Romã 8

Age'e remẽ tekoua Janejare'e 'Ãg reve tè jaiko ky'y remẽwarà

1Age'e remẽ Janejare'e “nivoi mã'ẽ tè ãwĩ” ne'i'ãi janeupe ky'y, Kiristu Jesu revejẽ jaikopa ky'y rewarà mõ. Ajawyi nijanemono'ãi jimomorijau rena kyty janereity ky'y. 2Sireko jẽtà janeaiwererà janere mijã. Ajawyi jamãnõ 'atà tè jaiko mijã. Ajamã'ẽ aekwerà wyi Janejare'e 'Ãg janemomoioka janerereko karuaru rõmõ ky'y. Kiristu Jesu revejẽ jaiko mãe kõ rõmõ jaiko ky'y. 3Aje, ayvu ivo tekoua rewarà nijanemomoioka kuwa'ãi nivoi tekoua wyi ipi, janepy'a ai teãmã rewarà mõ. Janejare'e ãmẽ ikasiay nivoi tekoua wyi janemomoioka mã'ẽ rõmõ iko. A'evoa rõmõ Wa'yry omuu tojimojane janepytery pè iko. Janevo sõ tite Ta'yry ekoi. Ajamã'ẽ nuvei 'ete ijaiwererà ee. A'e omãnõ janeaiwererà kõ repykarà mõ. A'evo nomokasiokai janeaiwererà janeupe ky'y. 4Kee jaa rõmõ Janejare'e Wa'yry omuu janepytery pè toiko. Emimota katu rupi tijaiko, i'Ãg kasia rupi. Ivo tekoua rewarà rupi ve tijaiko. Janeremimotarà rupi rõwã jaikotà ãmẽ ky'y. Janepy'a ai rupi rõwã jaikotà ãmẽ ky'y.

5Janejare'e 'Ãg kasia rè ypyry oja'a mãe kõ i'Ãg kasia rupi tè ojipy'amogetatà iko ipi. Emimota rupi teve ojipy'amogeta iko kupa ipi. Ajamã'ẽ wemimota aiwerà rè ypyry oja'a ipi mãe kõ, wemimota aiwerà rupi tè ojipy'amogeta iko kupa ipi. 6Ãwĩvo janeremimota aiwerà rè tè japosiko ipi remẽ, jamãnõ 'atà tè mãe kõ rõmõ jaiko jane ãmẽ ipi. Ajamã'ẽ Janejare'e 'Ãg kasia rupi tè jaiko remẽ, jaiko karuaru 'atà tè ipyri jaiko ãmẽ ipi. Nijajipy'amopirai'ãi ãmẽ jaiko ky'y. 7Ajawyi janepy'a aiwerà rupi kõrijõ jaiko remẽ, Janejare'e ãpã rõmõ tè ãmẽ jaiko ipi. A'evo sõ jaiko tite remẽ, nisimomojyi Janejare'e ãmẽ. Nijaiko'ãi teãmã ijayvu rupi ãmẽ jaiko. 8Janeremimota aiwerà rupi tè jaiko remẽ, manyvo nijareko'ãi Janejare'e py'a rupi katuwarà mõ jaiko.

9Aje penemimota aiwerà nikasi peupe ky'y. Janejare'e 'Ãg tè penerekoarà rõmõ ekoi ky'y. Kee rewarà mõ. Aje ywete i'Ãg pepy'a pupe ekoi remẽ, emimota rupi peikotà ãmẽ ipi. Waiteve ma'e remẽ ava mõ opy'a pupe Kiristu 'Ãg nomojimoenai remẽ. Ikoty rewarà mõ rõwã ekoità ãmẽ. Ipojy tè aepo jaa ijupe ãmẽ. 10Ajamã'ẽ Kiristu 'Ãg pepy'a pupe ekoipa. Ajawyi ãwisõ pepirà omãnõtà ipe peaiwererà rewarà mõ remẽ, pe'ãg oiko karuarutà. Janejare'e 'Ãg pemoigo karuarutà, Janejare'e penereko katupa rewarà mõ. 11Aja jare keetà ãmẽ. Janejare'e 'Ãg pepy'a pupe ojimoena remẽ, ãwitõ Jesu Kiristu Janejare'e omomoerapa omãnõ mãe kõ pytery pe wyi, a'evo penerekotà teve ãmẽ penereko ipi. Ma'e, pepirà okãjãtà mã'ẽ omomoeraoka tary ve o'Ãg rupi kãramõ. I'Ãg pepy'a pupe oike wyi a'evookatà penereko.#1Kor. 3.16

