Mateo 7

Jesupa jarateeda awaraarãpa oopata akꞌɨnaadamerã pedee kꞌachia jaradaitꞌee

(Lucas 6.37-38, 41-42)

1—Awaraarãpa ne–inaa oopata akꞌɨnáatɨ jaradaitꞌee ne–inaa kꞌachia oomaa pꞌanɨ. Mãga ooruta pɨrã, ma jaradapꞌedaa kꞌaurepa Tachi Akꞌõrepa parã mãgá akꞌɨitꞌee. 2Parãpa awaraarãpa oo pꞌanɨ akꞌɨpatakꞌa, mãgá Tachi Akꞌõrepa akꞌɨpariitꞌee parãpa oo pꞌanɨ. Ne–inaa kꞌachia aupai jɨrɨruta pɨrã pedee kꞌachia jaradaitꞌee ãra ãpɨte, Tachi Akꞌõrepa aukꞌa jɨrɨitꞌee parãpa ne–inaa kꞌachia oopata aupai jaraitꞌee iru kꞌĩrapite pꞌanadakꞌãri. 3¿Kꞌãare–itꞌee akꞌɨ bɨma nejarra pɨchi aukꞌaa tau jãde bɨ, mamĩda unu–e bɨ pakꞌuru pɨchi tau jãde bɨ? 4Pɨchi tau jãde pakꞌuru iru bɨ pɨrã, ¿sãga pɨchi aukꞌaamaa jaraima: “Mɨmaa ẽepíji jã nejarra pɨchi tau jãde bɨ”? 5¡Seewata pɨa chĩara kꞌaripa kꞌinia bɨ, irua oo bɨ akꞌɨkꞌãri! Pɨchi tau jãde bɨ pakꞌuruta naapɨara ẽtꞌatꞌáaji. Mãpaipɨ unui nejarra pɨchi aukꞌaa tau jãde bɨ, mãgá wãara iru kꞌaripaitꞌee.

6ʼNetꞌaa awara bɨdapꞌedaa Tachi Akꞌõre–itꞌee teeruta pɨrã usa kꞌachia beemaa, orradaidapꞌeda kꞌaakꞌoodai. Ma awara ne–inaa ɨ̃pɨa perlakꞌa atabëiruta pɨrã sinaarã pꞌanɨmãi, yoorode jautꞌaadai.

Jesupa jarateeda Tachi Akꞌõremaa iididamerã

(Lucas 6.31; 11.9-13)

7—Iidipatáatɨ Tachi Akꞌõremaa. Irua teeitꞌeepɨ. Jɨrɨpatáatɨ. Irua kꞌawapiitꞌeepɨ. Eperãpa tꞌɨ̃parikꞌa puerta tꞌaide, Akꞌõremaa tꞌɨ̃patáatɨ. Irua parã kꞌaripaitꞌeepɨ. 8Chi iidi bɨmaa Tachi Akꞌõrepa teepari; chi jɨrɨ bɨmaa Tachi Akꞌõrepa kꞌawapipari mãikꞌaapa chi tꞌɨ̃ bɨmaa ewapari.

9ʼ¿Parãdepemapa mãu teeikꞌã ichi warramaa, irua pan iidikꞌãri? 10Maa–e pɨrã, ¿taama teeikꞌã irumaa, chikꞌo iidikꞌãri? 11¡Mãga–epɨ! Parã ne–inaa kꞌachia oopataarã mĩda, pãchi warrarãmaa netꞌaa pia tee kꞌawa pꞌanɨ. Parãpa mãga ooruta pɨrã, ¡audupɨara pãchi ɨtꞌaripema Akꞌõre Waibɨapa ne–inaa pia teeitꞌee chi iidirutaarãmaa!

12ʼMaperã, óotɨ apemaarãmaa parãpa kꞌinia pꞌanɨkꞌa ãchia parãmaa oodamerã, mãgata jara bairã Moisepa pꞌãdade mãikꞌaapa Tachi Akꞌõre pedee jarapataarãpa pꞌãdapꞌedaade.

Tachi Akꞌõre truadee wãitꞌee puerta pꞌĩrupꞌee pɨkꞌa bɨ

(Lucas 13.24)

13—Tachi Akꞌõre truadee wãitꞌee puerta pꞌĩrupꞌee bɨde tꞌĩupatákꞌata bɨ. Mapa tꞌĩ́utɨ puerta pꞌĩrupꞌee bɨde, chi atua beerã puerta jetꞌee bapari perã. Ichiaba ãchi o kꞌachia ewaraa kꞌobɨ, chokꞌara aɨde wãpata perã. 14Wãitꞌee eperãarã ichita pꞌanapatamãi Tachi Akꞌõre ome puerta pꞌĩrupꞌee bɨde tꞌĩupatákꞌata bɨ mãikꞌaapa Akꞌõre o pꞌĩrupꞌee bapari, mãgɨde chokꞌara–ee wãpata perã.

