Hechos 8

Saulopa ijãapataarã miapiitꞌee jɨrɨda

1-2Esteban peedakꞌãri, Saulo mama baji akꞌɨitꞌee, ichi judiorã poroorã eere bada perã. Esteban piupꞌeda, ũkꞌuru Tachi Akꞌõrede ijãapataarãpa ɨajida; ichiaba audú jẽejida iru–itꞌee.

Ma ewatedeepa Jerusalende Cristode ijãadakꞌaa beerãpa irude ijãapataarã jɨrɨjida peedaitꞌee. Mapa jõmaweda mirukꞌoodachida Judea eujãdee mãikꞌaapa Samaria eujãdee. Cristopa jɨrɨtꞌeradaarã aupai miruda–e paji. 3Mãgá jɨrɨ pꞌanɨ misa, Saulopa Cristode ijãapataarã aukꞌa jɨrɨpachi. Te chaa tꞌĩu wãpachi wẽraarã ɨmɨkꞌĩraarã ome jita pꞌeitꞌee. Maapꞌeda carcelde tꞌɨpikꞌoopachi.

Samariade jarateedapꞌedaa Cristopa ooda eperãarã kꞌaripaitꞌee

4Saulopa mãga oo baji mĩda, chi Jerusalendeepa mirudapꞌedaarãpa jaratee wãpachida Cristopa ooda eperãarã kꞌaripaitꞌee ãchi wãrutamaa. 5Felipe wãji Samaria eujãdee mãikꞌaapa Cristopa ooda jarateepachi. 6Arii pꞌanadapꞌedaarãpa mãga ũridakꞌãri mãikꞌaapa unudakꞌãri irua ooda eperãarãpa pꞌoyaa oodakꞌaa ãchi juadoopa, waapɨara kꞌawa kꞌinia pꞌanajida. 7Mama Felipepa uchiapikꞌoopachi netuaraarã merãtɨa bee eperãarã chokꞌara kꞌapꞌɨadeepa. Mãgɨ́ netuaraarã ãra kꞌapꞌɨadeepa bia uchia wãpachida. Ma awara Felipepa jɨpakꞌoopachi eperãarã chokꞌara chiwa beerã mãikꞌaapa pꞌoyaa ãchi bɨɨrɨpa pia nipadakꞌaarã. 8Maperã ma pꞌuurudepemaarã o–ĩa pꞌanapachida.

9Mamĩda mama bapachi eperã tꞌɨ̃jarapatapꞌedaa Simón. Mãgɨpa petau tau kꞌawaa baji mãikꞌaapa ma eujãdepemaarã kꞌũra pꞌe iru bapachi ichia oo bɨ kꞌaurepa. Mapa ãchi tꞌãide eperã waibɨakꞌa bapachi. 10Waibɨara beerã, ekꞌariara beerãpa paara iru pedee ũri kꞌinia pꞌanapachida mãikꞌaapa mãgapachida:

—Tachi Akꞌõrépata irumaa nãga oopi bɨ.

11Irua jararu ijãapachida, ichi petau taupa kꞌũrapꞌe iru bada perã. Taarãji ma kꞌapɨte bɨ. 12Mama bɨde Felipepa jarateeji: Jesucristo Tachi Akꞌõrepa pëida mãikꞌaapa iru kꞌaurepa Tachi Akꞌõrepa eperãarã pꞌekꞌau kꞌachia wẽpapikꞌoopari. Mãga ijãadakꞌãri, mãpema ɨmɨkꞌĩraarã mãikꞌaapa wẽraarã poro choopijida. 13Simonpa pida ijãaji. Maapꞌeda poro choopiji mãikꞌaapa nipaji Felipe ome. Unukꞌãri Felipepa ne–inaa oo bɨ eperãarãpa pꞌoyaa oodakꞌaa ãchi juadoopa, ichia kꞌawa–e bapachi sãga kꞌĩsiai.

14Cristopa jɨrɨtꞌeradaarã Jerusalende pꞌanadapꞌedaarãpa ũridakꞌãri Samaria pidaarãpa ijãaruta Akꞌõrepa ooda Cristo piuda kꞌaurepa, mamaa pëijida Pedro Juan ome. 15Arii panadakꞌãri, ɨtꞌaa tꞌɨ̃jida Samaria pidaarã Cristode ijãapataarã pari, Tachi Akꞌõre Jaure ãra ome ba chemerã, 16waide Akꞌõre Jaure ãra kꞌapꞌɨade ba che–e bada perã. Jĩpꞌa poro choopijida Tachi Waibɨa Jesús tꞌɨ̃de, akꞌɨpidaitꞌee irude ijãadapꞌedaa. 17Mãpai Pedropa mãikꞌaapa Juanpa jua bɨdakꞌãri ãra ɨ̃rɨ, mãgá Akꞌõre Jaure ba cheji ãra ome.

18Simonpa unukꞌãri Akꞌõre Jaure che bɨ Cristopa jɨrɨtꞌeradaarãpa jua bɨrutade eperãarã ɨ̃rɨ, pꞌaratꞌa teeitꞌee paji, ichia aukꞌa mãga ooitꞌee. 19Mãgaji:

—Mɨmaa kꞌawaapidapáde aji, ichiaba mɨa jua bɨkꞌãri eperã ɨ̃rɨ, Akꞌõre Jaure iru ome ba chemerã.

