Hechos 6

Ijãapataarã siete jɨrɨtꞌeradapꞌedaa Cristopa jɨrɨtꞌeradaarã kꞌaripadamerã

1Maapai ijãapataarã chokꞌarapɨara ĩwajida. Judiorã griego pedee pedeepataarãpa ɨmɨateejida judiorã hebreo pedee pedeepataarãmaa, ãchia griego pedee pedeepataarã pꞌẽtrãarã pia akꞌɨdakꞌaa pada perã ewari chaa ne–inaa jededakꞌãri kꞌaripadaitꞌee. 2Maperã chi doce jɨrɨtꞌeradaarãpa tꞌɨ̃ pëijida jõmaweda Cristode ijãapataarã cheepurudamerã. See nɨ̃beekꞌãri, mãgajida:

—Kꞌõpꞌãyoorã, tai jua araada–e ijãapataarã jõmaweda akꞌɨdaitꞌee. Pia–e bɨda ajida, taipa waa jarateeda–e paitꞌee Akꞌõrepa jara pëida Jesucristo kꞌapꞌɨa pari, chi ne–inaa wẽe beerã akꞌɨ kꞌiniapa. 3Mapa eperãarã siete jɨrɨtꞌerátɨ ma mimia oodamerã. Jɨrɨdaipia bɨ nãgee eperãarã: kꞌĩsia kꞌawaa beerã; tꞌãri pia beerã mãikꞌaapa Akꞌõre Jaurepa oopi bɨkꞌa oo kꞌinia beerã. 4Tai jõdee ɨtꞌaa tꞌɨ̃maa pꞌanadaitꞌee mãikꞌaapa Akꞌõrepa jara pëida jarateedaitꞌeeda ajida.

5Mãpai ãchia pꞌanaujida:

—Pia bɨda ajida.

Maapꞌeda jɨrɨtꞌerajida Esteban. Ma eperã Cristode pia ijãaji mãikꞌaapa Akꞌõre Jaurepa oopi bɨkꞌa oopachi. Ichiaba jɨrɨtꞌerajida Felipe, Prócoro, Nicanor, Timón, Pármenas mãikꞌaapa Nicolás Antioquiadepema. Naaweda mãgɨ́ Nicolás Tachi Akꞌõrede ijãakꞌaa bapꞌeda, judiorãpa ijãapatade ijãa baji. 6Ma tꞌẽepai ateejida Cristopa jɨrɨtꞌeradaarã pꞌanadapꞌedaamaa. Mãgɨɨrã ɨtꞌaa tꞌɨ̃jida ãchi pari mãikꞌaapa jua bɨjida ãchi ɨ̃rɨ. Mãga oojida akꞌɨpidaitꞌee ma mimia ãchimaa teeruta.

7Ma tꞌẽepai, Akꞌõrepa ooda Cristo piuda kꞌaurepa waapɨara jarateepachida mãikꞌaapa ijãapataarã waapɨara ĩwapachida Jerusalende. Judiorã ũkꞌuru, pꞌaareerã jida ichiaba Cristode ijãajida.

Judiorã poroorãpa Esteban jita atadapꞌedaa

8Maapai Jerusalendepemaarã tꞌãide Estebanpa oopachi ne–inaa eperãarãpa pꞌoyaa oodakꞌaa ãchi juadoopa. Mãga oopachi Tachi Akꞌõrepa iru kꞌaripa bada perã. 9Mamĩda ewari aba pachejida judiorã Tachi Akꞌõre Ũraa jarateepata tedepema. Ma te tꞌɨ̃jarapachida Esclavoorã Pꞌanadapꞌeda Uchiadapꞌedaa. Mãɨrãpa nepɨra jɨrɨ chejida Estebanmaa. Ãchi ome chejida aukꞌa Cirene pꞌuurudepemaarã, Alejandría pꞌuurudepemaarã, Cilicia eujãdepemaarã mãikꞌaapa Ásia eujãdepemaarã. 10Mamĩda aupedeedakꞌãri, Esteban pꞌoyaa kꞌĩupꞌeepidakꞌaa paji, Akꞌõre Jaurepa iru kꞌĩsia kꞌawaapida perã ãchia iidida pꞌanautꞌee. 11Mapa awaraarãmaa pꞌaajida seewa jaradamerã ichia pedee kꞌachia pedeemaa bɨ Moisés ãpɨte mãikꞌaapa Tachi Akꞌõre ãpɨte. 12Mãgá pꞌuuru pidaarã, judiorã poro waibɨarã mãikꞌaapa Moisepa pꞌãda jarateepataarã kꞌĩraupikꞌoojida Esteban ome. Mãɨrãpa Esteban jita atadapꞌeda, atadachida Junta Suprema kꞌĩrapite Tachi Akꞌõre te waibɨade. 13Mãpai ma pꞌaadapꞌedaarã aneejida seewa jaradamerã. Mãɨrãpa mãgajida:

—Nãgɨ́ eperãpa ikꞌachia pedeeparida ajida, Tachi Akꞌõre te ãpɨte mãikꞌaapa Moisepa pꞌãda ãpɨte. 14Jara bɨ Jesús Nazaretdepemapa nãgɨ́ te tꞌeetꞌaaitꞌee mãikꞌaapa tachimaa waa oopi–e paitꞌee Moisepa pꞌãdade jaradakꞌa, tachia oodamerã.

15Judiorã poroorãpa mãikꞌaapa arii pꞌanadapꞌedaarãpa Esteban akꞌɨdakꞌãri, chi kꞌĩra ángel kꞌĩrakꞌa unujida.

Currently Selected:

Hechos 6: sjaB

Highlight

Copy