12Eretãrã kõ, nisirovija'ãi janepy'a aiwerà ky'y. Janeremimota aiwerà rupi nijaiko'ãi ky'y. 13Ma'e rewarà mõ. Janeremimota aiwerà rupi jaiko remẽ, mãnõa rape rupi tè jaatà ãmẽ. “Owa” ne'i'ãi Janejare'e janeupe ãmẽ ky'y. Ipyri nijaiko'ãi ãmẽ ky'y. Ajawyi kee ja'età: “Janejare'e 'Ãg pè ajimokasioka taposiko e'ã eremimota aiwerà rè aiko ky'y. Ikatu mã'ẽ rupi jẽsi awi taiko”, ja'età ãmẽ ky'y. Ãmẽ si aje ywete Janejare'e reve jaikotà jamãnõ remẽ ky'y.

14Janejare'e 'Ãg janererekoarà rõmõ ekoi remẽ, ijãkarãgwerà kõ rõmõ jaiko ãmẽ ky'y. 15Nijakyje'ãi Janejare'e wyi ãmẽ ky'y. Nijajimosĩoka'ãi teve iwyi. Jypy remẽ jakyje iwyi ipi mijã. [“Maevo janemomorijautà, nivoi jaiko mã'ẽ rè ipi”, ja'e ipi mijã.] Ãwitõ temĩgwai ai okyje oõvijã wyi, a'evo jaiko mijã. Ajamã'ẽ janevo rupi teve jaiko ky'y. Janejare'e o'Ãg omuroka janepy'a pupe, ijãkarã kõ rõmõ tijaiko ãmẽ ky'y. Ajawyi nijakyje'ãi iwyi ky'y. I'Ãg janemo'epa, “Papa” tija'e ijupe ky'y. Nijajimosĩoka'ãi “Papa” javo ijupe. Nijapou'ãi javo ijupe ky'y.#Mak. 14.36; Kar. 4.6 16Ajawyi i'Ãg ojimogeta jane'ãg reve aepo rè. Kee e'i janeupe: “Õ'õ aje ywete, Janejare'e ãkarãgwerà kõ tè pejẽ ky'y”, e'i i'Ãg janeupe ipi. 17Ãmõ, ijãkarãgwerà kõ rõmõ jaiko rewarà mõ oja'a katu janere ipi. Oja'a karuaru janere ipi. Owaray janerereko karuarutà janerereko ipi. Janeupewarà omowaitepa mãe kõ ome'ẽtà janeupe. Kiristu pè omowaitepa mãe kõ ve ome'ẽtà janeupe, Kiristu revejẽ jaiko rewarà mõ. Ãwitõ Kiristu omomorijau kupa remẽ, eevejẽ janemomorijau kupa. Ãwĩvo ve Tuu omoe'e Wa'yry imojisaoka Jõvijã wasu rõmõ remẽ, eevejẽ jaikotà. Ãmẽ sõsi ipyri janeroryvaytà ipyriwarà kõ rõmõ jaiko ãmẽ ky'y.#Kar. 4.5-7

