Romanos 16

Pablopa salude pëida

1Mɨa kꞌinia bɨ parãpa auteebaidamerã tachi ɨ̃pewẽra Cristo kꞌaurepa, tꞌɨ̃jarapata Febe. Irua Cencrea pꞌuurudepema ijãapataarã akꞌɨpataarã kꞌaripapari. 2Iru parã tꞌãide panakꞌãri, pia óotɨ Cristopa oopi bɨkꞌa jõmaweda ichideerãmaa. Febe kꞌaripátɨ parãmaa ne–inaa iidiru pɨrã, irua ijãapataarã chokꞌara kꞌaripadoo perã, mɨ paara.

3Mɨa salude pëiru Priscilamaa mãikꞌaapa Aquilamaa. Mɨ ome ãra aukꞌa mimiapata Jesucristo–itꞌee. 4Perá piujida mɨ kꞌaripadaitꞌee. Maperã mɨa gracias jara kꞌinia bɨ ãramaa mãikꞌaapa ijãapataarã jõmaweda judio–eerã tꞌãidepemaarãpa pida.

5Ichiaba salude pëiru jõmaweda ijãapataarãmaa, ãra tede ɨtꞌaa tꞌɨ̃ chepata. Salude pëiru mɨ kꞌõpꞌãyo kꞌinia, Epenetomaa. Iru awaraarã kꞌãyaara naapɨara Cristode ijãaji Ásia eujãde.

6Salude pëiru Mariamaa. Pia oopari Cristopa oopi bɨkꞌa parã tꞌãide.

7Salude pëiru mɨchi aukꞌaarã Andronicomaa mãikꞌaapa Juniamaa. Ãra carcelde pꞌanajida mɨ ome. Ãrapa mɨ kꞌãyaara naapɨara ijãajida. Jõmaweda Cristopa jɨrɨtꞌeradaarãpa ãra pia tꞌo pꞌanɨ, pia mimiapata perã Cristo–itꞌee.

8Salude pëiru mɨ kꞌõpꞌãyo kꞌinia Ampliatomaa. Tachi ome aukꞌa ijãa bɨ Cristode.

9Salude pëiru Urbanomaa. Irua tachi jõma kꞌaripapari mimia pꞌanɨ misa Cristo–itꞌee. Ichiaba salude pëiru mɨ kꞌõpꞌãyo kꞌinia, Estaquimaa.

10Salude pëiru Apelemaa. Nepɨrade baaiji mĩda Cristode ijãapari perã, choopari ijãa bɨde. Ichiaba salude pëiru Aristóbulo te pidaarãmaa, ãra ichiaba Cristode ijãapata perã.

11Salude pëiru mɨchi aukꞌaa Herodionmaa mãikꞌaapa Narciso tedepema ijãapataarãmaa.

12Salude pëiru Trifenamaa mãikꞌaapa Trifosamaa. Ma wẽraarãpa pia oopata Cristopa oopi bɨkꞌa. Ichiaba salude pëiru mɨ ɨ̃pewẽra Cristo kꞌaurepa Persidemaa. Mɨa iru kꞌinia iru bɨ. Irua ichiaba pia oopari Cristopa oopi bɨkꞌa.

13Salude pëiru Rufomaa. Akꞌõrepa iru jɨrɨtꞌeraji parã tꞌãide waibɨa papiitꞌee. Aukꞌa salude pëiru iru nawemaa. Mãgɨ́ wẽrapa mɨ akꞌɨpari mɨchi nawekꞌa.

14Salude pëiru Asincritomaa, Flegonte, Hermes, Patrobas, Hermas, mãgɨɨrãmaa mãikꞌaapa apemaarã ɨ̃pemaarãmaa, ãra ome ɨtꞌaa tꞌɨ̃ chepata.

15Ichiaba salude pëiru Filologomaa Julia ome, Nereamaa iru ɨ̃pewẽra ome, Olimpamaa mãikꞌaapa apemaarã ijãapataarãmaa, ãra ome ɨtꞌaa tꞌɨ̃ chepata.

16Salude tee para bátɨ pãchi pitapai akꞌɨpidaitꞌee chikꞌinia pꞌanapata Cristopa kꞌinia bɨkꞌa. Nãpema ijãapataarãpa parãmaa aukꞌa salude pëiruta.

