Proberbs 9

1Nan e anomnoman ya umat i ha nangiyammah balenan pituy#9:1 Nan pitu hinan Biblia ya hay pinhodnan ibaga ya ma"id ha adi maphod hi middum. tu"udna. 2Ta hidin nagibbuh ya ninomnomnan mumpahamul ta indadaana nadan makan ya ma'inum. 3Ot honagona nadan binabain baalna ta eda mun'ayag hi umalin mi"an ot umedah nan na'abbaktu i diyen boble ot eda mun'ayag 4an alyonday, An namin ayun agge nanomnoman ya umali ayuh nan punhamulan. 5Te dakol di nidadaan hi makan ya ma'inum. 6Hanat idinongyu nadan pangat di agge nanomnoman ta mipto' di pangatyu ta wan maphod di nitaguwanyu.

Nan Nanomnoman An Tagu Ya Mabalin An Papahiw

7Hanan mangihingal hinan ma'ammahiw an tagu ya hiya ot boy mipadngolan. Ya atbohdih nan adi maphod di pangatna an onaot pahakitan nan mangihingal i hiya. 8Ot hiya nan adim ipatnan pahiwon nan ma'ammahiw te ahiwawan da'an hiya. Mu nan nanomnoman an tagu ya ihingalmu'eh nan ibahhawana ya pohpohdon da'a otahan. 9Te itudduwam'e nan nanomnoman an tagu ya bumoddang i hiya ta iyal'alanan manomnoman. Te nan athidin maphod di pangatnan tagu ya nan itugunmu i hiya ya middum hinan innilana tuwali.

10Nan waday takutna i Apu Dios ya hidiyey hipun di ena anomnoman. Te nan tagun innilanay a'at Apu Dios ya hiyay nanginnilah nipto'. 11Ot nan nanomnoman an tagu ya dukkey pi'taguwanah tun luta. 12Nan nanomnoman ya waday maphod an gun'udona. Mu nan ma'ammahiw an tagu ya holtaponay punligatan.

13Nan tagun paddungnay ma"id ha nomnomna ya nipaddung hinan babain adina ono'nongon di hapitona ya aggena innilan bumain te ma"id tuwali ha in'innilana. 14Ya impa'inghanan e umbun hinan way panton di balena an nipattuk hinan nabaktu i diyen boble. 15Ta kumpulnan munla"uh an ta'on on padutu'anan umeh nan pangayana on pun'ayaganan 16alyonay, Dumagguh'ah tun bale'. 17Nan akawon an liting ya maphod hi panginuman. Ya athidi boh nan makan an impohpohodna hi'on ipa'pa"eh panganan.

18Mu agge innilan diyen tagun hanan hunggopanahdiy lummuh atayana ta middum hinadan udum an nabaliyan an nun'a'ate.

Currently Selected:

Proberbs 9: ifa

Highlight

Copy

Compare