El Apocalipsis 7

Ttu gayua chua bixxi ttapa mili (144,000) ka benne Israel uren sellu lo xeake

1Iki de nuha nna bela'ati ttapa ka anjeli se'eke itapa laduba ge yiesi lo yu‑ni. Se'eke ki udheake be daa itapa laduba geni kini abittu uxunni be yiesi lo yu‑ni lhe kini abittu uxunni be lo indatooha lhe. Anágaba lo ka yaga‑na, bittugaba uxunni be lokani. 2Nianna bela'agabati attu anjeli ugwapie daka ata riria tatubisa‑na denie sellu ge Tata Do Yebaa benne anka baniha nna uresi'anie idisa adí ka anjeliha, delába ka benne ttapaha, ka benne chi uxíke lo neda kini uinke leeni yiesi lo yu‑ni lhe uinke leeni lo indatooha lhe. Nianna rabie ka benneha:

3―Bittu bi udhakaxxile indatoo‑na lhe yiesi lo yu‑na lhe ka yaga daa loin‑na lhe axtaliba ganna chi ulekiri'i sellu lo xea ka benne rixúke lo sina ge Tata Do Yebaa geri'iha.

4Nianna tti biyienti balhaxa ka benneha uren sellu lo xeake: ttu gayua chua bixxi ttapa mili (144,000) ka benneha uren sellu lo xeake. Iyába tsi'inu (12) kwe ka benne datiake benne tee lábie Israel, iyába ka benneha nuha uren sellu lo xeake,

5delába tsi'inu (12) mili ka benne datiake Judá,

nna tsi'inu mili ka benne datiake Rubén,

nna tsi'inu mili ka benne datiake Gad.

6Anágaba tsi'inu mili ka benne datiake Aser,

nna tsi'inu mili ka benne datiake Neftalí,

nna tsi'inu mili ka benne datiake Manasés,

7nna tsi'inu mili ka benne datiake Simeón.

Anágaba tsi'inu mili ka benne datiake Leví,

nna tsi'inu mili ka benne datiake Isacar,

8nna tsi'inu mili ka benne datiake Zabulón,

nna tsi'inu mili ka benne datiake José.

Anágaba tsi'inu mili ka benne datiake Benjamín.

Ixe juisiru ka benne se'eke arlo Tata Do Yebáha

9Iki de nuha nna tti bela'ati ixe juisiru ka benne. Ka benneha labí dhaari'i ibabinri'i ke. Ankake iyá loo lhe dáke lhe'e iyába ka yiesi se'e yiesi lo yu‑ni, lhe rinneke iyá looba tisa lhe. Ka benneha se'eke arlo xxila ata do Tata Do Yebáha rinnabie lhe arlo benne anke Neru toha lhe. Nukuke xo sitsi nna se'eke denke dina 10nna rinneke idisa ráke:

¡Tata Do Yebaa getu, benne dolu lo xxila ata rinnabialu‑na,

lhe lu benne ankalu Neru to lhe,

lebi'i nuná bodilále ri'itu lo elha disa gwatetuha!

11Iyába ka anjeli se'e abi'iba ata du xxila do benne rinnabiaha lhe abi'iba kwe'e ka benneolaha lhe abi'iba kwe'e ttapa ka nu anka baniha lhe, delába ka nu rula'a ttiba rule'e ka nimalaha, ka benneha bettudhi loke axtaba lo yu arlo xxila ata do Tata Do Yebáha rinnabie, nianna betsá loke bie. 12Nianna tti ráke:

¡Amén! Tata Do Yebaa getu,

kwinalu nuná ralhalu inne tsetu gelu

lhe ra xxeni lelu

lhe kwinalu ankalu benne yuu

lhe ankalu benne dika ugwetu lu ixkixaru

lhe anágaba kwinalu nuná ralhalu udú xibitu arlolu

lhe lu ankalu benne ra tsitsi lelu

lhe ruin tsitsilu lhe.

Ttu dia liiba ankalu aná xa Tata Do Yebaa getu.

Amén.

13Ttu ka benneolaha nna unnaba tise neti, ree:

―Ka benne nukuke xo sitsi se'e nii, ¿nú benne ka benne‑ni lhe gá dáke lhe?

14Neti nna bekabia gebie, xpeye:

―Lu gwa yúbalu xa tata.

Benneha nna bekabie kia ree:

―Ka benne‑ni nuní chi uláke lo elha disa tsitsiha nna chi utí xoke, botsitsike kana len reni ge benne anke Neru to‑ni. 15De nuha nna se'eke arlo xxila ata do Tata Do Yebaa‑ni rinnabie nna rela resába rixúnie ke lhe'e yotu gebie‑ni. Tata Do Yebaa‑ni, benne doe lo xxila ata rinnabie‑ni, benne‑ni doe lenke ruyúe ke. 16Labíru ituin ka benne‑ni, nigaba ebisike inda, lhe nigaba goru ubisa latike, lhe nigaba akarukanie ubisa lhe. 17Kumu benne anke Neru to du lagwi ata du xxila do benne rinnabia‑ni, labie nuní tsekie loke uyúe ke ttiba ka neru to‑na. Labie ichebie ke ata sia inda nu utena elha nabani geke ttu dia lii nna Tata Do Yebaa‑ni unie kini abitturu kwesike.

Currently Selected:

El Apocalipsis 7: zae

Highlight

Copy

Compare