Ezekiel 19
19
Hay Mikantah Hi'on Waday Nate An Patul An Tinanud Israel
1Alyon bon Apu Dios i ha''on di, Hanat hituwen ibaga' di ingulngulmuh nan umukayungam hinadan duwan ap'apun nadan tinanud Israel 2ta alyom di,
Da'yun tinanud Israel ya paddungnay mabikah nan hi inayu ya na'tullid an umat hi layon an impapto'nay imbabalena ta ingganay immongngalda.
Ta ta'on on wadadah nunlini''odan nadan mun'abubungot damdaman layon
3mu impapto'na nan ohan inlumna#19:3 Hay nipaddungan nan ohan inlumna ya nan patul an hi Jehoahas. ta numbalin hi ma'abbikah ot itudduwana ta abalinanan e manganup ya mangan hi tagu.
4Ta nundongol di a'atnah abobboble mu tiniliwda an paddungnay binituda.
Ot baludonda ot iyedah ad Egypt.
5Mu hidin hadhaddon nan hi inana ya ma"id hidiyen imbabalenan mibangngad ot tudduwana bo nan ohan imbabalena ta numbalin hi mabikah an layon.
6Ya paddungnay nidniddum hinadan ibbanan layon ta natudduwan damdama an manganup ya mangan hi tagu.
7Ta numpa"ihnay alad ya nundadagnay boblen di tatagu ta hiya nan dingngol'en nadan tatagu nan alumiyomna on nunhiglay takutda.
8Indani ya immalida boy tatagun nalpuh abobbobleh nunlini"odanda ot li''ubonda ot tiliwonda an paddungna boy binituda.#19:8 Ta hituwe damdamay nipaddungan di na'at hinan patul an hi Jehoyakin.
9Ot iyedah nan patul hi ad Babilon.
Ot ibaludda ta ma"id ha uggan madngol hi paddungnay pun'alumiyomana hinadan billid hi boblen nadan tinanud Israel.
10Paddungna boy hi inayu nan greyp an nitanom hinan pingngit di wa"el an nanginhahapang ot mangimbubbunga.
11Ya maganga nadan hapangna ta mabalin an miphod hi septer#19:11 Hidiyen septer ya hidiyey idongdong nan patul ta mangipa'innila an mabalin an mi'hapit nan tagu i hiya. di patul.
Ya timmagetage ta hiya ahan di ma'attigo.
12Mu gapuh bungot'un Dios i da'yun tinanud Israel ya mipaddung ayuh nan wakal an maba'gut ya nitopal.
Te umali nadan i Babilon an nipaddungan nan napudut an dibdib an malpuh tuluwan di algo ta kulingonah diyen hapang an nipaddunganyu ta makling ta mapu'ulan.
13Mu waday hapangnan agge napu'ulan an nitanom hinan agge naboblayan an mamagan luta.
14Mu indani ya dimmalang hidiyen wakal ta napu'ulan an namin nadan bungana ya hapangna ta ma"id ha nabati hi miyammah septer di patul.
Ta hituwey ingulngulyuh nan umukayunganyu hi'on waday mate.
Currently Selected:
Ezekiel 19: ifa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
