Romanos 3

Tachi Akꞌõrepa ichita oopari ichia jara bɨkꞌa

1Mãgara, ¿kꞌãare–itꞌee eperã kꞌapꞌɨade tauchaa bɨi judío pamerã? ¿Pipɨara bɨ–ekꞌã judio–ee baitꞌee, judío pai kꞌãyaara? 2¡Mãga–epɨ! Tachi Akꞌõrepa judiorãta naapɨara jɨrɨtꞌeraji ichia jarada jɨ̃adamerã mãikꞌaapa awaraarãmaa jarateedamerã. 3Made Akꞌõrepa ichi ũraa jaraji judiorãmaa. Mamĩda ãchidepema ũkꞌuruurãpa ma ũraa ijãada–e pꞌanapachida. Maperã ooda–e paji irua oopi kꞌinia bɨkꞌa. Ãrapa mãgá ijãada–e pꞌanadapꞌedaa perã, ¿Akꞌõrepa oo amaa beejikꞌã ichia jaradakꞌa ma ũraa pꞌãdade? 4¡Mãga–e! Akꞌõrepa seewa jarakꞌaa eperãarãkꞌa. Jĩpꞌa oopari ichia jara bɨkꞌa. Ichi ũraa pꞌãdade chonaarãwedapema Rey David itꞌaideepa jaraji:

‘Akꞌõre, mɨa ne–inaa kꞌachia oopata akꞌɨpꞌeda, pɨa wãarata jarapari “kꞌachia bɨda” akꞌãri. Pɨ ɨmɨateepataarã ichita pꞌoyaapariitꞌee, pɨa aupaita akꞌɨitꞌee perã eperãarãpa oopata jaraitꞌee pia wa kꞌachia.’ (Salmos 51.4)

5Mamĩda tai judiorãpa ne–inaa kꞌachia oo pꞌanadakꞌãri, akꞌɨpipata Tachi Akꞌõre pipɨara bɨ eperãarã kꞌãyaara, irua maarepida kꞌachia ookꞌaa perã. Mãgara ¿kꞌãata jaradaima? “¿Tachi Akꞌõre, tachi ooda tꞌãri kꞌachia bɨkꞌã, kꞌachia oopataarã atuapiitꞌee perã?” (Mɨa mãga iidikꞌãri parãmaa, pedeemaa bɨ eperã kꞌĩsia kꞌawa–ee bɨkꞌa.) 6¡Tachi Akꞌõre tꞌãri kꞌachia–epɨ! Mãga bada paara tachi ome, ¿sãga akꞌɨkꞌajima na pꞌekꞌau eujãdepemaarãpa oopata jaraitꞌee pia wa kꞌachia?

7Mɨa mãga kꞌĩsia bada paara, eperã kꞌĩsia kꞌawa–ee bɨpa jarakꞌajikꞌa ichiaba mɨa mãga jarai: “Mɨa seewa jarakꞌãri, akꞌɨpimaa bɨ Tachi Akꞌõre pipɨara bɨ mɨ kꞌãyaara, irua seewa jarakꞌaa perã.” Mãgara mɨa kꞌĩsiakꞌaji seewa jara bɨpa jõmaarãpa Tachi Akꞌõre pipɨara akꞌɨdaitꞌee, irua wãarata jarapari perã. Mãga pada paara ¿sãapꞌeda Akꞌõrepa mɨ atuapiima ma seewa jarada kꞌaurepa? 8Wãara judiorã ũkꞌuruurãpa mɨ ãpɨte jara pꞌanɨda a pꞌanɨ, mɨa jarateepari ne–inaa kꞌachia oodaipia bɨ, jõmaarãpa Tachi Akꞌõre pipɨara akꞌɨdamerã. ¡Mɨa mãga jarateekꞌaapɨ! Akꞌõrepa kꞌawa bɨ kꞌairãpa mãga jarateepata mãikꞌaapa ichia mãgɨɨrã miapiitꞌee ma kꞌaurepa.