“Janerekoa rã Janejare'e pyri ikatuay wetetà”, e'i mã'ẽ

18Age'e ike rupi jaiko jẽ remẽ, jajimomorijau jẽ jaiko ipi. Ajamã'ẽ kãramõ Janejare'e ojikuwa Jõvijã wasu rõmõ remẽ, ikatuay janererekotà ky'y. Okatuaya ome'ẽtà janeupe ãmẽ. Nijaja'a'ãi jajimomorijauawerà rè ãmẽ jaiko ky'y. [Ajawyi jajimomorijau remẽ, tijajipy'amopirai e'ã jaiko.] Akuwa a'evotà janerereko mã'ẽ. 19Keetà a'evoa rã janerereko. Janejare'e janemojikuwaokatà wãkarãgwerà kõ rõmõ janerereko ãmẽ ky'y. Age'e remẽ pirujẽ eminõgwerà kõ ojimopirai tesõ, a'evoa rã wãrõ jẽ kupa upa remẽ. Yva, ãmõ, yvy, ipupewarà kõ revejẽ, wyra kõ, mijarà kõ, yvyra kõ. Wãisõ wãrõ. Pirujẽ a'e kõ wãrõ jẽ a'evoa rã ãmẽ. Ajaate a'evotà.

20[Karamoe remẽ Janejare'e yvy oinõ ypy remẽ, weminõgwerà ve oinõ ypy remẽ, ikatu tè pirujẽ mijã. Nijui eminõgwerà kõ ipi mijã.] Ajamã'ẽ tãmõ Atão aiwererà rupi eminõgwerà kõ ijupa mãe kõ rõmõ ojinõ ky'y. Oiko rã'ĩ kõrijõ tè Janejare'e reminõgwerà ky'y. Ijupatà mã'ẽ teãmã ãwĩ ipi. Omãnõ mã'ẽ teãmã ãwĩ ipi. Opota rewarà mõ rõwã a'evo ekoi ajamã'ẽ. Janejare'e e'ipa rewarà mõ tè a'evo ekoi.#Jinõ. 3.17-19 21Ajamã'ẽ na'evo'ãi kãramõ ky'y. Weminõgwerà kõ omokatu tarà mijẽ ky'y. Ãmẽ sõsi pirujẽ ikatuay wetetà ãmẽ ky'y. Nomãnõ'ãi eminõgwerà kõ ky'y. Niju'ãi teve ky'y. Nivoia naiko'ãi teve ijupe ky'y, Janejare'e omoikatupatà pirujẽ rewarà mõ. Ajawyi, eminõgwerà kõ omokatua rã wãrõ jẽ upa. Janemokatua reve a'evotà. Owa ywetetà a'evo janemojikuwaoka wãkarãgwerà kõ rõmõ janerereko remẽ.#J.Jim. 21.1-4

22Sikuwa age'e remẽwarà nikatu ywe'ei Janejare'e reminõgwerà kõ pè ipi. Ay teãmã ijupe kõ ipi. Ajawyi ijamu 'ejẽ kupa upa ipi, nojimokatuive kupa rewarà mõ. Ãwitõ wãivĩ imemy'a tarà remẽ, eamai ay pè upa ipi, a'evo ve ekoi kupa. 23Jane ve ike rupi nowari teve jaiko ipi. Ajawyi eminõgwerà kõ vo ve siãrõ jẽ teve janepy'a pupe janepirà mokatua rã. Age'e remẽ Janejare'e o'Ãg oinõma janepy'a pupe, wemime'ẽ ypykwerà rõmõ. Kee e'i i'Ãg janeupe ipi: “Kãramõ keetà pejẽ. Poromojikuwaokatà eãkarãgwerà kõ rõmõ. Ãmõ, pepirà ipyau mã'ẽ rõmõ poroinõtà teve ãmẽ ky'y”, e'i janeupe. Ajawyi, “Aje ywete a'evotà janerereko”, ja'età siãrõ jẽ jaiko remẽ.#2Kor. 5.2-4 24Janejare'e poroereko katua rã rewarà ojenu ypy remẽ, janerako'i teãmã ee jaiko. Janejare'e janerereko katupa amãtejẽ ãmẽ. Age'e janemokatua rã siãrõ jẽ rã'ĩ jakupa rewarà mõ, jamã'ẽtà ee janemokatu remẽ ky'y. Aje ywete jamã'ẽtà ee ky'y. Nisiãrõ pãnẽ'ãi jaiko. 25Ajawyi a'evoa rã siãrõ jẽ jaiko ipi. Nijakuwai manyvo remẽ põ a'evotà janerereko. Ajamã'ẽ nijajikõtevẽ'ãi ãrõa rè jaiko ipi.