20Mãpai Pedropa pꞌanauji:

—¡Pɨchi pꞌaratꞌa ome atua baibeepáde aji, kꞌĩsia bairã neto atai Tachi Akꞌõrepa oopipari ichi jɨrɨtꞌeradaarãmaa! 21Pɨa na mimia pꞌoyaa oo–e, Akꞌõre kꞌĩrapite kꞌĩra jĩpꞌa kꞌĩsia–e bairã. 22Mãgá kꞌĩsia amáaji mãikꞌaapa Tachi Akꞌõremaa chupɨria iidíji. Mãga oorura, Tachi Akꞌõrepa perdonaaipɨ pɨa kꞌachia oo kꞌinia bɨ. 23Mɨa mãga jara bɨ kꞌawa bairã pɨ tꞌãride tai ome kꞌĩrau bɨ, waibɨara paruta perã pɨ kꞌãyaara nãpemaarã kꞌĩrapite. Wãara pɨ atꞌãri pꞌekꞌau kꞌachia jua ekꞌari bɨ.

24Mãpai Simonpa pꞌanauji:

—Parãpa Akꞌõremaa chupɨria iididapáde aji mɨ pari, mɨ baainaamerã parãpa mɨmaa jaradapꞌedaade.

25Maapꞌeda Pedropa Juan ome ma pꞌuurudepemaarãmaa jarajida ãchia unudapꞌedaa Jesús ome nipadakꞌãri. Ichiaba Tachi Akꞌõrepa jara pëida jarateejida. Ma tꞌẽepai chejida Jerusalendee. Mamĩda ode Samariade pꞌuuru bee chaa jaratee che wãpachida Tachi Akꞌõrepa pedee pia jara pëida Cristode.

Felipe Etiopía eujãdepema poro ome unuda

26Ma tꞌẽepai, Tachi Akꞌõrepa ichi ángel pëiji Felipemaa jaramerã:

—Wã́ji barree, Jerusalendeepa chonaarãwedapema Gaza pꞌuurudee wãpari ode. Mãgɨ́ o wãyaapari eujã pania wẽe bɨde.

27Mãpai Felipe wãji mãikꞌaapa ode unuji eperã Etiopía eujãdepema. Mãgɨ́ Etiopiadepemaarã poro waibɨara paji. Ãchi reina pꞌaratꞌa jɨ̃apari paji. Ichi wã baji Jerusalendee Tachi Akꞌõremaa ɨtꞌaa tꞌɨ̃de. 28Mata waya che wãji ichi eujãdee. Su–akꞌɨ baji ichi caballopa jidiupata carrode mãikꞌaapa lee wãji chonaarãwedapema Akꞌõre pedee jarapari Isaíapa pꞌãda.

29Mãgá wãde, Akꞌõre Jaurepa mãgaji Felipemaa:

—Wã́ji jã carro kꞌaitꞌa.

30Felipe ma carro ikꞌaawa pakꞌãri, ũriji Etiopiadepemapa Isaíapa pꞌãda leemaa bɨ. Mãpai iidiji:

—¿Kꞌawa bɨkꞌã aji, kꞌãata jara kꞌinia bɨ pɨa leemaa bɨ?

31Etiopiadepemapa pꞌanauji:

—¿Sãga mɨa kꞌawaayama aji, apidaapa mɨmaa jarateeda–eeta?

Mãpai Felipemaa chupɨria iidiji bataumerã mãikꞌaapa ichi ikꞌaawa su–akꞌɨ beemerã. 32Isaíapa pꞌãdadepema ichia leemaa badade nãga pꞌã baji:

‘Iru ateejida oveja ateepatakꞌa chi peepatamaa. Ara oveja kꞌĩupꞌee baparikꞌa chi kꞌara tꞌɨɨmaa pꞌanadakꞌãri, mãga pɨkꞌa iru kꞌĩupꞌee baji. 33Iru kꞌĩra nejasiapijida mãikꞌaapa maarepida chupɨria kꞌawada–e paji. Ãchi audú tꞌãri kꞌachia–idaa pꞌanadapꞌedaa perã, pee atapëijida. Maperã irudeepa warra apida uchiada–e paji. Mãgá iru peedakꞌãri, uchiapijida na pꞌekꞌau eujãdeepa.’ (Isaías 53.7-8)

34Mãpai Etiopiadepemapa Felipemaa iidiji:

—Mɨ chupɨria kꞌawáaji. ¿Kꞌaideta pedeemaa bɨma aji, na Akꞌõre pedee jaraparipa; ichide wa awaraa eperãde?

35Mãpai Felipepa ma Etiopiadepemamaa mãgaji:

—Pɨa leemaa bɨ Tachi Akꞌõre Warrade; Jesús pꞌasada.

Mãpai Felipepa jarateemaa beeji jõma Jesupa ooda eperãarã kꞌaripaitꞌee. 36Maapꞌeda waawipai ode wãyaadakꞌãri pania paraamãi, mãgɨ́ eperãpa mãgaji:

—Nama pania paraa. ¿Sãapꞌeda mɨ poro choo–ema? aji.

37[Felipepa pꞌanauji:

—Pɨa wãara Jesucristode ijãa bɨ pɨrã, pia bɨda aji.

Ma eperãpa mãgaji:

—Mɨa ijãa bɨda aji, Jesucristo Tachi Akꞌõre Warra.]

38Ma carro tꞌɨbaipipꞌeda, ãchi omee weda ɨrabaijida mãikꞌaapa wãjida pania paraamaa. Mama Felipepa poro chooji. 39Paniadeepa uchiadakꞌãri, Felipe wẽpadachi Tachi Akꞌõre Jaurepa ateeda perã. Ma Etiopiadepemapa waa unu–e paji. Mamĩda ichi o–ĩa wãji ichi eujãdee. 40Mãɨmisa Akꞌõre Jaurepa Felipe uchiapiji Azoto pꞌuurude. Mamãikꞌaapa pꞌuuru bee chaa Cristopa ooda eperãarã kꞌaripaitꞌee jaratee wãpachi Cesarea pꞌuurude panarumaa.

Currently Selected:

Hechos 8: sjaB

Highlight

Copy