Jõmaarãpa pꞌekꞌau kꞌachia oopata

9Ma jõma jara aupadade kꞌĩsiadakꞌãri, kꞌawa pꞌanɨ tai judiorã pipɨara pꞌanɨ–e judio–eerã kꞌãyaara, Akꞌõrepa ichi ũraa pꞌãda tai ome bëida perã. Etꞌewa mɨa akꞌɨpiji parãmaa tachi jõmaarãpa pꞌekꞌau kꞌachia oopata, pꞌekꞌau kꞌachia jua ekꞌari pꞌanapata perã; judiorã, judio–eerã aukꞌa. 10Ichiaba Tachi Akꞌõre Ũraa pꞌãdade jara bɨ:

‘Eperã apida pꞌekꞌau kꞌachia wẽe bɨ–e Tachi Akꞌõre kꞌĩrapite. 11Eperã apidaapa wãara kꞌawa–e bɨ ne–inaa pia ooitꞌee. Eperã apidaapa jɨrɨ–e bɨ Tachi Akꞌõre wãara kꞌawaaitꞌee. 12Jõmaarãta o kꞌachiade pꞌanɨ ãchia oo kꞌiniata oo pꞌanapata perã. Apidaapa oodakꞌaa Tachi Akꞌõrepa oopi kꞌinia bɨkꞌa, ne–inaa pia wãara pꞌoyaa oodakꞌaa perã.’ (Salmos 14.1-3; 53.1-3)

13‘Nãga pɨkꞌa pꞌanɨ. Ara piuda kꞌapꞌɨa pia ɨada–e pakꞌãri, mikꞌia uchiaparikꞌa ma ɨadapꞌedaamãiipa, mãga pɨkꞌa pedee kꞌachia uchiapari ãchi itꞌaideepa, tꞌãri kꞌachia–idaa pꞌanapata perã. Ãchi itꞌaideepa seewa aupai uchiapari.’ (Salmos 5.9)

‘Ara taamapa neera mera iru baparikꞌa chi kꞌidade eperã kꞌaaitꞌee, mãga pɨkꞌa ãchi imeraa pedeepa eperãarã kꞌũrapata ne–inaa kꞌachia oopidaitꞌee.’ (Salmos 140.3)

14‘Ikꞌachia pedeepata tꞌãri kꞌachia pꞌanapata perã.’ (Salmos 10.7)

15‘Chĩara audú pee kꞌinia pꞌanapata. 16Mãɨrã wãrutamaa ne–inaa kꞌachia oo wãpata awaraarãmaa mãikꞌaapa awaraarã tꞌãri pꞌuapipata. 17Kꞌãiwee pꞌanadakꞌaa mãikꞌaapa kꞌawadakꞌaa awaraarã mãgá pꞌanapidaitꞌee.’ (Isaías 59.7-8)

18‘Tachi Akꞌõre waaweedakꞌaa, irude ijãadakꞌaa perã.’ (Salmos 36.1)

19Tachia kꞌawa pꞌanɨ Tachi Akꞌõrepa pꞌãpiji ma etꞌewa pedeeda judiorã–itꞌee, ichia bëida perã ichi ũraa pꞌãda tai chonaarã ome. Ma ũraa pꞌãpiji apidaapa jaranaadamerã “mɨata ne–inaa kꞌachia oo–e” mãikꞌaapa jõmaweda na pꞌekꞌau eujãdepemaarãpa kꞌawaadamerã ãchia pꞌekꞌau kꞌachia oopata kꞌaurepa Tachi Akꞌõrepa ãchi atuapiitꞌee. 20Maperã kꞌawa pꞌanɨ eperã apida pꞌekꞌau kꞌachia wẽe baitꞌee Tachi Akꞌõre kꞌĩrapite Moisepa pꞌãda kꞌawapari perã maa–e pɨrã ma pꞌãdade jara bɨkꞌa oopari perã. Jĩpꞌa ma ũraa pꞌãda kꞌaurepa kꞌawapata tachia kꞌachia oopata.

