Roma Kepurisnan et itueng Surat et Roma
Kepurisnan et itueng Surat et Roma
Itueng Roma kelang lungsud et tawʼt Romano, bekeꞌ kabisera neng bangsa dye. Megaay banar si Pablo memeritaꞌ eset mengengandel i Jesus Kristo na sebarang meglelegdeng esentin, segwaꞌ kaya lang ya mekepelahyun sabab maya daran megsagkaꞌ eset kenye.
Indyari tiban mekepelahyun ne ya sumurung duntin. Angkansa negpebibit ne ya et itueng surat ne mepesewd ne lagi kedye ne ya in memeritaꞌ kedye.
Indyari ganang ya mekepeuliꞌ mewanan dut peglayag ye eset lungsud et Jerusalem in, pegperuen ye gasi na sumurung dut bangsa et Espanya. Ipebunayag eset kedye itueng Menungang Abar mewanan ki Jesus Kristo. Dut kenyeng peglayag neparu ye na dumungguꞌ dut lungsud et Roma. Nepikir ye tumerna ya tetegeyan kedye apang mengabar esentin.
Mekansang duntin mengengandel eset lungsud et Roma, sebarang iba in tawʼt Judio, segwaꞌ kinensangan kedye esentin in lein lang mengeꞌ Judio.
Eset itueng surat, sinugid i Pablo kedye ketentuan et pegandel eset ki Jesus Kristo lang. Sinugid ye na pebiyaꞌ lang et pegandel ki Jesus, si Empuꞌ mekebiriꞌ et ketignaaʼt taaw. Sinugid ye gasi pasal eset pegperuen et Empuꞌ eset mengeꞌ Judio bekeꞌ dut sebarang lein lang Judio supaya ya mekepelayam et kedyeng keselaan. Itueng pinikeemuring ginis na bineres i Pablo na baꞌ enukwanen et mengengandel tuꞌ kumpet et kedyeng diri.
Segwaꞌ si Pablo ga nekerateng dut lungsud et Roma, itue pebiyaꞌ et kedyeng pegpirisu kenye duntin. Indyari ya in duntin dye ne peteyen. Diki ne metuman ye itueng kenyeng pegpeperuen dut lungsud et Roma.
Ketulduan et itueng Surat
Penegnaan bekeꞌ kepurisnan 1:1-17
Punsabab et keselaaʼt taaw, keilangan kepuwasan 1:18—3:20
Enukwan nebiriꞌ et Empuꞌ kityung ketignaan 3:21—5:21
Empuꞌ memuwat et ebian na kityu mengandel eset Kenye 6:1—8:39
Neparu et Empuꞌ tudyu dut Judio na nepiliꞌ Ye 9:1—11:36
Itueng Arat et Taaw neng mengeꞌ Mengengandel 12:1—15:13
Penektak i Pablo neng beres atueʼt kenyeng surat 15:14—16:27
Currently Selected:
Roma Kepurisnan et itueng Surat et Roma: plw
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.