26Kee jaa rè tapeja'a. Janejare'e 'Ãg tẽ tesõ uupa janemokasiarà rõmõ, Jesu rè jajirovija remẽ. Nijakuwa ywe'eive Janejare'e pè japoregeta. Ajawyi, “Manyvo a'età põ aporegeta ijupe?” ja'e ipi. A'evo remẽ i'Ãg tè janepy'a mojimogetaoka ijupe ãmẽ. Janeporijauesaoka teve Janejare'e pè ipi. Janemokasioka teve ipi. Oporegeta remẽ, ãwitõ ijamu 'ejẽ mã'ẽ vo 'ejẽ, ãwĩvo ve Janejare'e 'Ãg oporegeta ipi. 27Janejare'e janejipy'amogetaa okuwa katu ipi. O'Ãg jipy'amogetaa okuwa teve, janepy'a pupe wyi oporegeta janeupewarà mõ remẽ. Janejare'e i'eay e'i a'evo remẽ ipi.

28Ivo katu Janejare'e poroinõ ipi, wauparà kõ rõmõ. A'e tè janepyteporo okoty rewarà kõ rõmõ tijaiko ipi. Wemikuwa rupi tè a'evo ekoi. Ajawyi sikuwa pirujẽ manyvo jaiko ipe remẽ, Janejare'e oposiko jẽ janerereko katua rè iko ipi. 29Karamoe remẽ yvy noinõive remẽ, okuwapa amãtejẽ wemipyteporo ãrã kõ. Ijatyray emipyteporo ãrã kõ. Kee e'ipa janeupewarà mõ: “Era'yry reruparà kõ rõmõ ekoità kupa”, e'ipa. “Joeke'yry rõmõ Era'yry ekoità”, e'ipa. 30A'evo janepyteporopa amãtejẽ janerereko. Ãmẽ wãkarãgwerà kõ rõmõ janereinõ. Ãmẽ, “Mano'i mãe kõ rõwã aã kõ”, e'i janeupewarà mõ. Ikatuay wete ijãkarãgwerà kõ rõmõ jaiko ipi.

“Janejare'e janerauvay ipi”, e'i mã'ẽ

31A'evoa rè kee a'età tapekuwa sa'u. Janejare'e koty rewarà tè jane ky'y. Ajawyi ava jẽ rõwã janemoaiwe kuwa Janejare'e rovake ipi. 32Emã'ẽ. Janejare'e nokãte'ãi Wa'yry rè teipe, wauvay ipe remẽ. Omuroka jẽ tesõ yvy pè janeupewarà mõ tomãnõ. Ajawyi sitõ nijamãnõ'ãi janeaiwererà repykarà mõ ky'y. A'evo Wa'yry rè tẽ tesõ ipe nokãte'ãi imuroka. Tysi tõ pirujẽ wemime'ẽ rã ikatuay mã'ẽ rè nokãte'ã'ãi teve. Pirujẽ ome'ẽ takatutà janeupe ãmẽ wemiauvay kõ rõmõ.

