1 Juan 5

Uxxen leri'i ge Jesucristuha kini abittu uinri'i nu satsa

1Iyába ka benne ganna ria leke deki Jesús‑ni anke Cristu, ka benneha nuha gwankake xi'in Tata Do Yebáha nna iyába ka benne rakakanie ge Tataha, rakagabakanie ge ka benne chi ankake xi'in Tataha. 2Ganna rakinri'i ge Tata Do Yebáha lhe ganna gwa rudobari'i tisa ge nu chi bodha'ane uinri'i, la'ania nna chi yuri'i deki gwa rakagabinri'i ge ka xi'inieha. 3Kumu ganna gwa rudobari'i tisa ge nu benie mandadu uinri'iha, ganna gwa ruinbari'i nuha, la'ania nna nuha runna liina deki gwa rakabinri'i gebie nna nu rabie uinri'iha, labí disa ule'enri'i ganna chi uinri'i nuha. 4Kumu iyába ka benne chi anka xi'in Tata Do Yebáha chiba udaa ka benneha use'e tsitsike, abittu rixú yieke uinke nu satsa raka yiesi lo yu‑ni. Kumu ri'i, de ruxxen leri'i ge Cristuha, de nuha nna gwa ridaabari'i abittu ruinri'i nu satsa raka yiesi lo yu‑ni. 5Nianna, ¿núla nuha gwa ridaana abittu ruinna nu satsa raka yiesi lo yu‑ni ganna? ¿Laaba ganna benne ria lebie deki Jesús‑ni anke Xi'in Tata Do Yebáha? Benneha nuha gwa ridaabie abittu runie nu satsa.

Espíritu ge Tata Do Yebáha rigixxi'abie nuxa anka Jesús‑ni

6Jesucristuha nuha bisiabie yiesi lo yu‑ni nna len inda udieha lhe len reni belalie tti uttieha, len nuha bele'e nuxa anke. Labí suna len inda udieha, sinuki len indaha lhe len reniha bele'e nuxa anke. Espíritu ge Tata Do Yebáha rigixxi'e nuní, kumu benneha rinnebie nu anka gwalí. 7Tsunna loo ka benne runna liike nuxa anka Cristuha, 8delába Espírituha lhe indaha lhe reniha lhe. Iyunnaba ka benne‑ni ttúba rigixxi'ake ge Cristuha. 9Gwalinnáruga, ki nu rigixxi'a ka benne se'e yiesi lo yu‑ni gwa rudo nagari'i geni, adírula nu utixxi'a Tata Do Yebáha dakarula nuha kumu utixxi'e ge Xi'inieha. 10Laxkala benne gwa ria lebie ge Xi'inieha, benneha gwa yue deki nu utixxi'a Tata Do Yebáha ge Xi'inieha nu gwalíba anka nuha nna nu abíba ria leni ge nu ra Tata Do Yebáha, nuha nna rálana deki Tata Do Yebáha ruinba le benneha kumu de labí ria leni ge nu utixxi'e ge Xi'inieha. 11Tisa‑ni nuní utixxi'e, delába utixxi'e unie ki aka benri'i ttu dia lii nna elha nabani gatta geri'iha, Xi'inieha‑ba utebie nuha geri'i. 12Ganna ri'i du lenri'i Xi'in Tata Do Yebáha, la'ania nna gwa teeba elha nabani geri'i ttu dia lii nna ganna ri'i abíba du lenri'i Xi'in Tata Do Yebáha, la'ania nna labí gatta elha nabani geri'i ttu dia lii.

Ka nuní ankakana ka tisa daluxa rinne Juan‑ni

13Iyá nuní benia lo yetsi‑ni nna ridhelhaa na gele, lebi'i ka benne chi ria lele ge Xi'in Tata Do Yebáha, kini anáchu nna yule deki gwa tee elha nabani gele ttu dia lii. 14Ri'i ruxxen leri'i ge Tata Do Yebáha, kumu gwa yúbari'i ttixka rinnabari'i lenie atti ttega ru'u lebie, labie nna gwa riyienbanie geri'i. 15Kumu de chi yuri'i deki gwa rudoba nage geri'i ttixka bixa rinnabari'i lenie, anágaba nna chigaba yuri'i deki nu unnabari'iha chiba anka nuha geri'i.

16Ganna ttu benne rilánie ttu betsi to geri'i rekina ruinna ttu bixa tulha, ganna ruinna tulha nu abittu kilana elhutti geni arlo Tata Do Yebáha, benne ilánie tulha ruinnaha, benneha teeki innabe geni len Tata Do Yebáha. Tata Do Yebáha nna gwinbe ki aka benna ttu dia lii. Rinnea ge ka nu ruinkana tulha, delába tulha nu abittu rigilana elhutti ge ka benne, kumu se'e ka tulha ka nu rigilakana elhutti ge ka benne. Labí ria deki ge ka nu ruinkana luesi tulha‑ni innabale len Tata Do Yebáha. 17Iyába nu satsa ruinri'i, tulhaba anka nuha, ttaka se'e ka tulha ka nu labí rigilakana elhutti geri'i.

18Gwa yúbari'i deki iyába ka benne, delába ka benne chi ankake xi'in Tata Do Yebáha, labíru rudona leke uinke tulha, kumu Jesús benne anka Xi'in Tata Do Yebáha, labie ruyú tsitsie ke kini abittu ridí yie nu xxegwiha ke. 19Anágaba chigaba yuri'i deki ri'i chi ankari'i ge Tata Do Yebáha nna iyába ka benne se'e yiesi lo yu‑ni ka nu labí chi ankakana gebie, nu ra nu xxegwiha‑ba ruinkana, 20lhe gwa yúgabari'i deki Xi'in Tata Do Yebáha bisiabie yiesi lo yu‑ni nna udhalie ikiri'i kini uinbiari'i benne gwalíga anka Diosiha. Nnanna chi se'eri'i len benneha de du lenri'i Xi'inie Jesucristuha. Tata Do Yebáha nuha anke gwalíga Diosi lhe anke benne rutebie elha nabani geri'i ttu dia lii lhe.

21Xi'ini to kia, gwaluyú gele, bittu tsia lele ge ka nu labí gwalíga ankakana diosi.

Currently Selected:

1 Juan 5: zae

Highlight

Copy

Compare