Juan 20
20
Jesús chokꞌai pꞌirabaida
(Mateo 28.1-10; Marcos 16.1-8; Lucas 24.1-12)
1Tomia ewate tapꞌeweda, María Magdalena wãji Jesús kꞌapꞌɨa ɨadapꞌedaamaa. Panakꞌãri, unuji chi mãu te uria tꞌai mãupa tꞌapꞌa bada awara ãi bɨ. 2Mapa pꞌira cheji Simón Pedromaa mãikꞌaapa mɨ, chi apema kꞌõpꞌãyo Jesupa kꞌinia iru badamaa. Mãpai mãgaji:
—¡Tachi Waibɨa kꞌapꞌɨa ateejidada! aji. ¡Kꞌawada–e pꞌanɨ sãma ata bɨnajida!
3Mãga ũridakꞌãri, Pedro mɨ ome araa wãjida akꞌɨde. 4Omee weda aukꞌa pꞌira wãjida. Mamĩda mɨ Pedro kꞌãyaara isapaira pꞌiradachi. Mapa naapɨara panaji Jesús ɨadapꞌedaamãi mãu te uriade. 5Ɨ̃jaabaikꞌãri akꞌɨitꞌee edaa, chi pꞌaru aupai unuji. Mamĩda tꞌĩu–e paji. 6Mãga nɨde Simón Pedro pacheji mãikꞌaapa tꞌĩuji edú. Ma lienzo ichiaba unuji. 7Ma awara unuji Jesús poro pɨra bada pꞌaru, bedapꞌeda awara ãi bɨ. 8Mãpai mɨ aukꞌa tꞌĩuji. Akꞌɨkꞌãri, ijãaji Jesús chokꞌai pꞌirabaida, aɨ naaweda taipa ijãada–e paji mĩda. 9Waide kꞌawada–e paji Tachi Akꞌõre Ũraa pꞌãdade jara kꞌinia bɨ Jesús piupꞌeda, chokꞌai pꞌirabaiitꞌeeda akꞌãri. 10Maapꞌeda tai omee weda temaa wãjida.
María Magdalenapa Jesús unuda
(Marcos 16.9-11)
11Mamĩda María beeji mãu te uria kꞌaitꞌa jẽemaa. Mãgá jẽe nɨ̃bɨde ɨ̃jaabaiji edaa akꞌɨitꞌee. 12Unuji angeleerã omé pꞌaru tꞌo–tꞌoo jɨ̃ pꞌanɨ. Su–akꞌɨ pꞌanajida Jesús kꞌapꞌɨa badamãi, aba chi poro bada eere, aba chi jĩru bada eere. 13Ãchia iidijida Mariamaa:
—Wẽra, ¿sãapꞌeda jẽemaa bɨma? ajida.
Mãpai Mariapa mãgaji:
—Mɨchi Waibɨa kꞌapꞌɨa ateejidada aji. Kꞌawa–eda aji, sãmaapɨ bɨnajida.
14Mata ãpɨtee akꞌɨkꞌãri, unuji Jesús mama bainɨ̃ bɨ. Mamĩda iru kꞌĩra kꞌawa–e paji. 15Mãpai Jesupa iidiji:
—Wẽra, ¿sãapꞌeda jẽe nɨ̃bɨma? aji. ¿Kꞌaita jɨrɨ bɨma? aji.
Mariapa kꞌĩsiaji ma eperã chi jãɨradepema ne–uu akꞌɨpari. Mapa mãgaji:
—Mɨ chupɨria kꞌawáaji. Pɨa Jesús kꞌapꞌɨa ateeji pɨrã, jaráji sãma iru bɨ. Mɨa atanaitꞌeeda aji.
16Mãpai Jesupa mãgaji:
—¡María!
Ichi tꞌɨ̃jarakꞌãri, waya ãpɨtee akꞌɨji mãikꞌaapa hebreo pedeede mãgaji:
—¡Rabuni! (Jara kꞌinia bɨ “Tachi Jarateepari”.)
17Jesupa mãgaji:
—Mɨ kꞌena pë́iji waide mɨ Akꞌõremaa wã–e bairã. Jaranapáde aji, mɨ kꞌõpꞌãyoorãmaa: “Mɨ wãitꞌee mɨ Akꞌõremaa; iru ichiaba parã Akꞌõre. Mɨ wãitꞌee mɨ Akꞌõre Waibɨamaa; iru ichiaba parã Akꞌõre Waibɨa.”
18Mãpai María Magdalena wãji Jesús kꞌõpꞌãyoorãmaa nepɨrɨde ichia unuda mãikꞌaapa Jesupa jarada.
