Proberbs 24

Nan Mi'apulut Hiyam An Tugun

1Adi ayu umamoh nadan adi maphod di pangatdan tatagu ta bokon diday eyu id'idduman. 2Te dida ya amod on han eda pi'yawwitan di nomnomnomonda ya haphapitonda.

Nan Mi'abaintin Tugun

3Nan nanomnoman an tagu ya nahamad di iyammanah punhituwana te maphod di pun'u'unnudanandan hina'amma. 4Ya gapu ta innilanay nipto' an atona ya punuwonay balenah mun'aphod ya nun'anginan gina'u.

Nan Mi'abaintit Ohan Tugun

5Nan nanomnoman an tagu ya ongal di abalinana te gapuh la'ingna ya innilanay atona ta ma'udman di abalinana#24:5 Hay alyon di udum an Biblia hinan ma'udan di abalinana ya ong'ongngal di abalinan nan nanomnoman mu nan mabikah an tagu. 6an umat hinadan e mi'gubat an mahapul an ihamaddan nomnomnomon di atonda ya mahapul bon donglonday tugun di dakol an nun'anomnoman ta wan mangabakda.

Nan Mi'abaintit Duwan Tugun

7Nan punhahapitan nadan nun'anomnoman an tatagu ya adi ma'awatan nan paddungnay ma"id ha nomnomna. Ta hiya nan namaag ya dindinnongan hi'on waday mahahhahapit.

Nan Mi'abaintit Tulun Tugun

8Nan tagun hay nonomnomonah atona ya nan adi maphod ya lo'tat ya mangadanan ta hi Mangulgulu. 9Nan adi maphod an punnomnom ya bahul. Ya nan tagun pumihupihul ya ahiwawan di tatagu.

Nan Mi'abaintit Opat An Tugun

10Nan tagun adi pa"itpol hi ligat ya hidiyey itigana an na'akkapuy.

Nan Mi'abaintit Liman Tugun

11Wa'e ta waha ipapateda an ta'on on ma"id ha bahulna ya tigonyu ta boddanganyu ta adi mipapate. 12Ma''id ha mapto' ya alyonyuy, Tanganu on attaon an e mi'bi'biyang? Mu hi Apu Dios ya nan punnomnommuy tigona te innilanay a'at di hinohha. Ya atbohdin hay idatnan gunggunam ya nan miyunnudan hinan at'atom.

Nan Mi'abaintit Onom An Tugun

13Imbabale', uminum'ah danum di iyukan ot maphod te malumiih. 14Ya hay nipaddungan nae ya nan nahamad an tugun. Te nan nahamad an tugun ya ipaphodnay pangiye''em ta wan waday dinolmuh nan em pumhodan hi udum hi algo.

Nan Mi'abaintit Pitu An Tugun

15Adim iyunnudan hinadan adi maphod di pangatdan tatagu an eda mangmangngako hi balen nadan maphod di pangatnan tatagu ya pina"ihday nunhituwanda. 16Te nan tagun maphod di pangatna ya ta'on on atnay dumatong hi patnah nan nitaguwana ya adi damdama ma'abak. Mu adi athidih nan tagun adi maphod di pangatna te onha hiyay a'atan ha athidih ligat ot minayun di adadagana.

Nan Mi'abaintit Walun Tugun

17Ta'on hi waday adi maphod hi ma'at hinan ma'ahihhiwon he''a ya adim dildilaon hi nomnommu 18te innilan Apu Dios di wah nomnommu ya adina mo dusaon hidiyen ma'hihhiwon he"a.

Nan Mi'abaintit Hiyam An Tugun

19Adi'a bumungot an gapuh nadan adi maphod di pangatdan tatagu onu e'a umamoh i dida 20te nan adi maphod di pangatnan tagu ya ma"id ha namnamaonah maphod hi ma'at i hiyah udum hi algo ya mi'alig di nitaguwanah nan dilag an madop.

Nan Mi'atulumpulun Tugun

21Imbabale', hanat hi Apu Dios di taktam ta hiyay un'unudom ya atbohdin piyalom nan patul ta adi'a midmiddum hinadan mungngohe i hiya. 22Te hi Apu Dios ya ta'on on nan patul ya abalinandan ipa'aliy ligat.

23Ya datuwe boy udum an tugun di nun'anomnoman.

Nan mangipanuh hi dadalloman ya adi maphod on waday pangipangngelanah nan humalyaona. 24Te onha namaag ya alyonay ma''id ha bahul nan bimmahul ot hiyay ahiwawan nadan tatagu ya inidutanda. 25Mu nan nipto' di punhumalyana an alyonay numbahul nan nangat hi bahul ya hiyay mawagahan ya ta'on on nadan tatagu ya hiyay piyalonda.

26Nan tagun immannung di pambalnah nan waday mibaga i hiya ya hidiyey panginnilaan an nahamad hi gayyum.

27Hay mamanguluh atom ya tigom ta waday bumo'laam ya indadaanmu nan puntanoman ta waday itanudmu ya ahim mohpe iyamma ha punhituwam.

28Adim tistiguwan nan agge immannung an lummuh abahbahan di hinaggonmu. 29Ya atbohdin adim alyon hi ato' hituwen adi maphod ta iballoh'u nan inatnan ha''on.

30Wada han nangi'wa' hinan puntanoman han ma'higgan tagu an agge nanomnoman 31ya inoy an bimmikah di holo' ya pagat ya nun'apapa''ih bo udot nadan binattun alad nan puntanomana. 32Ta hay na'adal'uh naniga' i dadiye 33ya nan tagun alyona eh'ay malo' ni' i ha na'omtang onu op'opona ni' di ta'lena ta mun'ible 34ya pinalpaliwana ya ma"id ha mahapulnah nan nunhituwana ta ay nahod'ap.

Currently Selected:

Proberbs 24: ifa

Highlight

Copy

Compare