Psalm 88
88
Psalm 88
Hay Dasal Di Ohan Nama"idan Hi Namnama
1Apu Dios an mangih'ihwang i ha''on, abigabigat ya ahodohodom on mumpahpahmo'a' i he"a.
2Ot hanat donglom bahan di dasal'u ta boddangana'.
3Te nunhigla tayya tun punligata' ta tuwe mahan mo teen mateya'.
4Te ma"id mahan mo tee ha bikah'u an aya' nanatte.
5An umata' hinadan nun'a'aten nilubu' an ma"id mo ha alyon hi boddangam dida.
6Te paddungnay inyeya' i ha munhihillong an ni'iddallom an lubu'an.
7Te hanan bungotmun ha"on ya nipaddung hinan nunhiglan dalluyun ta paddungnay pun'ilobloba' hi dallom nan liting.
8Ot gapuh tun inatmun ha"on ya pamaag tee ya aya' balud an adiya' pa"abtik.
Ya inwalonga' hinadan gagayyum'u.
9Ta hiya nan nunhiglay e' umukayungan ta gapu e' limmuwaluwaan ya limmatunnu' di mata'.
Ya abigabigat on itatagge' di ta'le' an mumpahpahmo' i he''a Apu Dios.
10Undan waday iyatan nadan milagron atom hi'on nate nan tagu?
Ya undan bo abalinanan bumangon ta dayawon da'a?
11Ot ten hidi'eh nan lubu'an ya ma''id ha alyon hi punhahapitanda nan munnananong an pamhodmu ya pumpapto'mu.
12Ya ot ten aggeda mo nimpe innila nadan milagron ina'inatmu ya nadan maphod an pangatmu.
13Ta hiya tee nan abigabigat on mumpahpahmo'a' i he"a.
14Mu tanganu ona' ingnganuy ta adim ahan donglon di dasal'u?
15Nihipun hi amangilog'u ya nunhiglay nunholholtapa' hinadan nundusam i ha"on ta pamaag ya aya' mate.
16Te nunhiglan adiya' pa"itpol hinadan namalpaligatmun ha"on an gapuh bungotmu.
17Ta abigabigat ya aya' wah gawwan di liting an aya' tayya mun'alting te paddungnay pun'ilobloba' i he"ah nan liting.
18Ot gapu nimpe i datuwen inatmun ha"on ya tinaynana' moh nadan gagayyum'u ya i'iba' ta pamaag tayya ya paddungnay munhihillong di nunlini"odan'u.
Currently Selected:
Psalm 88: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
