Filipi'en 3

Anndugo Yeesu ɓurii koo ɗume

1Ɓaawo ma'ajum, banndiraaɓe am, nanee belɗum nder kawtal mooɗon e Jawmiraawo. Ɓesdugo vinndango on ɗen ɗoon bolle naa ɗum fii caɗɗum e am, ɗum ɓuranii on boo, gam ɗum reeney ɓerɗe mooɗon.

2Kakkilee e halluɓe laatiiɓe kama caafaali,#3.2 *Yahuudu'en e noddira heeferɓe kareeji. Jo'oni Bulus boo noddirii Yahuudu'en caafaali. waɗooɓe ko boni, vi'ooɓe doole neɗɗo fuu naadee ko hokka o laatoo neɗɗo Allah. Ɗum fewre ! 3Gam enen ngoni *naadaaɓe goonga'en, enen huwanooɓe Allah gada e Ruhu ma'ako, mawninooɓe Yeesu *Almasiifu, ɓe koolaaki kuuɗe ɓalli mu''en. 4Koo nde laatii miin e hoore am emi waawi hoolaago kuuɗe ɓanndu am. To woɓɓe e tammii e mbaawi hoolaago kuuɗe ɓalli mu''en, miin mi ɓurii ɓe. 5Mi naadaama balɗe joveetati ɓaawo danyeeki, mi *Isiraa'iilankeejo ivoyɗo e lenyol Bennyamin, *Ibraninkeejo ɓii Ibraninkeejo. Dow e tokkugo *Tawreeta boo mi *Fariisaajo. 6Dow e ti'inaare mi torriino goonɗinɓe Yeesu. Dow e aadilaaku tokkugo Tawreeta mi walaa feloore. 7Ɗe'e ku'uje fuu mi nyumiino ɗum geetum, ammaa jo'oni ɗum fuu mi yi'ii ɗum mehere gam Almasiifu. 8Goonga, mi yi'ii ko mbaɗnoomi fuu ɗum mehere, gam ko ɓuri teddugo fuu woni anndugo Yeesu Almasiifu Jawmiraawo am. Gam ma'ako mi waɗii asaara koo ɗume fuu, ɗum laatanii yam mbuubri mehereeri, gam mi heɓa mi laatoo mo Almasiifu. 9Ko ngiɗmi woni mi tawee e ma'ako, naa gam aadilaaku am ivoyngu e tokkugo Tawreeta, ammaa gam aadilaaku ivoyngu to Allah, kanjum woni goonɗingo Almasiifu. 10Ko ngiɗmi woni anndugo Yeesu Almasiifu e baawɗe ummitineeki muuɗum, kadimaa mi heɓa geɗal torraa ma'ako, gam mi nannda e ma'ako nder maayde, 11gam no ɗum waɗi fuu, miin boo mi heɓa yottaago ummitineeki maayɓe.

Keerol daɗootirki

12Mi vi'aay mi heɓii ɗum jo'oni, mi laataaki keeɓɗo tawo. Ammaa emi waɗa ga nyaargo yeeso-yeeso, noon no yimɓe ndaɗootirta faa mi nannga keɓal jaalorgal, sabu Yeesu *Almasiifu nanngii yam gam daliila ma'ajum. 13Banndiraaɓe, miin e hoore am mi vi'aay mi aartii mi nanngii ɗum. Fii go'otum tan mbaɗeymi : emi yeggitana ko wutii, emi raara ko woni yeeso. 14Emi nyaara faa mi yottoo keerol daɗki, gam mi heɓa biya ka Allah noddiri en keɓen nder kawtal e Yeesu Almasiifu. 15Gam ma'ajum enen ɓennduɓe nder tokkugo Yeesu, sey nyumen kama noon. Kadimaa to goɗɗo e woodi nyumo feere, Allah no vannginaney mo ɗum. 16Ammaa sey ti'inooɗen tokkugo laawol goongawol.

17Banndiraaɓe, kawtee e ɓeen tokkuɓe misaalu jo'onde am, ndaaree jooɗoriiɓe kama noon. 18Gam jo'onde ɗuuɗɓe e holla ɓe laatake wanywanyɓe habaru maayde Almasiifu dow *gaafagal. Mi vi'ii on ɗum nde ɗuuɗɗum, kadimaa emi ɓesda vi'igo on ɗum jo'oni, faa e bojji. 19Timmoode maɓɓe ɗum halkere, deedi maɓɓe laatii allah maɓɓe, ciya cemtuɗum ɓe mantorto, eɓe ndaara ko woni nder duuniyaaru tan. 20Ammaa enen ngoni ɓiɓɓe laamu dow. Jo'oni boo en ndeenti bittoyki Kisnoowo en ivoyeyɗo gada dow, Jawmiraawo meeɗen Yeesu Almasiifu. 21Kanko waylitata ɓalli meeɗen leestuɗi, o laatina ɗi tedduɗi kama ndu ma'ako, gada e baawɗe ma'ako ɗe o laamorantoo koo ɗume fuu.

Currently Selected:

Filipi'en 3: fuq

Highlight

Copy

Compare