Sekariah 4
4
Hay Nipatigan Nan Punhilawan Ya Han Duwan Bungbunga"an An Olibo
1Indani ya immali bo nan anghel an ni'hapit ni' i ha"on ot bangonona' te aya' nalo'. 2Ot alyonan ha"on di, Nganney tinigom?
Ot alyo' di, Anakkayan tinigo' han nabalitu'an an punhilawan an waday malukung an naha"adan hi lana. Ya hidiy alpuwan nan lana an umeh nadan pitun dilag diyen punhilawan. 3Ya hidiyen punhilawan ya nibattan hinan duwan kayiw an olibo.
4Ot mahmaha' hinan anghel an ni'hapit i ha"on hi'on nganney pinhod dadiyen ibaga.
5Ya alyonay, Undan aggem innila?
Ot alyo' di, Agge' innila.
6Ya alyon diyen anghel di, Hidiyen nipatigon he"a ya hidiye nan pinhod Apu Dios an ipa'innilam i Serubbabel. Te alyon nan ongal di abalinanan Dios di, Mabalin an atom Serubbabel nan ipa'at'un he"a an gapuh nan Espiritu' an bokon gapuh nan abalinanyu onu nan bikahyu. 7Ot mama''id nadan umat hi o''ongal an billid an humandih em pangigibbuhan hinan Templo. Ta hitun em pangiha"adan hinan ma'udin batu ya itkukyun tatagu di, Hanat wagahan Apu Dios hituwe.
8Ya inalin bon Apu Dios di, 9Hi Serubbabel di nangiphod hinan nipabunan tun Templo ot hiya damdama boy mangigibbuh. Ta hidiyey panginnilaan nadan tatagun immannung an ha''on an ongal di abalinanan Dios di nangituda' i he"a Sekariah.
10Hay panigon nadan tatagu ya kittang han natamuwan ta hiya nan ma"id ha amlongda. Mu ahida mun'am'amlong hi paniganda an inaynayun Serubbabel an mangiphod hinan Templo.
Ya himmapit bo nan anghel ot ibaganay ibalinan nan nipatigon ha"on an alyonay, Dadiyen pitun dilag ya dadiyey paddungnay matan Apu Dios an manmannigoh at'atton di atagutaguh tun luta.
11Ot alyo' boh nan anghel di, Tanganu on wadadahdi han duwan kayiw an olibo an numbinahhel i diyen punhilawan? 12Ya tanganu on teda han duwan hapang di olibo an nitumu'an nadan duwan balitu' an ay gulipun bumudduhan nadan lanan malpuh nadan olibo?
13Ya alyon nan anghel di, Undan aggem innilay niyatan datuwe?
Ot alyo' di, Agge' innila apu.
14Ya alyonan ha"on di, Hay ipa"elanda ya nan duwan pinto' Apu Dios an bumoddang i hiyan mun'ap'apuh tun luta.
Currently Selected:
Sekariah 4: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
