Daniel 5
5
Tachi Akꞌõrepa paredde pedee pꞌãpida
1Maapꞌeda Belsasar Babilonia eujãde rey beekꞌãri, ichia jara pëiji ma eujãdepema poro waibɨarã mil ichi ome nekꞌode chedamerã. Nekꞌo pꞌanɨ misa, irua vino waibɨa toji ãra ome. 2-3Mãgá vino jede to pꞌanɨde, Belsasarpa ichi mimiapataarã pëiji vaso nẽedee ooda mãikꞌaapa pꞌaratꞌadee ooda atanadamerã. Aɨ naaweda ma vaso chi akꞌõre, Nabucodonosorpa aneeji Jerusalendepema Akꞌõre Waibɨa tedeepa. Ma vaso aneedakꞌãri, reypa, ma poro waibɨarãpa, rey wẽraarãpa, chi wẽraarã kꞌãipariirãpa paara aɨde vino tojida. 4Mãgá vino to pꞌanɨ misa, ãrapa pedee pia jarapachida reypa ne–inaa juapa ooda aɨ kꞌĩrapite ɨtꞌaa tꞌɨ̃pata iru badade; nẽedee ooda, pꞌaratꞌadee ooda, broncedee ooda, hierrodee ooda, pakꞌurudee ooda mãikꞌaapa mãudee ooda.
5Mãga nɨde ma palacio edajãde lámpara ɨ̃daa bɨmãi unujida eperã juapa pared bi tꞌorroo bɨde pꞌãmaa bɨ. Reypa mãga unukꞌãri, 6kꞌĩra pꞌãwatɨdachi mãikꞌaapa pꞌera nɨ̃bɨpa sinapote wëre nɨ̃beeji. Mãgá ichi juatau wẽe beeji. 7Mãpai golpe biaji atanadamerã Babiloniadepema dapꞌa to kꞌawaa beerãkꞌa beerã; lucero akꞌɨdapꞌeda, ne–inaa jarapataarã mãikꞌaapa ne–inaa waide pꞌasa–e bɨ jarapataarã.
Mãgɨ́ Babiloniadepema kꞌĩsia kꞌawaa beerã chedakꞌãri, reypa mãgaji:
—Apidaapa jã pꞌãda leeru pɨrã mãikꞌaapa jararu pɨrã kꞌãata jara kꞌinia bɨ, mɨa irumaa pꞌaru pꞌupꞌuchia jɨ̃piitꞌee mãikꞌaapa iru otaude cadena nẽedee ooda jɨ̃ bɨpiitꞌee. Ma awara mɨ ekꞌari bɨ poro waibɨara bɨ jua ekꞌari Babiloniadepemaarã poro waibɨa papiitꞌee.
8Ma rey jua ekꞌari pꞌanadapꞌedaa kꞌĩsia kꞌawaa beerã jõmaweda tꞌĩujida ma pꞌãda leede. Mamĩda apidaapa kꞌawada–e paji. Maperã pꞌoyaa reymaa jarada–e paji ma pꞌãda kꞌãata jara kꞌinia baji. 9Ma kꞌaurepa rey audupɨara pꞌeradachi mãikꞌaapa chi kꞌĩra audupɨara pꞌãwatɨdachi. Mãga unudakꞌãri, ma poro waibɨarãpa kꞌawada–e paji kꞌãata kꞌĩsiadai.
