Hechos 20

Pablo Macedonia eujãdee mãikꞌaapa Grecia eujãdee wãda

1Eperãarã ãchi te chaa wãdapꞌedaa tꞌẽepai, Pablopa ijãapataarã tꞌɨ̃ pꞌeji ũraaitꞌee. Maapꞌeda wãji Macedonia eujãdee. 2Mama ijãapataarã ũraa nipapꞌeda, panaji Grecia eujãde. 3Atane õpee mama beeji. Mamãikꞌaapa barcode wãitꞌee bɨde Siria eujãdee, kꞌawaaji judiorãpa ichi peedaitꞌee otꞌewa pꞌanɨ. Mapa waya ãpɨtee pꞌɨrrabaidachi. Mata wãyaaji Macedonia eujãde. 4Ma wãdade iru kꞌõpꞌãyaajida nãgɨ́ ijãapataarãpa: Pirro warra Sópatro, Berea pꞌuurudepema; Aristarco mãikꞌaapa Segundo, Tesalónica pꞌuurudepema; Gayo, Derbe pꞌuurudepema; Timoteo, Tíquico mãikꞌaapa Trófimo, Ásia eujãdepema. 5Mãɨrã tai naa wãjida mãikꞌaapa nɨnajida Troas pꞌuurude. 6Ma tꞌẽepai tai wãjida Filipos pꞌuurudeepa, fiesta pan levadura wẽe kꞌopata wãyaapꞌeda. Barcode wã nipadapꞌedaa perã, kꞌãima joisomaamaa panajida Troas pꞌuurude. Kꞌĩrachuunadapꞌeda apemaarã ome, mama kꞌãima siete pꞌaneejida.

Pablopa ooda Troas pꞌuurude

7Tomia ewate tai chipꞌejida apemaarã ijãapataarã ome nekꞌodaitꞌee mãikꞌaapa Cristo piuda kꞌirãpadaitꞌee. Pablopa ijãapataarãmaa jarateemaa baji esapɨte parumaa, ichi aɨ norema wãitꞌee pada perã. 8Te piso ɨtꞌɨpema cuartode chipꞌe pꞌanajida mãikꞌaapa lamparara ɨ̃daa nɨ̃baji. 9Pablo jarateemaa bɨ misa, kꞌũtrãa Eutico apatapꞌedaa su–akꞌɨ baji ventanade ũrimaa. Mamĩda Pablopa taarã jarateeda perã, ma kꞌũtrãa kꞌãidaipꞌeda, tudú padachi piso õpeedeepa. Aramata piu jira atanajida. 10Mãpai Pablo ɨrabaipꞌeda, ma kꞌũtrãa kꞌapꞌɨa wëre ataji mãikꞌaapa mãgaji chi kꞌõpꞌãyoorã arii pꞌanadapꞌedaarãmaa:

—¡Pꞌeranáatɨ! ¡Iru chokꞌai bɨpɨ!

11Mãpai Pablo waya teedaa wãkꞌãri, nekꞌojida mãikꞌaapa Cristo piuda kꞌirãpajida. Mata waya ichi jarateemaa beeji ewarirumaa. Ewarikꞌãri, wãji ichi ode. 12Ma kꞌũtrãa piu bada chokꞌai ateedapꞌedaa perã ichi temaa, ijãapataarã o–ĩa pꞌaneejida.

Troas pꞌuurudeepa Mileto pꞌuurudee wãda

13Pablo ode wã kꞌinia baji. Mapa tai naa wãjida barcode Aso pꞌuurudee. Mama nɨjida iru batau atadaitꞌee. 14Aso pꞌuurude unudakꞌãri, batauji tai ome mãikꞌaapa wãjida Mitilene pꞌuurudee. 15Mamãikꞌaapa uchiadapꞌeda, aɨ norema Quío isla kꞌĩrapite wãyaajida. Ma norema Samos pꞌuurude panajida. Mamãikꞌaapa panajida Mileto pꞌuurude. 16Mãgá oojida Pablo waa wã kꞌinia–e bada perã Ásia eujãdee. Ma awara Éfeso pꞌuurude wiibai kꞌinia–e paji, Jerusalende isapai pana kꞌinia bada perã, Pentecostés fiesta ewate pai naaweda.

Pablopa jarada Éfeso pꞌuurudepema ijãapataarã akꞌɨpataarãmaa

17Mãgá Éfeso pꞌuurude wiibai kꞌinia–e paji taarãi jĩakꞌaapa. Mamĩda Mileto pꞌuurude pachedakꞌãri, Pablopa tꞌɨ̃ pëiji Efesodepema ijãapataarã akꞌɨpataarã. 18Ãchi pachedakꞌãri, ichia mãgaji:

—Parãpa kꞌawa pꞌanɨda aji, sãgata mɨ nipapari parã tꞌãide, na Ásia eujãde ewaa pachedakꞌãriipa. 19Taarãru parã ome Tachi Akꞌõrepa oopi bɨkꞌa oomaa bɨ, chupɨria nɨ̃bɨde mãikꞌaapa nepɨrade nɨ̃bɨde judiorã juapa. 20Mamĩda jõmaarã taide waawee–ee jarateeji, parã te chaa paara. Mãga ooji parã ũraaitꞌee mãikꞌaapa kꞌaripaitꞌee. 21Aukꞌa jarateeji judiorãmaa mãikꞌaapa judio–eerãmaa, ãchia pꞌekꞌau kꞌachia oopata oodaamaa pꞌaneedamerã mãikꞌaapa Tachi Waibɨa Jesucristode ijãadamerã. 22Ɨ̃rá wãru Jerusalendee, Tachi Akꞌõre Jaurepa mãga kꞌinia bairã. Wãitꞌee kꞌawa–e bɨ mĩda kꞌãata mɨ ome oodaitꞌee mama. 23Nãgapai kꞌawa bɨ. Pꞌuuru bee chaa wãyaarude Tachi Akꞌõre Jaurepa mɨmaa kꞌawapiru mɨ miaitꞌee mãikꞌaapa carcelde chupɨria nɨ̃banaitꞌee. 24Mamĩda mɨa pꞌua–e bɨ, piuru pɨjida Jesupa oopi bɨkꞌa oo kꞌinia bairã. Jĩpꞌa jaratee kꞌinia bɨ na pedee pia: Tachi Akꞌõrepa eperãarã kꞌinia iru bairã, tachi kꞌaripaji Jesucristo piuda kꞌaurepa.

25ʼMãga jarateeji parã tꞌãide. Ma awara Tachi Akꞌõrepa parãmaa jarateeji ichia oopi kꞌinia bɨ Cristode ijãapataarãmaa. Mɨa kꞌawa bɨ parãpa mɨ kꞌĩra waa unuda–e paitꞌee. 26Mapa idi weda Tachi Akꞌõre kꞌĩrapite mɨa jara bɨ: parãdepema aba piukꞌãri atuaru pɨrã, mɨ kꞌaurepada ada–e paitꞌee. 27Mãga jara bɨ mɨa jarateeda perã jõmaweda Tachi Akꞌõrepa jarapidakꞌa. 28Mapa ɨ̃pemaarã, chikꞌaripa pꞌanapatáatɨ mãikꞌaapa ijãapataarã pia akꞌɨ pꞌanapatáatɨ, ma–itꞌee Tachi Akꞌõre Jaurepa parã jɨrɨtꞌerada perã. Tachi Waibɨapa kꞌinia bɨ parãpa akꞌɨdamerã ichide ijãapataarã, ichia ãra o kꞌachiadeepa kꞌaripa atada perã, ichi waa batꞌada kꞌaurepa. 29Mɨa kꞌawa bɨ ne–animal kꞌachia beerã atu chepatakꞌa eperãarã peede, mãga pɨkꞌa mɨ nãikꞌaapa wãda tꞌẽepai awaraarã chedaitꞌee Cristode ijãapataarã ijãa amaapide. 30Ichiaba pãchi tꞌãideepa pida uchiadaitꞌee seewa jarapataarã. Mãgɨɨrãpa ijãapataarã ãchi eere atee kꞌinia pꞌanadaitꞌee. 31Mapa kꞌĩra ɨbɨa pꞌanátɨ mãikꞌaapa kꞌirãpátɨ sãga mɨ chupɨria nɨ̃baji año õpee, parã ũraa bɨ misa pꞌãrikꞌua mãikꞌaapa ãstaawa.

32ʼƗ̃rá ɨ̃pemaarã, mɨa parã bɨru Tachi Akꞌõre juade, ichia parã pia akꞌɨ bapariimerã ichi ũraa pꞌãdade jara bɨkꞌa. Ichi aupaita parãmaa oopii ichia oopi kꞌinia bɨkꞌa, mãgá iru–itꞌee pꞌanapataadamerã chi apemaarã awara bɨdaarãkꞌa. 33Mɨa chĩara pꞌaratꞌa, nẽe mãikꞌaapa pꞌaru kꞌɨ̃a–e bɨ. 34Parãpa pia kꞌawa pꞌanɨ mɨchi juadoopa mimiapari mãikꞌaapa ne–inaa atapari mɨchi–itꞌee mãikꞌaapa mɨ ome pꞌanɨɨrã–itꞌee. 35Mɨa parãmaa atꞌapai jarateedoo, aukꞌa mimiadamerã mãikꞌaapa chikꞌaripa para bamerã. Kꞌirãpátɨ Tachi Waibɨa Jesupa jarada: “Pipɨara bɨ teeitꞌee, jitai kꞌãyaara.”

36Mãga jarapꞌeda, Pablo bedabaidachi mãikꞌaapa ɨtꞌaa tꞌɨ̃ji Tachi Akꞌõremaa jõmaarã ome. 37Mãpai jõmaweda jẽejida tꞌãri pꞌuapa mãikꞌaapa Pablo wëre atapachida. 38Kꞌĩra pia–ee para baji, Pablopa ichi kꞌĩra waa unuda–eda ada perã. Maapꞌeda, barco badamaa kꞌõpꞌãyanajida.

Currently Selected:

Hechos 20: sjaB

Highlight

Copy