Jesús chi kꞌõpꞌãyoorãmaa cheda
(Mateo 28.16-20; Marcos 16.14-18; Lucas 24.36-49)
19Mãgɨ́ ewate tomia ewate paji. Kꞌeupodopa Jesús kꞌõpꞌãyoorã teeda pꞌanajida. Puerta jɨ̃a iru pꞌanajida judiorã poro waibɨarã waidoopa. Mãga nɨde Jesús ãra esajĩakꞌa bainɨ̃ ba cheji mãikꞌaapa mãgaji:
—Pꞌeranáatɨ. Kꞌãiwee pꞌanapatáatɨ.
20Mãga jarapꞌeda, ãramaa akꞌɨpiji ichi jua mãikꞌaapa ichi orro. Jesús kꞌawaadakꞌãri, tꞌãri o–ĩadachida. 21Waya Jesupa mãgaji:
—¡Kꞌãiwee pꞌanapatáatɨ! Mɨ Akꞌõrepa mɨ pëidakꞌa, mɨa parã jida aukꞌa pëiru.
22Mãga jarapꞌeda, jãrapꞌuaji ãchi ɨ̃rɨ mãikꞌaapa mãgaji:
—Akꞌõre Jaure auteebáitɨ, parã ome ba chemerã. 23Eperãarãpa ãchia pꞌekꞌau kꞌachia oopata oo amaaruta pɨrã mɨde ijãadaitꞌee, parãpa ãramaa jaradai: “Tachi Akꞌõrepa pãchia pꞌekꞌau kꞌachia oopata wẽpapiitꞌee,” mãikꞌaapa Akꞌõrepa ooitꞌee parãpa jaradapꞌedaakꞌa. Jõdee eperãarãpa mɨde ijãadaamaaruta pɨrã, parãpa ãramaa jaradai: “Tachi Akꞌõrepa pãchia pꞌekꞌau kꞌachia oopata wẽpapi–e paitꞌee,” mãikꞌaapa Akꞌõrepa ooitꞌee parãpa jaradapꞌedaakꞌa.
Tomapa Jesús unuda
24Tomás, ichiaba tꞌɨ̃jarapatapꞌedaa Me–iso, Jesús kꞌõpꞌãyoorã docedepema paji. Mamĩda mãgɨ́ wẽ–e paji Jesús chekꞌãri apemaarãmãi. 25Mapa chi kꞌõpꞌãyoorãpa irumaa mãgajida:
—Taipa Tachi Waibɨa unujidada ajida.
Mãga ũrikꞌãri, Tomapa mãgaji:
—Mɨa unukꞌãri clavopa merapꞌedapꞌedaamãi iru juade mãikꞌaapa aɨde mɨ jua kꞌɨ̃ tꞌɨkꞌãri, maapꞌeda iru orrode sudamãi mɨ jua tꞌɨkꞌãri, ijãayada aji, Jesús chokꞌai bɨ. Mãga–e pɨrã, ijãa–eda aji.
26Tomia abaamaa waya Jesús kꞌõpꞌãyoorã ma tede pꞌanadakꞌãri, Tomás jida baji. Puerta jɨ̃a baji mĩda, Jesús ãchi tꞌãide bainɨ̃ ba cheji mãikꞌaapa mãgaji:
—¡Kꞌãiwee pꞌanapatáatɨ!
27Mãpai Tomamaa mãgaji:
—Akꞌɨ chéji mɨ jua, mãikꞌaapa pɨchi jua kꞌɨ̃ tꞌɨtꞌáaji. Ichiaba pɨchi jua mɨ orrode tꞌɨtꞌáaji. ¡Ijãa–eda ai kꞌãyaara, ijãa bɨda aparíiji!
28Mãpai Tomapa mãgaji:
—¡Mɨchi Waibɨa, ɨ̃rá mɨa ijãa bɨpɨ. Pɨ Tachi Akꞌõre Waibɨa!
29Mãpai Jesupa mãgaji:
—Pɨa ijãa bɨ mɨ unuda perã. ¡Tꞌãri o–ĩa pꞌanɨ chi mɨde ijãa pꞌanɨɨrã, mɨ unuda–e pꞌanɨ mĩda!
Sãapꞌeda nãgɨ́ pꞌãda
30Wãara chi kꞌõpꞌãyoorã taide Jesupa awaraa ne–inaa chokꞌara ooji, ne–inaa eperãarãpa pꞌoyaa oodakꞌaa ãchi juadoopa. Mɨa na pꞌãdade ma jõma pꞌã–e paji. 31Mamĩda nãgɨ́ pꞌãji parãpa ijãapataadamerã Jesús Tachi Akꞌõre Warra; irua pëida eperãarã kꞌaripamerã. Jesude ijãa pꞌanɨ pɨrã, ɨtꞌaa wãdaitꞌee jai–idaadakꞌãri.
Currently Selected:
Juan 20: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.