10Mãga nɨde rey nawepa rey bia nɨ̃bɨ mãikꞌaapa ma poro waibɨarã biukꞌa para nɨ̃bɨ ũrikꞌãri, tꞌĩuji ãchi nekꞌo pꞌanadapꞌedaamãi mãikꞌaapa mãgaji:
—¡Rey Waibɨa, mɨa kꞌinia bɨ pɨ ichita bapariimerã! Kꞌĩsia nɨ̃banáaji mãikꞌaapa jãgá kꞌĩra pꞌãwatɨ nɨ̃banáaji. 11Pɨ jua ekꞌari beerãdepema eperã aba bɨ. Mɨa kꞌawa bɨ akꞌõre waibɨarã eperãarã awara pꞌanapata mãikꞌaapa ãra jaure ma eperã ome bapari. Mapa irumaa kꞌawaapii ne–inaa eperãarãpa kꞌawadakꞌaa. Rey Waibɨa, pɨ akꞌõre Nabucodonosor rey bakꞌãri, irua ma eperã kꞌawaji. Mãgɨ́ eperã kꞌĩsia kꞌawaa, poro wẽsaa bapari mãikꞌaapa ne–inaa kꞌawaapari akꞌõre waibɨarãpa kꞌawapatakꞌa. Rey Waibɨa, maperã pɨ akꞌõrepa ma eperã bɨji nãgeerã poro waibɨa pamerã: petau tau kꞌawaa beerã; dapꞌa to kꞌawaa beerãkꞌa beerã; lucero akꞌɨdapꞌeda, ne–inaa jarapataarã mãikꞌaapa awaraa ne–inaa waide pꞌasa–e bɨ jarapataarã. 12Ma eperã awaraarã kꞌãyaara kꞌĩsia kꞌawaara bapari. Ne–inaa kꞌĩra tꞌãdoo kꞌawapari mãikꞌaapa poro wẽsaa bapari perã, tachia kꞌãimokꞌaraada paara kꞌawai mãikꞌaapa jarai kꞌãata jara kꞌinia bɨ. Irua jarai ne–inaa apidaapa kꞌawadakꞌaa mãikꞌaapa jarai kꞌãata jara kꞌinia bɨ. Ma eperã tꞌɨ̃jarapata Daniel; pɨ akꞌõrepa tꞌɨ̃ bɨda Beltsasar. Rey Waibɨa, jara pë́iji ma eperã chemerã. Iruata jarai jã pedee paredde pꞌã bɨ kꞌãata jara kꞌinia bɨ.
13Mãpai reypa mãga ooji. Daniel rey kꞌĩrapite pachekꞌãri, reypa iidiji:
—¿Pɨkꞌã aji, Daniel, mɨ akꞌõre Nabucodonosorpa Judá eujãdeepa presokꞌa aneedapꞌedaarãdepema? 14Mɨmaa jarajida akꞌõre waibɨarã jaure pɨ ome bapari; pɨ kꞌĩsia kꞌawaa bapari mãikꞌaapa poro wẽsaa bapari. 15Na eujãdepema kꞌĩsia kꞌawaara beerã mãikꞌaapa ne–inaa waide pꞌasa–e bɨ jarapataarã nama chedakꞌãri jã pꞌãda leedaitꞌee mãikꞌaapa jaradaitꞌee kꞌãata jara kꞌinia bɨ, apidaapa pꞌoyaa jarada–e paji. 16Mamĩda mɨa ũriji pɨa ne–inaa apidaapa kꞌawadakꞌaa jarai, chaaree bɨ pɨjida. Pɨa jã pꞌãda leeru pɨrã mãikꞌaapa jararu pɨrã kꞌãata jara kꞌinia bɨ, mɨa pɨmaa pꞌaru pꞌupꞌuchia jɨ̃piitꞌee mãikꞌaapa pɨ otaude cadena nẽedee ooda jɨ̃ bɨpiitꞌee mãikꞌaapa mɨ ekꞌari bɨ poro waibɨa jua ekꞌari Babiloniadepemaarã poro waibɨa papiitꞌee.
17Mãpai Danielpa mãgaji:
—Rey Waibɨa, pɨchi netꞌaa ome béeji, maa–e pɨrã awaraamaa téeji. Mamĩda mɨa ichita jã pedee pꞌãda leeitꞌee mãikꞌaapa jaraitꞌee kꞌãata jara kꞌinia bɨ.
18’Ɨtꞌaripema Akꞌõre Waibɨapa eujã waibɨa bɨji pɨ akꞌõre, Nabucodonosor, jua ekꞌari. Netꞌaara iru bapiji mãikꞌaapa waibɨa papiji, jõmaarãpa iru tꞌo pꞌanadamerã. 19Tachi Akꞌõrepa awaraa reyrã kꞌãyaara iru juataura papida perã, jõmaweda awara–awaraa pꞌuurudepemaarãpa, awara–awaraa eujãdepemaarãpa mãikꞌaapa pedee awara–awaraa pedeepataarãpa iru waawee pꞌanapachida. Iru rey bɨde peepiji ichia peepi kꞌiniata mãikꞌaapa chokꞌai bɨpachi ichia chokꞌai bɨpi kꞌiniata. Ichia eperã waibɨara papi kꞌinia bakꞌãri, waibɨara papipachi. Jõdee ekꞌariara papi kꞌinia bakꞌãri, ekꞌariara papipachi. 20Mamĩda iru auduadaikꞌãri, kꞌĩsiapachi ichita jõmaarã kꞌãyaara waibɨara bɨ. Mapa Tachi Akꞌõrepa waa iru rey mimiade mimiapi–e paji. Mãgá iru netꞌaa wẽe beeji. 21Eperãarã pꞌanapatamãiipa ãyaa banaji mãikꞌaapa ne–animalaarã kꞌĩsiapatakꞌa kꞌĩsia beeji. Mẽepema burroorã ome nipapachi mãikꞌaapa pꞌũajara kꞌopachi pꞌakꞌakꞌa. Sereno iru kꞌapꞌɨa ɨ̃rɨ baaipachi. Mãgá beekꞌee bapachi. Mãga bapachi irua kꞌawaarumaa na pꞌekꞌau eujãdepema reyrã jõmaweda ɨtꞌaripema Akꞌõre Waibɨa jua ekꞌari pꞌanapata. Iruata reyrã ãchi mimiade bɨpari ichia kꞌinia bɨkꞌa.