Pakꞌuru kꞌawaadai chi nejõdeepa

(Lucas 6.43-44)

15—Kꞌĩrakꞌaupai ijãadai jõmaweda Tachi Akꞌõre pedee jarapatada apataarãde, mãɨrã ũkꞌuru seewa–idaa bee perã. Seewata eperã pia beerãkꞌa parãmaa chepata. Mamĩda ãchi tꞌãride kꞌĩsia kꞌachia iru pꞌanapata. 16Parãpa mãɨrã kꞌawaadai ãchia oopata pia akꞌɨdakꞌãri. Pakꞌuru ɨɨrɨ–idaa bɨde uva chaukꞌaa; ichiaba mãgeede higojõ chaukꞌaa. 17Ma awara nejõ bɨɨrɨ pia bɨpa nejõ pia chaupari. Mamĩda nejõ bɨɨrɨ kꞌachia bɨpa nejõ kꞌachia chaupari. 18Nejõ kꞌachia chaukꞌaa pakꞌuru pia bɨde. Ichiaba nejõ pia chaukꞌaa pakꞌuru kꞌachia bɨde. 19Maperã pakꞌuru nejõ pia chaukꞌaa bee tꞌu peepata tꞌɨpɨtaude batꞌatꞌaadaitꞌee. 20Mãgá ma Akꞌõre pedee jarapatada apataarãpa ne–inaa oopata kꞌaurepa parãpa kꞌawaadai wãara Akꞌõrepa pëida wa mãga–e.

Jesupa jarateeda jõmaarãta Tachi Akꞌõre truadee wãda–e paitꞌee

(Lucas 13.25-27)

21—Eperãarã ũkꞌuruurãpa mɨmaa: “Tachi Waibɨa, Tachi Waibɨa” a pꞌanɨ mĩda, jõmaweda wãda–e paitꞌee Tachi Akꞌõre truadee. Jĩpꞌa chi oopataarãpa mɨ Akꞌõre ɨtꞌari bɨpa oopi bɨkꞌa; mãgɨɨrãta ɨtꞌaa wãdaitꞌee. 22Akꞌõre ewari waibɨa ewate chokꞌaraarãpa mɨmaa jaradaitꞌee: “Tachi Waibɨa, Tachi Waibɨa, tai pɨ ome pꞌanapíji. Taipa pɨ tꞌɨ̃de jarateejida mãikꞌaapa pɨ tꞌɨ̃de netuaraarã uchiapikꞌoojida. Ma awara pɨ tꞌɨ̃de oojida ne–inaa eperãarãpa pꞌoyaa oodakꞌaa ãchi juadoopa.” 23Mamĩda mɨa pꞌanautꞌee: “¡Mɨa parã kꞌawa–e bɨ! ¡Ãyaa wã́tɨ mɨ ikꞌaawaapa, ne–inaa kꞌachia oopataarã!”

Jesupa te oopataarãde jarateeda

(Marcos 1.22; Lucas 6.47-49)

24—Eperã kꞌĩsia kꞌawaa bɨpa mɨ ũraa ũripari mãikꞌaapa oopari mɨa jara bɨkꞌa. Mãgɨ́ eperã ichi te oo bɨ́kꞌata bɨ mãu ɨ̃rɨ. 25Kꞌoi cheji; to chedachi mãikꞌaapa nãu golpe pꞌuaji ichi temãi. Mamĩda tꞌee–e paji mãu ɨ̃rɨ oo bada perã. 26Jõdee chi mɨ ũraa ũripꞌeda, oo–e bɨpa mɨa jara bɨkꞌa kꞌĩsia kꞌawa–ee bɨ. Eperã ichi te ipude oodakꞌa bɨ. 27Kꞌoi cheji; to chedachi; nãu golpe pꞌuaji mãikꞌaapa ichi te tudú tꞌeedachi. Mãgá ichi te jõdachi.

28Jesús pedee aupakꞌãri, eperãarã jõmaweda akꞌɨtrua para beeji irua jarateeda kꞌaurepa. 29Mãga pꞌanajida irua jĩpꞌa jarateeda perã Tachi Akꞌõrepa jarateepidakꞌa. Akꞌõre Ũraa pipɨara jarateeji Moisepa pꞌãda jarateepataarã kꞌãyaara.

Currently Selected:

Mateo 7: sjaB

Highlight

Copy