1 Timote 5

Bagginooje Bulus gam goonɗinɓe

1Ta'a nyaaɗan ndottiijo, ammaa to a yiɗi felgo mo, volvan mo kama o baaba maaɗa. Kaye'en boo, volvan ɓe kama minyiraaɓe maaɗa. 2Raar yayri'en naye'en kama danyooɓe maaɗa. Raar surba'en boo e ɓernde laaɓnde, kama minyiraaɓe maaɗa rewɓe.

3Teddin rewɓe ɓe worɓe mu''en maayi, vallu ɓe kul ɓe ngalaa vallooɓe. 4Ammaa to debbo mo gorko muuɗum maayi e woodi ɓikkon koo taaniraaɓe, sey ɓe ekkitoo huwango danyooɓe maɓɓe kuuɗe diina, waato ɓe mballa ɓe. Noon ɓe mbiyortoo ko ɓe keɓnoo e danyooɓe maɓɓe koo maamiraaɓe maɓɓe, gam kanjum velata Allah. 5Debbo mo gorko muuɗum maayi, ɗalaaɗo kanyum tan, mo walaa balloowo, e ɗoon resa tammunde muuɗum e Allah, emo toroo mo ballal jemma e nyalawma fuu. 6Ammaa debbo mo gorko muuɗum maayi, daareyɗo ko velata ɗum tan, o laatake kama maayɗo, koo to emo foofa. 7Kanjum haani ngeccoɗaa rewɓe goonɗinɓe ɓe worɓe mu''en maayi, gam to' goɗɗo heɓ felgo ɓe. 8To goɗɗo vallaay banndiraaɓe muuɗum, ɓurna muuɗum ɓe hawti wuro, ndeen kam o yeddii ko o goonɗini, o ɓurii mo goonɗinaay hallugo.

9To' ɗum vinndu innde debbo mo gorko muuɗum maayi nder limgal inɗe rewɓe ɓe worɓe mu''en maayi, to naa o waɗi duuɓi settiin (60), o koovanooɗo boo nde wo'ore tan. 10Sey o laatoo anndiraaɗo waɗgo kuuɗe booɗɗe, waato o ekkitinii ɓiɓɓe ma'ako booɗɗum, o jaɓɓake hoɗɓe, o lootii kosɗe#5.10 Nder finaatawaaji Yahuudu'en, yimɓe mboovi lootgo kosɗe hoɗɓe mu''en kama alaama hollugo jaɓɓaaki booɗki. goonɗinɓe, o vallii ɓilliiɓe, o huwii kuuɗe booɗɗe feere-feere. 11Ammaa ta'a vinndu inɗe haɓɓe-rewɓe nder limgal inɗe rewɓe ɓe worɓe mu''en maayi. Gam kul suuno koobgal ummanake ɓe, ngo woɗɗiney ɓe e *Almasiifu, ɓe ndaara hooveego. 12Noon ɓe pooɗranta ko'e maɓɓe ceri'a, gam ɓe piɓtii alkawal maɓɓe aranal ngal ɓe mbaɗnoo.#5.12 To debbo mo gorko muuɗum maayi vinndaama nder limgal inɗe rewɓe ɓe worɓe mu''en maayi, e ɗum laatii kama o waɗii alkawal o tokkey Yeesu tan, o fuɗɗitataa hooveego. 13Dow ma'ajum, ɓe laatoto yamniiɓe, nattooɓe suudu yahago suudu. Ammaa ko ɓuri hallugo fuu, ɓe laatoto ɗuuɗa-haala'en, nyo'ooɓe, nattooɓe haala ka walanaa ɗum'en. 14Gam ma'ajum mi ɓurii yiɗgo haɓɓe-rewɓe ɓe worɓe mu''en maayi koovee, ɓe ndanya ɓikkon, ɓe ndeena gure maɓɓe, gam to' wanywanyɓe meeɗen keɓ laawol hallingo en. 15Woɓɓe maɓɓe aartii celii laawol goonga, tokki *Ceyɗaan. 16To debbo goonɗinɗo e woodi banndiraaɓe rewɓe ɓe worɓe mu''en maayi nder wuro muuɗum, sey o valla ɓe. To' o yowan *ikiliisiya donngal, gam faa ka waawa vallugo rewɓe ɓe worɓe mu''en maayi, ɓe ngalaa vallooɓe.

17To darvooɓe nder *ikiliisiya mbaɗii aardungal booɗngal, eɓe kaandi heɓgo biya maɓɓe covi ɗiɗi, ɓurna muuɗum ti'iniiɓe wa'ajingo e ekkitingo. 18Gam *Deftere vi'i : « Ta'a suum honnduko ngaari corɓirdi gawri. »#5.18a Tokkitaaki Tawreeta 25.4 Nde vi'i boo : « Kuwoowo e haani hokkeego biya muuɗum. »#5.18b Matta 10.10 ; Luka 10.7 19Ta'a jaɓ waddaneego wullaandu dow ko darvanoowo ikiliisiya waɗi, to naa keɓɗaa caaydu'en ɗiɗo koo tato. 20Fel waɗooɓe hakke yeeso yimɓe fuu, gam horiiɓe kula. 21Emi toro maa yeeso Allah e Yeesu Almasiifu e yeeso malaa'ika'en suɓaaɓe : ɗowtana ɗi'i haalaaji, naa e jinngango yimɓe koo ɓurdindirgo ɓe. 22Ta'a yawɗo yowango koo moye juuɗe maaɗa gam hokkugo mo kuugal nder *ikiliisiya. Ta'a waɗ hoore maaɗa nder hakkeeji woɓɓe, ammaa waɗ jo'onde laaɓnde.

23Ta'a yar ndiyam ɓaleejam tan, ammaa yar *innaboojam seɗɗa, gam waaltingo nyawu reedu ummantoongu ma.

24Hakkeeji woɓɓe yimɓe e njaayri ngoni, ko hokka ɗum sernana ɓe. Ammaa hakkeeji woɓɓe sey ɓaawo ɗoon ɗi mbannga. 25Noon boo kuuɗe booɗɗe e njaayri ngoni. Koo to eɗe cuuɗii wakkaci seɗɗa, ɗe mbanngey.

Currently Selected:

1 Timote 5: fuq

Highlight

Copy

Compare