33Janejare'e tepa janepyteporopa. A'e teve, kee e'ipa janeupe: “Ivo mãe kõ tè ãwĩ kõ”, e'ipa janeupe. Ajawyi aepo e'i paire, ava mõ “nivoi mã'ẽ tè ãwĩ” ne'i kuwa'ãi Janejare'e rovake janeupe ky'y! [Nijaneremavo'ãi ky'y.] 34Ijayvukasi kuwa jẽ põ ava mõ janeremavoa rã rè? Niĩ. Nijayvukasi'ãi. Kiristu Jesu rõwã sikõ omãnõ janerereko katuarà rõmõ. Opoerapa teve Janejare'e pyri oo upa ky'y. A'e pè Jõvijã wasu rõmõ tè ekoi ky'y. A'e pe wyi si janeporijauesaoka Uu pè upa ipi. Oporanu upa janeupewarà mõ ipi. A'evo janepãtavõarà rõmõ ekoi. [Ajawyi ava kee ne'i'ãi kuwa janeupe Janejare'e rovake mijã: “Tapemãnõ peaiwererà kõ repykarà mõ”, ne'i'ãi kuwa ipi.] 35Awyje Kiristu remiauvay kõ rõmõ jaiko ky'y. Ajawyi ava jẽ rõwã janerekyi kuwa janerauparà po pe wyi. Jajimomorijau ipe remẽ, janerauvay jẽ kuwa janerereko ipi. Janepy'a pirai tesõ ipe remẽ, nijanereity'ãi ãmẽ. Ãmõ, noerovijai mãe kõ janemoaiwe ipe remẽ, nijanerekyi'ãi kuwa ipo pe wyi. Kiristu janerauvay jẽtà ãmẽ. Ãmõ, janeamyay ipe jaiko remẽ. Ãmõ, nijanekamisai 'eteay ipe teve jaiko remẽ. Ãmõ, janetekorã ipe jaiko remẽ. Ãmõ, jamãnõ taray ipe jaiko remẽ. Aje, a'evo 'evo ipe jaiko remẽ, Kiristu nopoi'ãi janewyi ãmẽ ipi. Manyvo nyvo jẽ jaiko remẽ, janerauvay jẽtà janerereko ipi.

36Aje jajimomorijau jaiko ipi. Kee e'i ojikusiwapa Janejare'e ayvukwerà maekwerà rupi katu jaiko:

“Nekoty rewarà kõ rõmõ oroiko rewarà mõ ãmõ kõ oremomijarĩtà orerereko ipi.

Kõ'ẽ kõ'ẽ ve orejuka tarà 'ejẽ kupa upa ipi.

Ãwitõ kaneiru jaraa ijuka tarà mẽ, ãwĩvo ve orerereko kupa ipi”, ojikusiwaokapa maekwerà.#Jĩg. 44.22

37Aekwerà rupi katu jaiko remẽ, nimanyvoi. Kiristu janerauvay. A'e tè jo'arà kytywarà rõmõ janereinõma. 38Kee jaa aje ywete mã'ẽ. Manyvo jaiko remẽ, Janejare'e janerauvay jẽ janerereko ipi. Nopi'ãi janerauvaya wyi. Jamãnõ ipe remẽ, nopi'ãi janerauvaya wyi. Janerauvay jẽtà. Jaiko puku jẽ remẽ, janerau jẽtà janerereko ipi. Janejare'e remĩgwai yvapewarà kõ teve nomomi'ãi teve janerauvaya. Ãmõ, ãjãg kõ opota ipe Janejare'e topi janeraua wyi. Ajamã'ẽ manyvo noereko'ãi imomi, Janejare'e okãte'ã janere ipi rewarà mõ. Ãmõ, naikoi teve age'e remẽwarà janeraua omomi kuwa mã'ẽ mõ. Ãmõ, naiko'ãi teve kãramõwarà janeraua omomi kuwa mã'ẽ mõ. Janerau jẽtà Janejare'e kãramõ. 39Ãmõ, yvapewarà kõ teve nomomi kuwa'ãi janeraua janewyi. Ãmõ, yvy pewarà kõ teve nomomi kuwa'ãi janeraua janewyi. Yvy popykwerà wyi tesõ naiko ekojẽi janerauvaya omomi mã'ẽ, Janejare'e janerauvay wete rewarà mõ. Janerõvijã Kiristu Jesu mãnõa rupi Janejare'e janerauvay karuaru janerereko ipi, eevejẽ jaiko mãe kõ rõmõ.

Currently Selected:

Romã 8: oymDBL

Highlight

Compare

Copy