lesdi Aasiya.

Allah gonɗo ndeenno e jo'oni e ɗo'o yeeso, e ruhuuji joveeɗiɗi gonɗi yeeso jooɗorgal laamu ma'ako, 5e Yeesu *Almasiifu caayduujo koolaaɗo mbarkiɗina on, kokka on jam. Yeesu o arano e ummitaago nder maayɓe, o laamiiɗo laamiiɓe duuniyaaru.

Kanko yiɗi en, o rimɗini en e hakkeeji meeɗen gada e ƴiiƴam ma'ako. 6O laatinii en yimɓe ma'ako e *aardiiɓe diina huwanooɓe Allah Baaba ma'ako. Teddungal e baawɗe laatanoo mo faa abadaa. Aamiin.

7« Rah, emo wara nder duule,#1.7a Daaniyel 7.13 ; Matta 24.30 ; Markus 13.26 ; Luka 21.27 ; 1 Tesaloonika'en 4.17

koo moye no yi'ey mo,

faa maa e warɓe mo#1.7b Yahayya 19.34.

Yimɓe duuniyaaru fuu

no mboyey gam bittoyki ma'ako ! »#1.7c Jakariya 12.10 ; Matta 24.30.

Goonga, ɗum waɗey. Aamiin.

8Allah Jawmu baawɗe vi'i :

« Miin woni Alfaa e Omeega, waato fuɗɗoode e timmoode. »#1.8 Wahayu 21.6 ; 22.13 ; Ecaaya 44.6

« Miin woni ndeenno e jo'oni e ɗo'o yeeso. »#1.8 Burtaaki 3.14

Almasiifu vannganii Yahayya

9Miin Yahayya banndii on, kawtuɗo e mooɗon torraaji e laamu Yeesu *Almasiifu, munyduɗo e mooɗon munyal ma'ako, mi yaharaama lesdi ngonndi caka ndiyam, mbi'eteendi Patamos. Mi yaharaama toon gam mi wa'ajinii voliinde Allah, mi hokkii habaru Yeesu. 10Nyannde alat, *Ruhu Allah jippoyii dow am, ɓaawo am nanmi woɗnde voliinde semmbiɗnde, kama duudaango luwal. 11Voliinde ndeen e vi'a :

— Ko ngiiɗaa, vinndu ɗum nder deftere, lildaa nde *ikiliisiyaaji gonɗi nder ci'e joveeɗiɗi, waato Efesu e Samirna e Pergame e Tiyaatira e Sardis e Filadelfiya e Lawdikiya.

12Sey ngaylitiimi gam mi yi'a bolvaneyɗo yam. E gaylitaaki am, sey ngi'imi fitilaaji joveeɗiɗi ɗi jiinaariya. 13Caka fitilaaji ɗiin, ngi'imi goɗɗo kama *Ɓii-Neɗɗo e ɓornii kolte juutɗe faa e teppe, emo taadii taadorde jiinaariya e wabaare ma'ako. 14Hoore ma'ako e gaasa ma'ako e ranni tar kama hottollo, tar kama nyaalal, gite ma'ako boo kama ɗemngal yiite. 15Kosɗe ma'ako e ɗelkitoo kama njamndi mboɗeeri ngoggaandi, ndi ɗum defi nder yiite vayildu, voliinde ma'ako kama iido nyaardu ndiyam ɗuuɗɗam. 16Emo jogii koode joveeɗiɗi e junngo ma'ako nyaamo, kaafahi belki ki mbeldiiji ɗiɗi e vurtoyoo nder honnduko ma'ako. Yeeso ma'ako e ranni tar kama naange caka nyalawma.

17Nde ngi'imoomi, sey ndo''iimi yeeso ma'ako kama maayɗo. Ammaa o yowani yam junngo ma'ako nyaamo. O vi'i :

— Ta'a hul. Miin woni arano, miin woni cakitiiɗo, 18miin woni mo yonki ! Ndeenno mi maayii, ammaa jo'oni emi woodi yonki ɗum faa abadaa abadin, emi woodi baawɗe dow maayde e Laahira. 19Gam ma'ajum, vinndu ko ngiiɗaa, ko waɗata jo'oni, e ko waɗata ɗo'o yeeso. 20Ammaa jo'oni, raa ma'ana sirri koode joveeɗiɗi ɗe ngiiɗaa nder junngo am nyaamo, e fitilaaji jiinaariya joveeɗiɗi ɗi ngiiɗaa : koode joveeɗiɗi ɗeen ngoni malaa'ika'en ikiliisiyaaji gonɗi ci'e joveeɗiɗi, fitilaaji joveeɗiɗi boo ɗum ikiliisiyaaji joveeɗiɗi.

Currently Selected:

Wahayu Yahayya 1: fuq

Highlight

Copy

Compare