17Ɨ̃pemaarã, mɨa enenee nɨ̃bɨ parã kꞌɨɨrɨchaa pꞌanadamerã, ũkꞌuru seewa jarateepata paraa perã. Mãɨrãpa awara jarateepata Tachi Akꞌõre Ũraa wãara jarateepataarãpa parãmaa jarateedapꞌedaa kꞌãyaara mãikꞌaapa ijãapataarã kꞌĩsia awara–awaraa papipata. Maperã Cristode ijãapataarã ũkꞌuru ijãa amaadaipata ãchi kꞌaurepa. Ãyaa pꞌanéetɨ mãɨrã ikꞌaawaapa. 18Mãgeerãpa oodakꞌaa Cristopa oopi bɨkꞌa. Jĩpꞌa ãchi–itꞌee aupai mimiapata. Pedee sia, iwarraa pedee jaratee pꞌanɨpa kꞌũrapata ijãapataarã, chi pia kꞌĩsia kꞌawada–e pꞌanɨɨrã. 19Jõmaarãpa jara pꞌanɨ parã Cristode pia ijãapata mãikꞌaapa pꞌanapata irua pëida eperãarãpa jarateepatakꞌa. Mãga ũrikꞌãri, mɨ o–ĩadaipari. Mãgá ne–inaa pia kꞌawaa wãkꞌãtɨ wã́tɨ. Mamĩda kꞌĩrakꞌaupai ne–inaa kꞌachia oodai. 20Parãpa ma seewa jarateepataarãpa jara pꞌanɨ ũrida–e pɨrã, Tachi Akꞌõrepa isapai pꞌoyaai Satanás, chi ãchimaa mãga oopi bɨ. Mãgá parã kꞌãiwee pꞌanadai, kꞌĩsia awara–awaraa pꞌanadai kꞌãyaara. Mɨa ɨtꞌaa iidi bɨ Tachi Waibɨa Jesupa made parã kꞌaripamerã.

21Timoteopa parãmaa ichiaba salude pëiru. Ichia mɨ kꞌaripapari na mimia ome. Ichiaba salude pëiruta mɨchi aukꞌaarã Luciopa, Jasonpa mãikꞌaapa Sosipatropa.

22Mɨ, Terciopa na kꞌartꞌa pꞌãmaa bɨ Pablo kꞌapꞌɨa pari. Mɨa pida Tachi Waibɨade ijãa bɨ. Mapa parãmaa ichiaba salude pëi kꞌinia bɨ.

23Gayopa parãmaa ichiaba salude pëiru. Irua tai auteebaiji ichi tede mãikꞌaapa tai pia akꞌɨmaa bɨ. Mãga oopari jõma Cristode ijãapataarã ome nama chedakꞌãri. Erasto, na pꞌuurudepema pꞌaratꞌa jɨ̃aparipa ichiaba salude pëiru. Ma awara tachi ɨ̃pema Cristo kꞌaurepa, Cuartopa salude pëiru.

24[Mɨ, Pablopa iidi bɨ Tachi Waibɨa Jesucristopa parã pia akꞌɨ bapariimerã.]

25Ɨ̃rá ɨtꞌaa tꞌɨ̃dáma Tachi Akꞌõremaa jaradaitꞌee iruta jõmaarã kꞌãyaara waibɨara bɨ. Irua parã kꞌaripapariitꞌee Cristopa oopi kꞌinia bɨkꞌa oodamerã. Mɨa mãga jõmaarãmaa jara bɨ jarateekꞌãri Tachi Akꞌõre Ũraa Pia jara pëida. Ma ũraade jara bɨ jõmaweda Cristopa ooda eperãarã kꞌaripaitꞌee. Ma pedee Akꞌõrepa chonaarãweda kꞌawapi–e paji. 26Mamĩda Tachi Akꞌõre ichita baparipa, ma kꞌĩsia iru bada ɨ̃rá kꞌawapimaa bɨ mɨchi itꞌaideepa mãikꞌaapa awaraa jarateepataarã itꞌaideepa. Taimaa kꞌawaapiji ichia wãarata jara kꞌinia bada ichi ũraa pꞌãdade chonaarãweda, ma pedeeta jara bairã Cristopa ooitꞌee bada jõmaarã kꞌaripaitꞌee. Mãga kꞌawaapida perã taimaa, jõmaweda taipa jarateepata ũri pꞌanɨɨrãpa Cristode ijãadai mãikꞌaapa oodai irua oopi bɨkꞌa.

27Tachi Akꞌõre aupaita wãara kꞌĩsia kꞌawaa bapari. Ichia Jesucristo pëiji tachi o kꞌachiadeepa kꞌaripa atamerã. ¡Mapa ichita ɨtꞌaa tꞌɨ̃dáma irumaa! Amén.

Mãgapai paji.

Currently Selected:

Romanos 16: sjaB

Highlight

Copy

Compare