Ibraaninkoo'en 5

1Koo moye *aardiiɗo diina mawɗo e suɓee nder yimɓe, o hokkee kuugal huwango Allah gam nafuuda maɓɓe, o hokka Allah cakketeeɗi e kokke gam hakkeeji maɓɓe. 2Emo waawi nango jurumɗum yimɓe ɓe ngalaa anndal, selɓe laawol Allah, gam kanko e hoore ma'ako o tampuɗo nder ku'uje ɗuuɗɗe kama maɓɓe. 3Sabu tampere ndeen doole o wadda sadaka ittugo hakkeeji, naa gam yimɓe ɓeen tan, ammaa faa e gam hoore ma'ako. 4Walaa baaweyɗo hokkugo hoore muuɗum manngu laataago aardiiɗo diina mawɗo, to naa Allah suɓi mo, noon no o suɓri *Haruuna.

5Almasiifu boo wanaa kanyum hokki hoore muuɗum manngu laataago aardiiɗo diina mawɗo, ammaa Allah hokki mo kuugal ngaal, vi'i mo :

« Aan a ɓiɗɗo am,

hannde mi laatake Baaba maaɗa. »#5.5 Jabuura 2.7

6Bannye nder *Deftere boo o vi'i :

« A *aardiiɗo diina mo faa abadaa,

kama aardungal Malkisadek. »#5.6 Jabuura 110.4

7Nde Yeesu wonnoo nder duuniyaaru o waɗii do'aaje e bojji naawɗi e gonɗi, o torake Allah baawɗo hisnugo mo e maayde. Allah boo jaɓii do'aare ma'ako, gam o ɗowtanake ɗum e kulol. 8Koo nde o *Ɓiɗɗo Allah, e noon fuu o ekkitake ɗowtanaago Allah gada e torraaji ɗi o yari. 9Nde o laatinaa keeɓɗo, o laatanake ɓeen ɗowtantooɓe mo ɗaɗol kisndam ɗam faa abadaa. 10Allah boo waɗii mo aardiiɗo diina mawɗo kama aardungal Malkisadek.

Vagginoore dow jogaago goonɗinki

11Dow ka'a haala, emin ngoodi fii ɗuuɗɗum ko min ngiɗi vi'igo, ammaa fahamingo on ɗum e saɗi, gam on pahamilawtaa. 12Wakkaci waɗii nde kaanɗon laataago ekkitinooɓe, ammaa faa jo'oni eɗon ngiɗi goɗɗo ekkitina on ku'uje ɓurɗe hoygo nder haala Allah. E haannoo tawee nyaamdu tekkundu nyaamoton, ammaa faa jo'oni on musiney. 13Musinoowo fuu no baddo tawo, o waawataa senndindirgo booɗɗum e kalluɗum. 14Ammaa mawɓe nyaamdu tekkundu nyaamata, gam ɓe mboobnii ko'e maɓɓe senndindirgo booɗɗum e kalluɗum.

Currently Selected:

Ibraaninkoo'en 5: fuq

Highlight

Copy

Compare