Eperãarã o kꞌachiadeepa uchiapata Cristode ijãadakꞌãri

21Mamĩda ɨ̃rá eperãarãmaa Tachi Akꞌõrepa akꞌɨpimaa bɨ pꞌekꞌau kꞌachia wẽe pꞌaneedai iru kꞌĩrapite, ooda–e pꞌanɨ mĩda jõmaweda irua jara bɨkꞌa ichi ũraa pꞌãdade. Mãga kꞌawa pꞌanɨ irua mãga akꞌɨpida perã tai chonaarãmaa, Moisepa pꞌãdade mãikꞌaapa Akꞌõre pedee jarapataarãpa pꞌãdapꞌedaade. 22Tachimaa akꞌɨpimaa bɨ ichia naaweda kꞌĩsia iru bada: jõmaarãta wãara Jesucristode ijãa pꞌanɨɨrã pꞌekꞌau kꞌachia wẽe pꞌanapata Tachi Akꞌõre kꞌĩrapite, judiorã mãikꞌaapa judio–eerã paara. 23Jõmaarãpa pꞌekꞌau kꞌachia oopata. Eperã apida wẽ–e wãara ne–inaa jõmaweda oopari Akꞌõrepa oopi bɨkꞌa. 24Mamĩda Tachi Akꞌõre audú tꞌãri pia bapari perã mãikꞌaapa eperãarã kꞌinia iru bapari perã, pëiji ichi warra Jesucristo pꞌekꞌau kꞌachia oopataarã o kꞌachiadeepa kꞌaripa atamerã, pꞌekꞌau kꞌachia wẽe ichita pꞌanapataadamerã iru kꞌĩrapite. 25Jesucristopa eperãarã mãgá kꞌaripai Tachi Akꞌõrepa iru piupida perã eperãarã pari. Chonaarãweda eperãarãpa pꞌekꞌau kꞌachia oodakꞌãri, Tachi Akꞌõrepa choopachi mãikꞌaapa irua ma kꞌachia ãyaa bɨpachi. Mamĩda ma kꞌachia wẽpapi–e paji. Jõdee eperãarã taide ichi warra kurusode piukꞌãri, iru waa batꞌada kꞌaurepa Tachi Akꞌõrepa eperãarã pꞌekꞌau kꞌachia jõmaweda wẽpapiji, chonaarãpa chonaarãweda oopatapꞌedaa paara. 26Mãga ooji akꞌɨpiitꞌee ichi wãara tꞌãri pia bapari. Maperãpɨ eperã Cristode wãara ijãa bɨ pꞌekꞌau kꞌachia wẽe bapari Tachi Akꞌõre kꞌĩrapite.

27Mamĩda eperãpa jarai: “Tachi Akꞌõrepa mɨta pia akꞌɨ bapariitꞌee mɨa ne–inaa pia oopari perã”. Mamĩda mãga–e. Tachi Akꞌõrepa pia akꞌɨ bapariitꞌee chi wãara Jesucristode ijãa bɨ aupai. 28Ma jõma jara aupadade kꞌĩsiadakꞌãri, kꞌawa pꞌanɨ eperãarã pꞌekꞌau kꞌachia wẽe pꞌoyaa pꞌanadakꞌaa oo pꞌanadairã Tachi Akꞌõre Ũraa pꞌãdade jara bɨkꞌa. Jĩpꞌa pꞌekꞌau kꞌachia wẽe pꞌanadaitꞌee Tachi Akꞌõre kꞌĩrapite, Jesucristode ijãa pꞌanadairã.

29Tachi Akꞌõre jõmaarã Akꞌõre Waibɨa; judiorã Akꞌõre Waibɨa, ichiaba judio–eerã Akꞌõre Waibɨa. 30Tachi Akꞌõre apai. Maperã kꞌawa pꞌanɨ judiorã pꞌekꞌau kꞌachia, judio–eerã pꞌekꞌau kꞌachia aukꞌa wẽpapipari, Cristode wãara ijãadakꞌãri. 31Mãga jaradakꞌãri, ¿jara kꞌinia pꞌanɨkꞌã Akꞌõre Ũraa pꞌãda vale–ee pɨkꞌa bɨ? ¡Mãga–e! Tachia Cristode wãara ijãadakꞌãri, oopata ma ũraa pꞌãdade jara bɨkꞌa.

Currently Selected:

Romanos 3: sjaB

Highlight

Copy

Compare