Lebitikus 11

Nadan Animal An Mibilang Hi Malinis Ya Nadan Mibilang Hi Nalugit

1Alyon bon Apu Dios i da Moses i Aaron di, 2Ibagayuh nadan ibbayun tinanud Israel an hay mabalin hi ihdayuh nadan animal an wahtun luta ya 3nadan nagodway kukubda ya pidwondan taptapon di anonda. 4Ya hay adiyu ihda ya nan kemel te ta'on hi pidwonan taptapon nan anona mu agge nagodway kukubna ta hiya nan mibilang hi nalugit. 5Ya atbohdi nan buwot 6ya nan kuneho an manu te pidwondan taptapon nan anonda mu agge nagodway kukubda ta hiya nan mibilangdah nalugit. 7Ya adiyu bo ihda nan babuy te ta'on hi nagodway kukubna mu mibilang hi nalugit te adina pidwon an taptapon nan anona. 8Danaen animal di adiyu ihda ya adiyu dapaon di adolda hi'onda nate te mibilangda nimpeh nalugit.

9Ya an namin nadan ma'alah nan way liting an waday uhipna ya higalna ya mabalin an anonyu. 10Mu an namin nadan ma"id ha uhipna ya higalna ya adiyu 11te dadiye nadan mibilang hi nalugit ot adiyu anon onu dapaon hi'onda nate. 12Ot an namin nimpe nadan wadah nan nalitingan an ma"id ha uhipna onu higalna ya mibilangdah nalugit ta adiyu anon.

13Ya hanadan hamutin adiyu anon te paniyo ya nan agila ya nan halagma ya nan gayang 14ya nadan nat'onat'on an balug 15ya an namin nadan nat'o'nat'on an rabin 16ya nan ay naha'gudan an akup ya nan akup an mihaggon hinan boble ya nan gull ya nadan nat'o'nat'on an pippiwong 17ya nan kittang di a'akupna ya nan kormorant ya nan tukukan 18ya nan pulaw an akup ya nan akup hinan agge naboblayan ya nan gayang an mangan hi dolog 19ya nan hulin ya nadan nat'o'nat'on an dolwa' ya nan hoopoe ya nadan littalit ya panni'i.

20Ya an namin nadan insekto an tumayap ya idallanday opat an hukida ya mibilangdah nalugit ta adiyu anon. 21Mu mabalin an anonyu nadan napaya'an an nahu''up di hukida ya ipaytu'day pangeda 22an datuwe nadan nat'onat'on an dudun ya nadan dulduli ya lellel ya nadan ba"atong. 23Mu nadan udum an napaya'an an ikadapday pangeda ya adiyu anon. 24Ya nan tagun waday dinapanah nate i danae ya mibilang hi nalugit hi ingganah mahdom. 25Mu niluh'en waday dinapayuh nate i danaen mibilang hi nalugit an animal ya pa'ibagonyun e laba'an nan inlubungyu. Mu hiyah diye damdaman mibilang ayuh nalugit hi ingganah mahdom.

26Ot nadan animal an nagodway kukubda mu adida pidwon an taptapon nan anonda ya mibilangdah nalugit. Ot hi'on waday dapaonyuh nan kumpulnan mate i danaen animal ya mibilang ayuh nalugit. 27Ya an namin nadan opat di hukina an waday komongna ya adi mabalin hi anonyu te mibilangdah nalugit. Ot hanan manapah nan adol datuwe hi'onda nate ya mibilangdah nalugit hi ingganah mahdom. 28Ot nan waday dinapanah nate ya mahapul an ena laba'an nan inlubungna mu hiyah diye damdaman mibilang hi nalugit hi ingganah mahdom.

29Ya mibilangda boh nalugit nadan udum an mundallanan hitun luta an umat hinan buwot ya gelew ya nadan nat'o'nat'on an o"ongal an banniya 30ya nan bambanaggo ya nan buwaya ya nan alibut ya nan banniyah nan awadan di panag#11:30 Hay pangalin di udum hinan panag ya gahal. ya nan kallulu. 31Ot nan tagun manapa i danae hi'onda nate ya mibilang hi nalugit hi ingganah mahdom. 32Ya kumpulnan gina'un ida"oman nan naten animal an umat hi luput onu lalat onu pina'ot an usal onu langgut ya mibilang hi nalugit. Ta gahin on ulahan ta malinisan mu mibilang damdamah nalugit hi ingganah mahdom ya ahi mohpe mibilang hi malinis. 33Ya onha nan pito' an banga di nagahan nan nate i datuwe ot an namin nan niha"ad hidi ya mibilangdah nalugit ta mahapul an guduwon nan banga. 34Ya an namin nan makan onu liting an ma'inum an natodtodan hinan liting an nalpu i diyen banga ya mibilang hi nalugit. 35Ot kumpulnan gina'un pito' di niyamma an umat hi banga onu kumpulnan pugun an punha"angan hi tinapay an waday nagah hidin nate an mibilang hi nalugit ya mahapul an mapa"ih te mibilang hi nalugit. 36Mu nan obob onu nan pangi'amungan hi liting ya ta'on on waday nagah hidin nate an mibilang hi nalugit ya hiyah diyen mibilang hi malinis an ammuna nan tagun manapa i diyen nate di mibilang hi nalugit. 37Ya hi'on nan kumpulnan mitanom di nagahan nan nate ya adi mibilang hi nalugit. 38Mu hi'on ni'upol hi liting nan tanom ya hidiy nagahan nan naten animal ya mibilang moh nalugit.

39Ya onha nan mibilang hi malinis an animal di nate ya nan adolna ya mibilang hi nalugit ot nan manapa i diyen nate ya mibilang hi nalugit hi ingganah mahdom. 40Ya nan tagun manapa onu mangan hinan lamoh diyen naten animal ya mahapul an ena laba'an di lubungna mu hiyah diye damdaman mibilang hi nalugit hi ingganah mahdom.

41Ya an namin nadan kikkitang an animal hitun luta ya adi makan te nibilangdah nalugit 42an umat hinan ulog an ibuluhdan ume ya nadan udum an opat di hukida ya nadan umat hi palikutkut an dakol di hukida. 43Ot tigonyu ta adi gumalat danaen animal hi ibilanganyu damdamah nalugit.

44Ha"on an hi Apu Dios an dayawonyu ya nahamad di a'at'u ot mahapul an inghona' ta mipatigoy niddumanyun ha"on. Ot halipodpodonyu ta adi gumalat danaen animal hi ibilanganyuh nalugit. 45Ha"on hi Apu Dios an nangikak i da'yuh ad Egypt ta wan ha"on di dayawonyu ot mahapul an inghona' te ha"on ya nahamad nimpey a'at'u.

46Ot danaey mahapul an ma'at hinadan animal ya nadan hamuti ya an namin nadan munwannatan hitun luta ya atbohdih nadan wah nan liting. 47Ta mahapul an innilaonyu hi'on nganne dadiyen matagun animal an mibilang hi nalugit an adi makan ya nadan makan te mibilang hi malinis.

Currently Selected:

Lebitikus 11: ifa

Highlight

Copy

Compare