22’Ɨ̃rá Rey Waibɨa Belsasar, pɨ rey Nabucodonosor warra bɨta, pɨ akꞌõre ome pꞌasada kꞌawa bɨ mĩda, pɨchi tꞌãripa ijãa–e eperãarã Jõmaarã Akꞌõre Waibɨa jua ekꞌari pꞌanapata. Mapa audua nipapari. 23Ɨtꞌaripema Akꞌõre Waibɨa kꞌĩrapite audua–ee bai kꞌãyaara, pɨa iru ãpɨte ne–inaa kꞌachia ooji iru tedepema copa mãgá aneepikꞌãri mãikꞌaapa made vino todakꞌãri pɨa, poro waibɨarã pɨ jua ekꞌari beerãpa, pɨ wẽraarãpa, pɨ wẽraarã kꞌãipariirãpa paara. Mãgá to pꞌanɨ misa, pedee pia jarapachida pãchi akꞌõre waibɨa apataarã–itꞌee; ma ne–inaa juapa ooda nẽedee; pꞌaratꞌadee, broncedee, hierrodee, pakꞌurudee mãikꞌaapa mãudee. Mãga oojida mãgee akꞌõre waibɨa apataarãpa pꞌoyaa unudakꞌaa, pꞌoyaa ũridakꞌaa mãikꞌaapa pꞌoyaa ne–inaa kꞌawadakꞌaa mĩda. Rey Waibɨa, mãgeerã–itꞌee pedee pia jaradai kꞌãyaara, ɨtꞌaa tꞌɨ̃ pꞌanadaipia pꞌanakꞌajida Jõmaarã Akꞌõre Waibɨamaa, pɨ iru jua ekꞌari bapari perã mãikꞌaapa irua pɨ chokꞌaipipari perã. Iru wẽe pɨa ne–inaa apida pꞌoyaa oo–e pai. 24Mapa irua ma jua pëiji paredde pꞌãmerã. 25Jãma nãga pꞌã bɨ: Mene, Mene, Téquel, Parsin. 26Ma pedee nãga jara kꞌinia bɨ.
’Mene jara kꞌinia bɨ juasiada. Rey Waibɨa, Tachi Akꞌõrepa pɨ bapari ewari juasia iru bɨ mãikꞌaapa taarã–e jõpiitꞌee.
27’Téquel jara kꞌinia bɨ chaada. Rey Waibɨa, Tachi Akꞌõrepa pɨ ichi balanzade chaaji mãikꞌaapa falta bɨ unuji.
28’Parsin jara kꞌinia bɨ tꞌooda. Rey Waibɨa, Tachi Akꞌõrepa eujã pɨ jua ekꞌari bɨ tꞌooji; esa–aukꞌa teeji Media pidaarãmaa; esa–aukꞌa Persia pidaarãmaa.
29Mãpai Belsasarpa jaraji Danielmaa pꞌaru pꞌupꞌuchia jɨ̃ bɨdamerã mãikꞌaapa cadena nẽedee ooda iru otaude jɨ̃ bɨdamerã. Ma awara poro waibɨa ichi jua ekꞌari mimiapari ekꞌari poro waibɨa papiji.
30Ma ewate pꞌãrikꞌua Babiloniadepemaarã rey Belsasar peetꞌaajida. Mãpai Mediadepema rey Dariopa ma eujã ichi–itꞌee jãri ata cheji, ichi jua ekꞌari beemerã. 31Maapai rey Darío sesenta y dos años iru baji.
Currently Selected:
Daniel 5: sjaB
Highlight
Share
Compare
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.
